ନୂଆଦିଲ୍ଲୀ: ଆମେରିକାର ରାଷ୍ଟ୍ରପତି ନିର୍ବାଚନର 11 ଦିନ ପୂର୍ବରୁ ପ୍ରତିଦ୍ବନ୍ଦିତା କରୁଥିବା ଜୋ ବିଡେନଙ୍କ ବଡ଼ ଘୋଷଣା । ‘କ୍ଷମତାକୁ ଆସିଲେ ସମସ୍ତ ଆମେରିକାବାସୀଙ୍କୁ ମାଗଣାରେ ଦେବେ କୋରୋନା ଟିକା’ । ଏଭଳି ପ୍ରତିଶୃତି ଦେଇଛନ୍ତି ବିଡେନ୍ । ଏହା ପୂର୍ବରୁ ବିହାରରେ ମଧ୍ୟ ସମାନ ରୂପକ ଘୋଷଣା ହୋଇଥିଲା । ବିଜେପି ମଧ୍ୟ କ୍ଷମତାକୁ ଆସିଲେ ବିହାରବାସୀଙ୍କୁ ମାଗଣାରେ କୋରୋନା ଟିକା ଯୋଗାଇଦେବାକୁ ପ୍ରତିଶ୍ରୁତି ଦେଇଥିଲା ।
ପ୍ରଥମ ଥର ପାଇଁ କୌଣସି ରାଜନୈତିକ ଦଳର ନିର୍ବାଚନୀ ଘୋଷଣା ପତ୍ରରେ କୋରୋନା ଟିକା ପ୍ରସଙ୍ଗ ସ୍ଥାନ ପାଇଥିବାରୁ ଏହାକୁ ନେଇ ଚର୍ଚ୍ଚା ଜୋର ଧରିଛି । ହେଲେ ଏବେ ଆମେରିକାର ଡେମୋକ୍ରାଟ ପ୍ରାର୍ଥୀ ସମାନ ଧରଣର ଘୋଷଣା କରିଛନ୍ତି । ତେବେ ଜୋ-ବିଡେନଙ୍କ ଏହି ଘୋଷଣା ପରେ ଏବେ ବିରୋଧୀମାନେ ତାଙ୍କୁ କଟାକ୍ଷ କରିଛନ୍ତି । ଆମେରିକାରେ ଏବେ ନିର୍ବାଚନ ପାଇଁ ଜୋରଦାର ପ୍ରତିଦ୍ବନ୍ଦିତା ଲାଗି ରହିଛି ।
