ନ୍ୟୁଜର୍ସି: ସ୍ଥାନୀୟ ୟୁନିଅନ ସ୍ଥିତ ଉପାନ୍ତ ଗଲ୍ଫ କ୍ଲବ କୋରୋନା ସଂକ୍ରମଣରୁ ବଞ୍ଚିବା ପାଇଁ କିଣିଛି 4ଟି ନୂଆ ରୋବୋଟ କ୍ୟାଡି । ଏହି ରୋବୋଟ କ୍ୟାଡି ବା ଟେମ୍ପୋ ୱାକର ବ୍ୟବହାର କରି ଗଲ୍ପ କୋର୍ଟରେ ସାମାଜିକ ଦୂରତା ବଜାୟ ରଖାଯାଇପାରେ । ଏପ୍ରିଲ ମାସରେ କ୍ଲବ ଏହି ରୋବୋଟକୁ କିଣିଥିବା ବେଳେ ବର୍ତ୍ତମାନ ଏହା ଦୈନନ୍ଦିନ ଖେଳ ଅଭ୍ୟାସ ପ୍ରକ୍ରିୟାର ଜରୁରୀ ଅଙ୍ଗ ପାଲଟିଛି । 1896ରେ ଅଗସ୍ତା, ଜର୍ଜିଆର ‘କ୍ଲବ କାର’ କମ୍ପାନୀ ଦ୍ବାରା ପ୍ରସ୍ତୁତ ଏହି କ୍ୟାଡି ଏବେ ଖୁବ ଲୋକପ୍ରିୟ ପାଲଟିଛି ।
କ’ଣ ରହିଛି ଏହି ଟେମ୍ପୋ କାରର ଫିଚର:
- ଏହି ସ୍ବୟଂଚାଳିତ ମେସିନକୁ ଏକ ରିମୋଟ ଦ୍ବାରା ପରିଚାଳିତ କରାଯାଏ । ଏହି ରିମୋଟ ଗଲ୍ଫରଙ୍କ ବେଲ୍ଟରେ ଲଗାଯାଇଥିବା ବେଳେ ଟେମ୍ପୋ ୱାକ ଗଲ୍ଫରଙ୍କୁ 4ରୁ 10 ଫୁଟ ପଛରେ ଥାଇ ଅନୁସରଣ କରିଥାଏ ।
- ଏଥିରେ ଲିଥିୟମ ବ୍ୟାଟେରୀର ବ୍ୟବହାର କରାଯାଇଛି । ଏହା 2ଟି ରାଉଣ୍ଡରେ 18ଟି ହୋଲ ଶେଷ ହେବା ପର୍ଯ୍ୟନ୍ତ କାର୍ଯ୍ୟକାରୀ ହୋଇପାରିବ । ଏନେଇ ସୂଚନା ଦେଇଛନ୍ତି ଉପାନ୍ତ ଗଲ୍ଫ କ୍ଲବର ନିର୍ଦ୍ଦେଶକ ଓ ପ୍ରଥମ ଆସିଷ୍ଟାଷ୍ଟ ପୌଲ ଲିଜିଉନ ।
- ପୌଲଙ୍କ କହିବା ଅନୁଯାୟୀ ପ୍ରତି ରୋବୋଟ ପିଛା କ୍ଲବ 4,000 ଡଲାର ଖର୍ଚ୍ଚ କରିଛି ।
ପୌଲ ଏହା ମଧ୍ୟ କହିଛନ୍ତି କି ଯଦି କୌଣସି ଗଲ୍ଫର ଏକା ଚାଲିବାକୁ ପସନ୍ଦ କରନ୍ତି ତେବେ ଏହି ରୋବୋଟ ରିମୋଟ ସହ ସେମାନଙ୍କୁ ଅନୁସରଣ କରିଥାଏ । ଯାହା ଗଲ୍ଫରଙ୍କୁ ଖୁବ ପସନ୍ଦ ।
- ପୂର୍ବରୁ ଏକ ଗାଡିରେ ସମସ୍ତ ସାମଗ୍ରୀ ବୋହି ଗଲ୍ଫରମାନେ କୋର୍ଟକୁ ଯାଉଥିବା ବେଳେ ଏବେ ଏହାର ବିକଳ୍ପ ସାଜିଛି ଟେମ୍ପୋ ୱାକ ।
- ଏହି ଟେମ୍ପୋ ୱାକରେ ଫୋନ ଚାର୍ଜର, ପାନୀୟ କୁଲର ଓ ଗ୍ରାଉଣ୍ଡ ସଜାଡିବାକୁ ଆବଶ୍ୟକ ସାମଗ୍ରୀ ରଖିବା ପାଇଁ ମଧ୍ୟ ସ୍ବତନ୍ତ୍ର ସ୍ଥାନ ରହିଥାଏ ।
ଏହି କ୍ଲବରେ ଦୈନିକ ଟେମ୍ପୋ ୱାକ ବ୍ୟବହାର କରୁଥିବା ଜଣେ ବ୍ୟକ୍ତି ହେଉଛନ୍ତି ଆଟର୍ଣ୍ଣି ରିଚାର୍ଡ କୁହର୍ତ୍ତ(61) । ଏହି ବୟସରେ ସେ ଚାଲିବା ପସନ୍ଦ କରୁଥିବା କ୍ୟାଡି ତାଙ୍କୁ ଏଥିରେ ସାହାଯ୍ୟ କରୁଛି । ଏହା ବ୍ୟତୀତ ମନୁଷ୍ୟଚାଳିତ ଗାଡିର ବ୍ୟବହାର ତାଙ୍କୁ ଏତେ ଉପାଦେ ହେଉନଥିବାରୁ ରୋବୋଟ କ୍ୟାଡି ତାଙ୍କର ପ୍ରଥମ ପସନ୍ଦ ପାଲଟିଛି । ଏଥିସହ ଏହି ଟେମ୍ପୋ ୱାକ ଯୋଗୁଁ ଖେଳରେ ଅଧିକ ଧ୍ୟାନ ଦେଇ ପାରୁଥିବାରୁ ତାଙ୍କୁ ଏକ ପେଶାଗତ ଖେଳାଳୀ ଭଳି ଅନୁଭବ ମିଳୁଥିବା ସେ ପ୍ରକାଶ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
