ୱାଶିଂଟନ: ବେଲଗାମ ହେଉଛି କୋରୋନା । ପ୍ରତ୍ୟେକ ଦିନ ହୁ ହୁ ହୋଇ ବଢି ଚାଲିଛି ସଂକ୍ରମଣ । ବିଶ୍ବରେ ଧ୍ବଂସର ଲୀଳା ଖେଲାଇଛି କୋରୋନା । ସାରା ବିଶ୍ବରେ ସଂକ୍ରମିତ ସଂଖ୍ୟା 40 ଲକ୍ଷ ଅତିକ୍ରମ କରିଛି । ମୃତ୍ୟୁବରଣ କଲେଣି 2 ଲକ୍ଷ 77 ହଜାର ଜଣ।
ତେବେ ସାମାନ୍ୟ ଆଶ୍ବସ୍ତି ଖବର, ବିଶ୍ବବ୍ୟାପୀ 13 ଲକ୍ଷ 82 ହଜାର ସୁସ୍ଥ ହୋଇଛନ୍ତି । ଏବଂ 23 ଲକ୍ଷ 52 ହଜାର 305 ଜଣଙ୍କ ଚିକିତ୍ସା ଜାରି ରହିଛି । ଏଯାଏଁ ଗୁରୁତର ସଂଖ୍ୟା 16 ହଜାର 490 ରହିଛି ।
ବିଶ୍ବରେ କୋରୋନା ଯୋଗୁଁ ସର୍ବାଧିକ ପ୍ରଭାବିତ ହୋଇଛି ବିଶ୍ବର ସବୁଠାରୁ ଶକ୍ତିଶାଳୀ ଦେଶ ଆମେରିକା । ଏଠାରେ ଦିନକୁ ଦିନ ସ୍ଥିତି ବିଗିଡିବାରେ ଲାଗିଛି । ବିଶ୍ବର ଏକ ଚତୁର୍ଥାଂଶରୁ ଅଧିକ ସଂକ୍ରମିତ ମାମଲା ଆମେରିକାରେ ରହିଛି । ମୃତ୍ୟୁର ଏକ ତୃତୀୟାଂଶ । ଗତ 24 ଘଣ୍ଟାରେ ଏଠାରେ 1568 ଜଣଙ୍କ ଜୀବନ ଯିବା ପରେ ଏଠାରେ ମୋଟ ମୃତ୍ୟୁ ସଂଖ୍ୟା 78 ହଜାର 746 ରେ ପହଞ୍ଚିଛି ।
ବିଶେଷଜ୍ଞମାନେ ଚେତାବନୀ ଦେଇଛନ୍ତି ଯେ, ସଂକ୍ରମଣର ପ୍ରକୃତ ସଂଖ୍ୟା ବହୁ ଅଧିକ ହେବାର ସମ୍ଭାବନା ରହିଛି । କାରଣ ଏବେ ବି ଅନେକ ଦେଶରେ କମ ପରୀକ୍ଷା କରାଯାଉଛି ।
