ୱାଶିଂଟନ: ଦେଶରେ ମିନିଆପୋଲିସ ଓ ସିଟଲ ସହରରେ ହୋଇଥିବା ଗୁଳିକାଣ୍ଡରେ 2ଜଣଙ୍କ ମୃତ୍ୟୁ ହୋଇଥିବା ସହ 11 ଜଣ ଆହତ ହୋଇଥିବା ଜଣା ପଡିଛି । ଏନେଇ ରବିବାର ଆମେରିକା ପୋଲିସ ସ୍ପଷ୍ଟ କରିଛି । ଏକ ଟ୍ବିଟ ଜରିଆରେ ମିନିଆପୋଲିସ ସହରର ପୋଲିସ ବିଭାଗ ସୂଚନା ଦେଇ କହିଥିଲେ କି ଏହି ଘଟଣାରେ ଆହତ 11 ଜଣଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି ।
ଏହି ଘଟଣାର କିଛି ସମୟ ପୂର୍ବରୁ ପୋଲିସ ଟ୍ବିଟ ଯୋଗେ ସହରବାସୀଙ୍କୁ ଉପର ମିନିଆପୋଲିସ ଅଞ୍ଚଳକୁ ନଯିବା ପାଇଁ ପରାମର୍ଶ ଦେଇଥିଲେ । ଏହି ସ୍ଥାନରେ ଗତ ମେ’ 25ରେ ଆଫ୍ରିକାନ-ଆମେରିକାନ କୃଷ୍ଣକାୟ ଜର୍ଜ ଫ୍ଲଏଡଙ୍କର ପୋଲିସ ହେପାଜତରେ ମୃତ୍ୟୁ ହୋଇଥିଲା । ଏହାପରେ ଆମେରିକା ସମେତ ବିଶ୍ବର ବିଭିନ୍ନ ପ୍ରାନ୍ତରେ ବର୍ଣ୍ଣବୈଷମ୍ୟ ନୀତି ବିରୋଧରେ ଆନ୍ଦୋଳନ ଉଗ୍ର ରୂପ ଧାରଣ କରିଥିଲା । ଇତିମଧ୍ୟରେ ସିଟଲ ସହରରେ ଆନ୍ଦୋଳନକୁ ନିୟନ୍ତ୍ରଣ କରିବାକୁ ଯାଇ ପୋଲିସ ଗୁଳି ଚାଳନା କରିଥିଲା । ଯେଉଁଥିରେ ଜଣଙ୍କ ମୃତ୍ୟୁ ହେବା ସହ ଅନ୍ୟ ଜଣେ ଗୁରୁତର ହୋଇପଡିଥିଲେ ।
ଶନିବାର ରାତି ପ୍ରାୟ 2ଟା 30ରେ କାଲ ଆଣ୍ଡରସନ ପାର୍କରେ ଏହି ଗୁଳିକାଣ୍ଡ ହୋଇଥିଲା । ଏଥିରେ ଆହତଙ୍କୁ ଉଦ୍ଧାର କରିବା ପାଇଁ ପୋଲିସ ଉଦ୍ୟମ କରିଥିବା ବେଳେ ବିକ୍ଷୋଭକାରୀଙ୍କ ଭିଡ ସେମାନଙ୍କୁ ଅଟକାଇ ରଖିଥିଲା । ପରେ ପୋଲିସ ଜାଣିବାକୁ ପାଇଥିଲା ସିଏଚଓପି ମେଡିକ୍ସ ଆହତଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଛି । ହେଲେ ଡାକ୍ତରଖାନାରେ ପହଞ୍ଚିବା ବେଳକୁ 19ବର୍ଷୀୟ ଜନୈକ ଆହତଙ୍କ ମୃତ୍ୟୁ ହୋଇଥିଲା । ସେପଟେ ଗୁରୁତର ଆହତ ହୋଇଥିବା ବ୍ୟକ୍ତି ମଧ୍ୟ ପରେ ଆଖି ବୁଜିଥିଲେ ।
@IANS
