ୱାଶିଂଟନ: ଆମେରିକାରେ ବିପର୍ଯ୍ୟୟ ଭାବେ ପରିଣତ ହୋଇଥିବା କୋରୋନା ସ୍ଥିତିକୁ ନେଇ ନିକଟରେ ଏକ ସର୍ଭେ ହୋଇଥିଲା । ଯେଉଁଥିରେ ଦେଖାଯାଇଥିଲା କି ମାତ୍ର 34 ପ୍ରତିଶତ ଆମେରିକୀୟ ନାଗରିକ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶାସନ ପ୍ରକ୍ରିୟା ଓ ବିପର୍ଯ୍ୟୟ ସ୍ଥିତି ମୁକାବିଲାକୁ ସମର୍ଥନ କରିଛନ୍ତି । ବଳକା ନାଗରିକ କିନ୍ତୁ ଟ୍ରମ୍ପଙ୍କ ଏହି ଆଭିମୁଖ୍ୟକୁ କଡା ବିରୋଧ କରିଥିବା ଦେଖାଯାଇଛି ।
କେବଳ କୋରୋନା ସ୍ଥିତି ନୁହେଁ ବରଂ ଦେଶରେ ନିକଟରେ ଘଟିଥିବା ଅନ୍ୟ ସମସ୍ତ ଘଟଣା ପାଇଁ ମଧ୍ୟ ଟ୍ରମ୍ପଙ୍କ ଦାୟୀ ଭାବି ତାଙ୍କର ଆଭିମୁଖ୍ୟକୁ ବିରୋଧ କରିଛନ୍ତି ସାଧାରଣ ଜନତା । ସେ ଜର୍ଜ ଫ୍ଲଏଡଙ୍କ ମୃତ୍ୟୁ ହେଉ କି ଜର୍ଜଙ୍କ ମୃତ୍ୟୁକୁ ନେଇ ଦେଶରେ ନିଆଁ ପରି ବ୍ୟାପିଥିବା ଆନ୍ଦୋଳନ, ପ୍ରତ୍ୟେକ କ୍ଷେତ୍ରରେ ଟ୍ରମ୍ପଙ୍କ ଆଭିମୁଖ୍ୟ ଦେଶବାସୀଙ୍କୁ ବ୍ୟଥିତ କରିଥିବା ସର୍ଭେରୁ ସ୍ପଷ୍ଟ ହୋଇଥିଲା । ଏନେଇ ଆମେରିକୀକ ଇପସୋସ ପୋଲ ଏହି ସର୍ଭେ ପରିଚାଳିତ କରିଥିଲା ।
ଦେଶରେ 52 ପ୍ରତିଶତ ନାଗରିକ ବିଶ୍ବାସ କରନ୍ତି କି ଜାତିଆଣ ବିରୋଧୀ ଆନ୍ଦୋଳନକୁ ନିୟନ୍ତ୍ରଣାଧିନ କରିବା ପାଇଁ ଟ୍ରମ୍ପ ଯେଉଁ ଫେଡେରାଲ ଆଇନ ପ୍ରଣୟନ କରିଥିଲେ, ତାହା ପରିସ୍ଥିତିକୁ ଗୁରୁତର କରିଦେଇଥିଲା । ଅପରପାର୍ଶ୍ବରେ ରିପବ୍ଲିକାନ ଟ୍ରମ୍ପଙ୍କ କୋରୋନା ସଂକ୍ରମଣ ସ୍ଥିତି ମୁକାବିଲାକୁ 74 ପ୍ରତିଶତ ଭୋଟ, ଆନ୍ଦୋଳନ ନିୟନ୍ତ୍ରଣକୁ 78 ପ୍ରତିଶତ ଓ ଋଷିଆ ସହ ସମ୍ପର୍କ ସ୍ଥିତି ନେଇ 80 ପ୍ରତିଶତ ଭୋଟ ଦେଇଥିବା ଦେଖାଯାଇଛି ।
ଡେମୋକ୍ରାଟ କିନ୍ତୁ ଟ୍ରମ୍ପଙ୍କ ବିରୋଧ କରି କୋରୋନା ସ୍ଥିତି ନିୟନ୍ତ୍ରଣ ପାଇଁ ଟ୍ରମ୍ପଙ୍କୁ 7 ପ୍ରତିଶତ, ବିକ୍ଷୋଭ ସ୍ଥିତି ନିୟନ୍ତ୍ରଣ ପାଇଁ 8 ପ୍ରତିଶତ ଓ ଋଷିଆ ସହ ସମ୍ପର୍କ ନେଇ 8 ପ୍ରତିଶତ ଭୋଟ ଦେଇଛି ।
@IANS
