ଢାକା: ବାଂଲାଦେଶର ବୁରିଗଙ୍ଗା ନଦୀରେ ସୋମବାର ହୋଇଥିବା ଯାତ୍ରୀବାହୀ ଡଙ୍ଗା ବୁଡି ଘଟଣାରେ ବଢିବାରେ ଲାଗିଛି ମୃତ୍ୟୁ ସଂଖ୍ୟା । ମଙ୍ଗଳବାର ନଦୀରୁ ଆଉ ଏକ ମୃତଦେହ ଜବତ ହେବା ସହ ଘଟଣାରେ ମୋଟ ମୃତ୍ୟୁ ସଂଖ୍ୟା 33ରେ ପହଞ୍ଚିଛି । ସେପଟେ ଆହୁରି ଅନେକ ଯାତ୍ରୀ ଏବେ ବି ନିଖୋଜ ରହିଥିବା ସନ୍ଦେହ କରାଯାଉଛି । ଏନେଇ ସୂଚନା ଦେଇଛନ୍ତି ଅଗ୍ନିଶମ ବିଭାଗ ଡ୍ୟୁଟି ଅଧିକାରୀ ଅନିସୁର ରେହମାନ ।
ସୂଚନା ଅନୁଯାୟୀ ସୋମବାର ମୁନସିଗଞ୍ଜରୁ ଢାକା ଅଭିମୁଖେ ବାହାରିଥିବା ‘ମର୍ଣ୍ଣିଂ ବାର୍ଡ’ ଡଙ୍ଗା ସଦରଘାଟରେ ଅନ୍ୟ ଏକ ଡଙ୍ଗା ‘ମୋୟୁର-2’ ସହ ଧକ୍କା ହୋଇଥିଲା । ସ୍ଥାନୀୟ ପୋଲିସର ସୂଚନା ମୁତାବକ ଏହି ଡଙ୍ଗାରେ 100ରୁ ଉର୍ଦ୍ଧ୍ବ ଲୋକେ ଯାତ୍ରା କରୁଥିଲେ । ସେପଟେ ମୋୟୁର-2ରେ ଜଣେ ବ୍ୟକ୍ତି ଡଙ୍ଗାର ଶୀର୍ଷ ସ୍ଥାନରେ ଛିଡା ହୋଇଥିବାରୁ ଭାରସାମ୍ୟ ହରାଇ ଡଙ୍ଗାଟି ବୁଡିଥିଲା । ଏପରି ସମୟରେ ମର୍ଣ୍ଣିଂ ବାର୍ଡ ମଧ୍ୟ ଭାରସାମ୍ୟ ହରାଇ ବୁଡିଯାଉଥିବା ମୋୟୁର-2 ସହ ଧକ୍କା ହୋଇଥିଲା ।
ସମ୍ପୃକ୍ତ ଘଟଣାରେ ଖାମଖିଆଲି ଆଚରଣ ଯୋଗୁଁ 7 ଜଣଙ୍କ ବିରୋଧରେ ପୋଲିସ ମାମଲା ରୁଜୁ କରିଛି । ତେଣେ ବୁରିଗଙ୍ଗା ନଦୀରେ ପ୍ରଦୂଷଣର ମାତ୍ରା ବଢିଚାଲିଥିବା ସତ୍ତ୍ବେ ଢାକା ସହ ଦେଶର ଅନ୍ୟ କେତେକ ଅଞ୍ଚଳକୁ ସଂଯୋଗ କରିବା ପାଇଁ ଏହା ଏକ ପ୍ରମୁଖ ମାଧ୍ୟମ । ଯାତାୟତ ପାଇଁ ଏହି ନଦୀପଥ ଉପରେ ଅନେକ ଲୋକେ ନିର୍ଭର କରିଥାଆନ୍ତି । ବାଂଲାଦେଶରେ ଡଙ୍ଗା ଦୁର୍ଘଟଣା କିଛି ନୂଆ ଘଟଣା ନୁହେଁ । ଅଧିକାଂଶ ମାମଲାରେ ଡଙ୍ଗାରେ କ୍ଷମତାରୁ ଅଧିକ ଲୋକ କାରଣ ପାଲଟିଥିବା ବେଳେ ଅନେକ ସମୟରେ ଡଙ୍ଗାର ଖରାପ ସ୍ଥିତି ଦାୟୀ ହୋଇଥାଏ ।
@IANS
