ଓଟ୍ଟାୱା: ଚୀନରେ ଦୁଇ କାନାଡିଆନ କଏଦୀଙ୍କ ଉପରେ ଲାଗିଛି ଗୁପ୍ତଚରର ଆରୋପ । ଶୁକ୍ରବାର ଚୀନର ଏହି ଆରୋପ ଖବର ଜାଣିବା ପରେ ମର୍ମାହତ ହୋଇଛନ୍ତି କାନାଡ ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡିୟୁ । ସମ୍ପୃକ୍ତ ଘଟଣାରେ ପ୍ରତିକ୍ରିୟା ଦେଇ ଟ୍ରୁଡିୟୁ କହିଛନ୍ତି କି ଗିରଫ ହେବାର 18 ମାସ ପରେ ଦୁଇ କାନାଡିଆନଙ୍କ ଉପରେ ଚୀନର ଏପରି ଗୁପ୍ତଚରର ଆରୋପ ଲଗାଇବା ତାଙ୍କୁ ଦୁଃଖିତ କରିଛି ।
ଏଥିସହ ଚୀନରେ ଗିରଫ ହୋଇଥିବା ଦୁଇ କାନାଡିଆନ ଯଥା ପୂର୍ବତନ କୂଟନୀତିଜ୍ଞ ମାଇକେଲ କୋଭରିଗ ଓ ବ୍ୟବସାୟୀ ମାଇକେଲ ସ୍ପାଭୋରଙ୍କୁ ମୁକ୍ତ କରିବା ପାଇଁ କାନାଡ ସରକାର କ’ଣ କରିପାରିବେ ବୋଲି ମଧ୍ୟ ସେ ପ୍ରଶ୍ନ କରିଛନ୍ତି । ଏହି ପ୍ରସଙ୍ଗକୁ କାନାଡା ଅତି ଗମ୍ଭୀରତାର ସହ ଗ୍ରହଣ କରିଛି ବୋଲି ଟ୍ରୁଡିୟୁ ସ୍ପଷ୍ଟ କରିଛନ୍ତି । ଆଗରୁ ଅନେକ କାନାଡିଆନଙ୍କୁ ମୁକ୍ତ କରିଯାଇଥିବା ବେଳେ ଦୁଇ ମାଇକେଲଙ୍କୁ କିପରି ମୁକ୍ତ କରିହେବ ସେନେଇ ଏବେ ସେ ଚିନ୍ତାରେ ରହିଛନ୍ତି ।
ଏଥିପାଇଁ ସମସ୍ତ ସମ୍ଭବ ଚେଷ୍ଟା କରିବା ସହ ଯଥାଶୀଘ୍ର ସେମାନଙ୍କୁ ମୁକ୍ତ କରି ଚୀନର ମନମାନିର କଡା ଜବାବ ଦେବା ପାଇଁ କାନାଡ ପ୍ରସ୍ତୁତ ଥିବା ଟ୍ରୁଡିୟୁ ମତ ଦେଇଛନ୍ତି । ଏହି ଘଟଣା ଉପପ୍ରଧାନମନ୍ତ୍ରୀ କ୍ରିଷ୍ଟିଆ ଫ୍ରିଲାଣ୍ଡ ମଧ୍ୟ କ୍ଷୋଭ ପ୍ରକାଶ କରି ନିଜ ଦୁଃଖ ଜାହିର କରିଛନ୍ତି । ତେଣୁ ସମ୍ପୃକ୍ତ ଦୁଇ କାନାଡିଆନ ସ୍ବଦେଶ ନଫେରିବା ଯାଇଁ କାନାଡା ଶାନ୍ତିରେ ବସିବ ନାହିଁ ବୋଲି ସେ କହିଛନ୍ତି ।
ସୂଚନା ମୁତାବକ 2018 ଡିସେମ୍ବରରେ କାନାଡାର ଭାନକୁଭରରେ ଚାଇନିଜ କମ୍ପାନୀ ହୁୱେଇର ପ୍ରତିଷ୍ଠାତାଙ୍କୁ ଗିରଫ କରାଯାଇଥିଲା । ଆମେରିକାର ଅନୁରୋଧକ୍ରମେ ଇରାନିଆନ ନେଣଦଣ ନୀତି ଉଲଙ୍ଘନ ଅଭିଯୋଗରେ ତାଙ୍କୁ ଗିରଫ କରାଯାଇଥିଲା । ଯାହାର ଠିକ୍ 9 ଦିନ ପରେ ଚୀନରେ ଦୁଇ କାନାଡିଆନଙ୍କୁ ବିନା କାରଣରେ ଗିରଫ କରାଯାଇଥିଲା । ସେମାନଙ୍କୁ 18ମାସ ଧରି ପ୍ରତାଡିତ କରିବା ପରେ ଗତ ଶୁକ୍ରବାର ସେମାନଙ୍କ ବିରୋଧରେ ଗୁପ୍ତଚରର ଆରୋପ ଲଗାଇଥିଲା ଚୀନ । ଯାହା ଚୀନର ଏକ ପ୍ରତିଶୋଧ ପରାୟଣ କାର୍ଯ୍ୟ ବୋଲି ସନ୍ଦେହ କରାଯାଉଛି ।
@IANS
