ମସ୍କୋ: ରାସ୍ତା ଉପରେ ଗାଡି ଚଳାଇବା ବେଳେ ବିଭିନ୍ନ ଦିଗ ପ୍ରତି ଦେବାକୁ ପଡେ ସ୍ବତନ୍ତ୍ର ଧ୍ୟାନ । ସେ ରାସ୍ତା ଉପରେ ନଜର ଦେବାକୁ ହେଉ କି ଘଣ୍ଟା ଘଣ୍ଟା ଧରି ଷ୍ଟିଅରିକୁ ଅପରେଟ କରିବା ହେଉ, ପ୍ରତିଟି କ୍ଷେତ୍ରକୁ ଦେବାକୁ ପଡେ ଧ୍ୟାନ । ଅନେକ ସମୟରେ ଏପରି ବି ଦେଖାଯାଇଛି କି ଗାଡି ଚଳାଇବା ସମୟରେ ଚାଳକଙ୍କ ଆଖି ଲାଗିଯାଏ । ଫଳରେ ଅନେକ ଦୁର୍ଘଟଣାର ଶିକାର ହୁଅନ୍ତି ଯାତ୍ରୀ । ଏମିତିରେ ବିନା ଚାଳକରେ ଗାଡି ଚଳାଇବା ପାଇଁ ସ୍ବୟଂଚାଳିତ କାରର କଳ୍ପନା କରୁଛନ୍ତି ଋଷିଆନ ଇଞ୍ଜିନିୟର ଦଳ ।
ଏହି ଷ୍ଟାର ଲାଇନ କାର ବିକାଶ ପଛରେ ମୂଳ ଉଦ୍ଦେଶ୍ୟ ହେଉଛି ବିନା ମାନବକୃତ ବଳ ପ୍ରୟୋଗରେ କାର ପରିଚାଳନା କରିବା । ସେହିପରି ଦୁର୍ଘଟଣାରୁ ବର୍ତ୍ତିବା ପାଇଁ କାରରେ ଖଞ୍ଜା ଯାଇଥିବା ସେନ୍ସର ଗୁଡିକ ରାସ୍ତାରେ ଥିବା ଅନ୍ୟ ପଥଚାରୀ ବା ଗାଡିଗୁଡିକୁ ଚିହ୍ନଟ କରି କାରକୁ ସଠିକ୍ ଢଙ୍ଗରେ ପରିଚାଳିତ କରାଇଥାଏ । ତେବେ ଇଞ୍ଜିନିୟରମାନଙ୍କ ଦ୍ବାରା ପ୍ରସ୍ତୁତ ହୋଇଥିବା ଏହି ସ୍ବୟଂଚାଳିତ କାର ବାସ୍ତବରେ କେତେ କାର୍ଯ୍ୟକାରୀ ତାହା ପରୀକ୍ଷା କରିବା ପାଇଁ ସେଣ୍ଟ ପିଟର୍ସବର୍ଗ ରାସ୍ତାରେ ଏହି କାରକୁ ଚଳାଯାଇଥିଲା ।
ଏହି ଷ୍ଟାର ଲାଇନ ଡ୍ରାଇଭରଲେସ କାରର ବିକାଶ ଦାୟିତ୍ବରେ ଥିବା ଇଞ୍ଜିନିୟର ଆଣ୍ଟୋନ ବାବୁରୋଭ ଏହି ପରୀକ୍ଷଣରେ କାରର ସେନ୍ସର ଦ୍ବାରା ମନିଟରକୁ ମିଳିଥିବା ସିଗନାଲକୁ ନିରୀକ୍ଷଣ ଦାୟିତ୍ବରେ ରହିଥିଲେ । ସେ କହିଥିଲେ କି ସହରାଞ୍ଚଳ ରାସ୍ତାରେ ଏହି ସ୍ବୟଂଚାଳିତ କାରର ପରୀକ୍ଷା ଦ୍ବାରା ସ୍ପଷ୍ଟ ହୋଇଛି କି ଏଥିରେ ଆହୁରି ଅନେକ ବିକାଶର ଆବଶ୍ୟକତା ରହିଛି । ଏଥିସହ କେତେ ଦୂରତାରେ ରହିଲେ କାରର ସେନ୍ସର ଏକ ବସ୍ତୁକୁ ଚିହ୍ନଟ କରିପାରିବ ସେ ଦିଗରେ ମଧ୍ୟ କିଛି ପରିଶ୍ରମର ଆବଶ୍ୟକତା ଥିବା ସେ ପ୍ରକାଶ କରିଥିଲେ ।
