ୱାଶିଂଟନ: ଆମେରିକାରେ ଆଗକୁ ରାଷ୍ଟ୍ରପତି ନିର୍ବାଚନ ହେବାକୁ ଥିବାବେଳେ ଜୋର ଧରିଛି ରାଜନୀତିର ଅଙ୍କକଷା । ଏମିତିରେ ଲୁଇସିଆନା ରାଜ୍ୟରେ ହୋଇଥିବା ପ୍ରାଥମିକ ପର୍ଯ୍ୟାୟ ନିର୍ବାଚନରେ ବାଜିମାତ କରିଛନ୍ତି ପୂର୍ବତନ ଉପରାଷ୍ଟ୍ରପତି ତଥା ପ୍ରିଜମ୍ପଟିଭ ଡେମୋକ୍ରାଟିକ ଦଳର ଜୋ ବିଡେନ ।
ରାଷ୍ଟ୍ରପତି ନିର୍ବାଚନରେ ବର୍ତ୍ତମାନ ଡୋନାଲ୍ଡ ଟ୍ରମ୍ପଙ୍କ ଜଣେ ମୁଖ୍ୟ ପ୍ରତିଦ୍ବନ୍ଦୀ ଭାବେ ବିଡେନଙ୍କ ନାମ ଆସୁଥିବା ବେଳେ ଲୁସିଆନାରେ ତାଙ୍କ ବିଜୟ ସମର୍ଥକଙ୍କ ମଧ୍ୟରେ ଖୁସିର ଲହରି ଖେଳାଇ ଦେଇଛି । ଲୁସିଆନାରେ ହୋଇଥିବା ପ୍ରାଥମିକ ପର୍ଯ୍ୟାୟ ନିର୍ବାଚନରେ ବିଡେନ 82.2 ପ୍ରତିଶତ ମତ ସହ ବାଜିମାତ କରିଛନ୍ତି । ସେପଟେ ବରିଷ୍ଠ ସିନେଟର ବର୍ଣ୍ଣି ସ୍ୟାଣ୍ଡରଙ୍କୁ ମାତ୍ର 5.3 ପ୍ରତିଶତ ଭୋଟ ମିଳିଥିବା ଜଣା ପଡିଛି ।
ଶନିବାର ଲୁଇସିଆନାରେ ହୋଇଥିବା ଏହି ବିଜୟ ସହ ଔପଚାରିକ ଭାବେ ରାଷ୍ଟ୍ରପତି ନିର୍ବାଚନରେ ଦଳ ପକ୍ଷରୁ ବିଡେନଙ୍କୁ ଚୟନ କରିବାର ପଥ ପରିସ୍କାର ହେଉଛି । ଆସନ୍ତା ଅଗଷ୍ଟ ମାସରେ ଡେମୋକ୍ରାଟିକ ଦଳ ଏନେଇ ସ୍ପଷ୍ଟ କରିବ । ସେପଟେ ଲୁଇସିଆନାରେ ହୋଇଥିବା ପ୍ରାଥମିକ ପର୍ଯ୍ୟାୟ ନିର୍ବାଚୟ ପୂର୍ବରୁ ଏପ୍ରିଲ 4ରେ ହେବା ନେଇ ତାରିଖ ନିର୍ଦ୍ଧାରିତ ହୋଇଥିଲା । ହେଲେ କୋରୋନା ସଂକ୍ରମଣ ପାଇଁ ଏହା ଜୁନ 20 ପାଇଁ ପୁନଃନିର୍ଦ୍ଧାରିତ ହୋଇଥିଲା । ହେଲେ ପରିସ୍ଥିତିକୁ ନଜରରେ ରଖି ଏହି ତାରିଖ ପୁଣି ପରିବର୍ତ୍ତନ କରାଯାଇଥିଲା ।
ଲୁଇସିଆନାରେ ବିଜୟ ହାସଲ କରିଥିବା 54 ପ୍ରତିନିଧିମାନଙ୍କୁ ପୁରସ୍କୃତ କରାଯିବ । ସେପଟେ 2016 ମସିହାରେ ହିଲାରି କ୍ଲିଣ୍ଟନଙ୍କୁ 20 ପଏଣ୍ଟରେ ଡୋନାଲ୍ଡ ଟ୍ରମ୍ପ ପରାସ୍ତ କରିବା ପରେ ଚଳିତବର୍ଷ ନିର୍ବାଚନରେ ଲୁଇସିଆନା ପୂର୍ବପରି ସକ୍ରିୟ ନଥିବା ଦେଖିବାକୁ ମିଳିଛି ।
@IANS
