ୱାଶିଂଟନ: ଆମେରିକାର ରାଷ୍ଟ୍ରପତି ନିର୍ବାଚନରେ ଡେମୋକ୍ରାଟିକ୍ ପାର୍ଟିର ରାଷ୍ଟ୍ରପତି ପ୍ରାର୍ଥୀ ଜୋ ବିଡେନ କହିଛନ୍ତି ଯେ ଯଦି ସେ ନିର୍ବାଚନ ଜିତନ୍ତି ତେବେ ତାଙ୍କ ପ୍ରଶାସନ ଭାରତ ସହିତ ଆମେରିକାର ସମ୍ପର୍କକୁ ମଜବୁତ କରିବ ଓ ଆମେରିକା ସବୁବେଳେ ଭାରତ ସହିତ ଛିଡା ହେବ। ବିଡେନ କହିଛନ୍ତି ଯେ ଭାରତ ସମ୍ମୁଖୀନ କରୁଥିବା ଚ୍ୟାଲେଞ୍ଜ ସପକ୍ଷରେ ଆମେରିକା ସର୍ବଦା ଛିଡା ହେବ।
ନଭେମ୍ବର 3 ତାରିଖରେ ଆମେରିକାର ରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ବର୍ତ୍ତମାନର ରାଷ୍ଟ୍ରପତି ତଥା ରିପବ୍ଲିକାନ୍ ପ୍ରାର୍ଥୀ ଡୋନାଲ୍ଡ ଟ୍ରମ୍ପଙ୍କ ବିରୋଧରେ 77 ବର୍ଷୀୟ ଜୋ ବିଡେନ ନିର୍ବାଚନ ଲଢିବେ । ବିଡେନ କହିଛନ୍ତି, ‘15 ବର୍ଷ ପୂର୍ବେ ମୁଁ ଭାରତ ସହିତ ଐତିହାସିକ ପରମାଣୁ ଚୁକ୍ତି କରିବାରେ ଏକ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଥିଲି। ଯଦି ଭାରତ-ଆମେରିକା ବନ୍ଧୁ ଓ ଅଂଶୀଦାରୀ ରୁହନ୍ତି ତେବେ ବିଶ୍ବ ଅଧିକ ସୁରକ୍ଷିତ ରହିବ’ । ବିଡେନ ପୂର୍ବରୁ ଓବାମା ପ୍ରଶାସନରେ ଉପରାଷ୍ଟ୍ରପତି ରହିଆସିଛନ୍ତି। ଭାରତର ସ୍ବାଧୀନତା ଦିବସରେ ଆୟୋଜିତ ଏକ କାର୍ଯ୍ୟକ୍ରମରେ ସେ ଏହା କହିଛନ୍ତି।
ବିଡେନ କହିଛନ୍ତି ଯେ ଯଦି ସେ ରାଷ୍ଟ୍ରପତି ପଦବୀ ପାଇଁ ନିର୍ବାଚିତ ହୁଅନ୍ତି ତେବେ ସେ ଭାରତ ସହ ସମ୍ପର୍କକୁ ଆହୁରି ମଜବୁତ କରିବେ। ଦୁଇ ଦେଶ ମଧ୍ୟରେ ବ୍ୟବସାୟିକ ସମ୍ପର୍କ ମଧ୍ୟ ବୃଦ୍ଧି ପାଇବ, ଜଳବାୟୁ ପରିବର୍ତ୍ତନ ଓ ବିଶ୍ବ ସ୍ବାସ୍ଥ୍ୟ ସୁରକ୍ଷା ଭଳି ଆହ୍ବାନରେ ମଧ୍ୟ ଉଭୟ ଦେଶ ମିଳିତ ଭାବେ କାର୍ଯ୍ୟ କରିବେ । ବିଡେନ କହିଛନ୍ତି ଯେ ସେ ଉଭୟ ଦେଶର ଗଣତାନ୍ତ୍ରିକ ମୂଲ୍ୟବୋଧକୁ ଦୃଢ କରିବା ଉପରେ ମଧ୍ୟ ଗୁରୁତ୍ବ ଦେବେ। ବିଡେନ ଆମେରିକାରେ ଭାରତୀୟ ସମ୍ପ୍ରଦାୟର ଅବଦାନକୁ ମନେ ପକାଇ କହିଛନ୍ତି ଯେ ଭାରତୀୟ ସମ୍ପ୍ରଦାୟ ତାଙ୍କ ସମଗ୍ର କ୍ୟାରିୟରରେ ଏକ ପ୍ରମୁଖ ଭୂମିକା ଗ୍ରହଣ କରିଛି।