ଏହି କାରରେ ଯାତ୍ରାକୁ ସୁରକ୍ଷିତ କରିବା ପାଇଁ ଏକାଧିକ ସେନ୍ସରର ବ୍ୟବହାର କରାଯାଇଛି । ଏଥିରେ କିଛି ଏପରି ସେନ୍ସର ମଧ୍ୟ ରହିଛି ଯାହା ଅନ୍ୟ ସେନ୍ସରର ବିକଳ୍ପ ଭାବେ ମଧ୍ୟ କାର୍ଯ୍ୟ କରିପାରେ । କାରଣ ଯଦି କୌଣସି ପରିସ୍ଥିତିରେ କାରକୁ ନିୟନ୍ତ୍ରଣ କରିବା ପାଇଁ ଖଞ୍ଜା ୟାଇଥିବା ସେନ୍ସର ଅକାମି ହୋଇଯାଏ ତେବେ ସେହି ସମୟରେ ବିକଳ୍ପ ଭାବେ ଥିବା ସେନ୍ସରଗୁଡିକ କାର୍ଯ୍ୟ ଭାର ନେଇ ଥାଆନ୍ତି । ଏନେଇ ସୂଚନା ଦେଇଛନ୍ତି ମସ୍କୋସ୍ଥିତ ଏକ ଉଚ୍ଚ ଟେକ୍ନୋଲୋଜି ବ୍ୟବସାୟ ପେଣ୍ଠସ୍ଥଳୀ ସ୍କୋଲକୋଭୋ ଇନୋଭେସନ ସେଣ୍ଟରରେ ପ୍ରକଳ୍ପ ବିଭାଗ ମୁଖ୍ୟ ଆଲେକ୍ସାଣ୍ଡର ୟାକୁଟୋଭ । ସେ ଏହା ମଧ୍ୟ କହିଛନ୍ତି କି ଏହି କାରକୁ ଏପରି ପ୍ରସ୍ତୁତ କରାଯାଇଛି କି ଏହା ରାସ୍ତାରେ ଚାଲୁଥିବା ଅନ୍ୟ କୌଣସି ପରଥଚାରୀ କିମ୍ବା କାର ଉପରେ ଚଢିଯିବ ନାହିଁ । ବରଂ ଏହା ରାସ୍ତାରେ ଥିବା ଅନ୍ୟ ବସ୍ତୁକୁ ଚିହ୍ନଟ କରି ସେମାନଙ୍କଠାରୁ ସୁରକ୍ଷିତ ଦୂରତା ବଜାୟ ରଖି ରାସ୍ତା ଅତିକ୍ରମ କରାଏ ।
ଏହି ତଥ୍ୟକୁ ଷ୍ଟାର ଲାଇନ ମନୁଷ୍ୟବିହୀନ କାର ପ୍ରକଳ୍ପର ମୁଖ୍ୟ ବୋରିସ ଇଭାନୋଭ ମଧ୍ୟ ସ୍ବଳ୍ପ ପରିମାଣରେ ଗ୍ରହଣ କରିଛନ୍ତି । କିନ୍ତୁ ସେ ଏହା ମଧ୍ୟ କହିଛନ୍ତି କି ଏହି ପ୍ରୟାସ ଦ୍ବାରା ସମୟ କ୍ରମେ ପରିବହନରେ ବିବର୍ତ୍ତନ ହେବ । ପରିବହନ ଓ ଗାଡି ଚଳାଚଳର ପରିଭାଷା ପରିବର୍ତ୍ତନ ହେବ । ସେପଟେ କାରର ମୂଲ୍ୟ ବର୍ତ୍ତମାନ ବହୁତ ଅଧିକ ରହିଥିବାରୁ ବଜାରରେ ଏହାର ଚାହିଦା କମ ରହିବ । କାରଣ ଏହା ଲୋକଙ୍କ ଆର୍ଥିକ ସ୍ଥିତିକୁ ନସୁହାଇବା ପର୍ଯ୍ୟନ୍ତ ଗ୍ରାହକ ଏହାକୁ କିଣିବେ ନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
