କାବୁଲ: ଦକ୍ଷିଣ ଆଫଗାନିସ୍ତାନରେ ଭୟଙ୍କର ବିମାନ ଆକ୍ରମଣ । ହେଲମଣ୍ଡ ପ୍ରାନ୍ତର ରାଜଧାନୀ ଲସ୍କର ଗାହ ଇଲାକାରେ ତାଲିବାନ ଆତଙ୍କବାଦୀଙ୍କ ସହ ସଂଘର୍ଷ ବେଳେ ଭୁଲରେ ହୋଇଥିବା ବିମାନ ଆକ୍ରମଣରେ ୧୭ ଜଣ ଆଫଗାନିସ୍ତାନ ପୋଲିସ କର୍ମୀଙ୍କ ମୃତ୍ୟୁ ହେବା ସହ 14 ଜଣ ଗୁରୁତର ଆହତ ହୋଇଛନ୍ତି ।
ଏହି ଘଟଣାରେ ଆଫଗାନ ପ୍ରାନ୍ତୀୟ ପରିଷଦ ମୁଖ୍ୟ ଉତାଉଲ୍ଲା ଆଫ୍ଗାନ କହିଛନ୍ତି ଯେ ଲସ୍କର ଗାହ ସହର ନିକଟରେ ବୁଧବାର ତାଲିବାନ ଆତଙ୍କବାଦୀ ଓ ଆଫଗାନ ପୋଲିସ୍ଙ୍କ ମଧ୍ୟରେ ସଂଘର୍ଷ ସମୟରେ ଭୁଲ ବଶଃତ ଏହି ବିମାନ ଆକ୍ରମଣ ହୋଇଥିଲା । ଏଥିରେ 17 ପୋଲିସ କର୍ମୀଙ୍କ ମୃତ୍ୟୁ ହୋଇଥିବା ବେଳେ 14 ଗୁରୁତର ଆହତ ହୋଇଛନ୍ତି ।
ଏହି ବିମାନ ଆକ୍ରମଣ ପରେ ତୁରନ୍ତ ଏହା ଆମେରିକା ଓ ଆଫଗାନିସ୍ତାନ କାହା ପକ୍ଷରୁ ହୋଇଛି ବୋଲି ସ୍ପଷ୍ଟ ସୂଚନା ମିଳିପାରି ନାହିଁ । ସୂଚନା ଯେ ବର୍ତ୍ତମାନ ପରିସ୍ଥିତିରେ ଆଫଗାନ ସେନାକୁ ଆମେରିକାର ସମର୍ଥନ ରହିଛି ।
17ରୁ ଅଧିକ ପୋଲିସ କର୍ମୀଙ୍କ ମୃତ୍ୟୁ ଘଟଣାରେ ହେଲମଣ୍ଡ ଗଭର୍ଣ୍ଣର ମହମ୍ମଦ ୟାସିନ ବିମାନ ଆକ୍ରମଣର ତଦନ୍ତ ନିର୍ଦେଶ ଦେଇଛନ୍ତି । ଏହି ବିମାନ ଆକ୍ରମଣରେ ତାଲିବାନ ପକ୍ଷରୁ ଆମେରିକାକୁ ଦାୟୀ କରାଯାଇଛି ।
