ଢାକା: ବାଂଲାଦେଶର ରୋହିଙ୍ଗ୍ୟା ଶରଣାର୍ଥୀଙ୍କ ଶିବିରରେ ଆକ୍ରମଣ । ଶରଣାର୍ଥୀଙ୍କ ଉପରେ ଆଖିବୁଜା ଗୁଳିମାଡ । ଘଟଣାରେ 7 ଜଣ ଶରଣାର୍ଥୀଙ୍କ ମୃତ୍ୟୁ ହୋଇଛି । ଏନେଇ ସ୍ପଷ୍ଟ କରିଛି ବାଂଲାଦେଶ ପୋଲିସ ।
ସ୍ଥାନୀୟ ମିଡିଆ ଢାକା ଟ୍ରିବ୍ୟୁନ ଅନୁଯାୟୀ, ଶିବିରର ମଦ୍ରାସାରେ ହୋଇଛି ଏହି ଆକ୍ରମଣ । ଭୋର ସମୟରେ ଏହି ଆକ୍ରମଣ ଘଟିଥିଲା । ଅଜ୍ଞାତ ଆକ୍ରମଣକାରୀ ମାନେ ଶିବିରରେ ଆଖିବୁଜା ଗୁଳି ଚଳାଇଥିଲେ। ଗୁଳିକାଣ୍ଡରେ ଘଟଣାସ୍ଥଳରେ ୪ ଜଣ ବ୍ୟକ୍ତିଙ୍କ ମୃତ୍ୟୁ ଘଟିଥିବାବେଳେ ବାକି 3 ଜଣଙ୍କ ଚିକିତ୍ସାଧୀନ ଅବସ୍ଥାରେ ପ୍ରାଣ ହରାଇଛନ୍ତି ।
ଘଟଣାରେ ସମ୍ପୃକ୍ତ ଜଣେ ବନ୍ଧୁକଧାରୀକୁ ଗିରଫ କରାଯାଇଛି । ଆକ୍ରମଣକାରୀ ପାଖରୁ ବନ୍ଧୁକ ଓ ଗୋଳାବାରୁଦ ଜବତ ହୋଇଛି । ତେବେ ଅନ୍ୟମାନଙ୍କୁ ଖୋଜୁଛି ପୋଲିସ ।
