ଜେନେଭା: ସ୍ବିଜରଲ୍ୟାଣ୍ଡ ରାଜଧାନୀ ଜେନେଭାରେ ଦୁଇ ବଡ ଦେଶର ନେତାଙ୍କ ଭେଟଘାଟ । ଋଷ ପ୍ରତିପକ୍ଷ ଭ୍ଲାଦିମିର ପୁତିନଙ୍କୁ ଭେଟିଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ । ଉଭୟଙ୍କ ମଧ୍ୟରେ 4ରୁ 5 ଘଣ୍ଟା ଧରି ବୈଠକ ଚାଲିବ ବୋଲି ଜଣାପଡିଛି ।
ଉଭୟ ନେତା ଜୋଶର ସହ ହାତ ମିଳାଇଥିବା ଦେଖିବାକୁ ମିଳିଛି । ବୈଠକରେ ଦୁଇ ନେତାଙ୍କ ମଧ୍ୟରେ ସାଇବର ଆଟାକକୁ ନେଇ ଚର୍ଚ୍ଚା ହେବା ସମ୍ଭାବନା ରହିଛି ।
ଋଷ ଓ ଆମେରିକା ମଧ୍ୟରେ ସମ୍ପର୍କର ତିକ୍ତତା ମଧ୍ୟରେ ଏହି ବୈଠକ ହୋଇଛି । ଗତ ଚାରିମାସ ଧରି ଉଭୟ ନେତା ପରସ୍ପର ବିରୋଧରେ ତୀବ୍ର ବିବୃତ୍ତି ଦେଇଛନ୍ତି। ଆମେରିକାର ସ୍ବାର୍ଥକୁ ନେଇ ଋଷ ସମର୍ଥିତ ହ୍ୟାକରଙ୍କ ସାଇବର ଆକ୍ରମଣ ପାଇଁ ବାଇଡେନ ପୁତିନଙ୍କୁ ବାରମ୍ବାର ସମାଲୋଚନା କରିଥିବାବେଳେ ପୁତିନ କହିଛନ୍ତି ଯେ ତାଙ୍କ ଦେଶ ଆମେରିକା ନିର୍ବାଚନରେ ହସ୍ତକ୍ଷେପ କରି ନାହିଁ କିମ୍ବା କୌଣସି ସାଇବର ଆକ୍ରମଣ କରି ନାହିଁ।
ଏହି ବୈଠକରୁ ଉଭୟ ପକ୍ଷଙ୍କୁ କୌଣସି ବିଶେଷ ଆଶା ନାହିଁ | ଏହାପୂର୍ବରୁ ଆମେରିକାର ରାଷ୍ଟ୍ରପତି ବାଡେନ କହିଥିଲେ ଯେ ଯଦି ଦୁଇ ଦେଶ ଶେଷରେ ନିଜ ସମ୍ପର୍କରେ ସ୍ଥିରତା ଆଣିପାରନ୍ତି, ତେବେ ଏହି ବୈଠକ ଏକ ଗୁରୁତ୍ବପୂର୍ଣ୍ଣ ପଦକ୍ଷେପ ହେବ।
ଏକ ଦଶନ୍ଧି ମଧ୍ୟରେ ପ୍ରଥମ ଥର ପାଇଁ ବାଇଡେନ ଋଷର ରାଷ୍ଟ୍ରପତିଙ୍କ ସହ ସାକ୍ଷାତ କରୁଛନ୍ତି। ଶେଷ ଥର ପାଇଁ ସେ ମାର୍ଚ୍ଚ 2011ରେ ପୁତିନଙ୍କୁ ଭେଟିଥିଲେ । ସେତେବେଳେ ବାଇଡେନ ଉପରାଷ୍ଟ୍ରପତି ଥିଲେ। ଏହା ପରେ ବାଇଡେନ ପୁତିନଙ୍କୁ ଜଣେ ହତ୍ୟାକାରୀ ଏବଂ ଶତ୍ରୁ ବୋଲି କହିଥିଲେ।
ଉଭୟ ନେତାଙ୍କ ମଧ୍ୟରେ ବାଣିଜ୍ୟ ଏବଂ ଅସ୍ତ୍ର ନିୟନ୍ତ୍ରଣ ଭଳି ପ୍ରସଙ୍ଗ ଆଲୋଚନା କରାଯାଇପାରେ । ବାଇଡେନ କହିଛନ୍ତି ଯେ ସେ ପୁତିନଙ୍କ ସହ ସହଯୋଗର କ୍ଷେତ୍ର ଖୋଜିବାକୁ ଆଶା କରୁଛନ୍ତି କିନ୍ତୁ ସାଇବର ଅପରାଧ, ଆମେରିକାର ନିର୍ବାଚନରେ ଋଷର ହସ୍ତକ୍ଷେପ ଭଳି ପ୍ରସଙ୍ଗ ଏଥିରେ ଖଟାପଣ ଆଣିପାରେ ।
