ମୁମ୍ବାଇ: ବଲିଉଡର ଲୋକପ୍ରିୟ ତଥା ପାଓ୍ବର କପଲ କୁହାଯାଉଥିବା ରଣଭୀର ସିଂ ଏବଂ ଦୀପିକା ପାଦୁକୋନ୍ ଖୁବ୍ ଶୀଘ୍ର ଶାହାରୁଖ ଖାନ୍ ଏବଂ ସଲମାନ ଖାନଙ୍କ ପଡ଼ୋଶୀ ହେବାକୁ ଯାଉଛନ୍ତି । ରଣଭୀର ସିଂ ସାଗର ରେଶମ୍ ରେସିଡେନ୍ସିଆଲ୍ ଟାୱାରରେ ଏକ ବିଳାସପୂର୍ଣ୍ଣ ଆପାର୍ଟମେଣ୍ଟ କିଣିଛନ୍ତି । ଏହି ଘର ମାଧ୍ୟମରେ ସେମାନଙ୍କୁ ବ୍ୟାଣ୍ଡଷ୍ଟାଣ୍ଡରୁ ଆରବିଆନ୍ ସି'ର ସୁନ୍ଦର ଦୃଶ୍ୟ ଦେଖିବାକୁ ମିଳିବ ।
ରଣଭୀର-ଦୀପିକାଙ୍କ ନୂଆ ଘର
ରଣଭୀର ସିଂ ଏକ ନୂଆ ଘର କିଣିଛନ୍ତି । ଯଦିଓ ଏହି ଆପାର୍ଟମେଣ୍ଟ ଏବେ ନିର୍ମାଣ ଚାଲିଛି । ସେ ଯେଉଁ ଆପାର୍ଟମେଣ୍ଟ ସହିତ ଡିଲ୍ କରିଛନ୍ତି, ସେଠାରୁ ସମୁଦ୍ରର ସୁନ୍ଦର ଦୃଶ୍ୟ ଦେଖିବାକୁ ମିଳିବ । ଖବର ଅନୁଯାୟୀ, ଅଭିନେତା ଏହି ଘରକୁ ପ୍ରାୟ 119 କୋଟି ଟଙ୍କାରେ କିଣିଛନ୍ତି । ଖାସ୍ କଥା ହେଉଛି ଏହି ଆପାର୍ଟମେଣ୍ଟ ଶାହାରୁଖ ଖାନଙ୍କ ମନ୍ନତ ଏବଂ ସଲମାନ ଖାନଙ୍କ ଗାଲାକ୍ସି ଆପାର୍ଟମେଣ୍ଟ ମଝିରେ ପଡିବ । କୁହାଯାଉଛି ଯେ ତାଙ୍କ ଆପାର୍ଟମେଣ୍ଟ ଟାୱାରର 16, 17, 18 ଏବଂ 19 ମହଲାରେ ଅବସ୍ଥିତ । ଏହାର ମୋଟ କାର୍ପେଟ ଏରିଆ 11,266 ବର୍ଗଫୁଟ ଏବଂ 1300 ବର୍ଗଫୁଟର ଏକ ସ୍ୱତନ୍ତ୍ର ଛାତ ରହିଛି । ପ୍ରକାଶ ଯେ, ରଣଭୀରଙ୍କୁ ଏହି ଘର ସହିତ 19 ଟି ପାର୍କିଂ ସ୍ଥାନ ଦିଆଯାଇଛି ।
ଦାମୀ ସମ୍ପତ୍ତିର ମାଲିକ ରଣଭୀର ସିଂ
ସମ୍ପତ୍ତିର ମୂଲ୍ୟ ବିଷୟରେ କହିବାକୁ ଗଲେ, ସେଠାରେ ପ୍ରତି ବର୍ଗ ଫୁଟର ମୂଲ୍ୟ 1 ଲକ୍ଷ ଟଙ୍କା । ରଣଭୀର ଏହି ଘରକୁ ଓହ ଫାଇଭ୍ ମିଡିଆ ୱାର୍କସ LLP ର ମାଧ୍ୟମରୁ କିଣିଛନ୍ତି, ଯେଉଁଥିରେ ଖୋଦ୍ ରଣଭୀର ଏବଂ ତାଙ୍କ ପିତା ନିର୍ଦ୍ଦେଶକ ଅଟନ୍ତି । ରଣଭୀର ଏହି ଘର ପାଇଁ ରାଜସ୍ୱ ବିଭାଗକୁ 7.13 କୋଟି ଷ୍ଟାମ୍ପ ଡ୍ୟୁଟି ମଧ୍ୟ ଦେଇଛନ୍ତି ।
ଅଭିନେତାଙ୍କ କାମ ବିଷୟରେ କହିବାକୁ ଗଲେ, ରଣଭୀରଙ୍କୁ ନିକଟରେ ଜୟଶଭାଇ ଜୋରଦାର ଫିଲ୍ମରେ ଦେଖିବାକୁ ମିଳିଥିଲା । ନିକଟରେ ବିୟର ଗ୍ରିଲ୍ସଙ୍କ ସହ Man vs. Wildର ଏପିସୋଡ୍ ମଧ୍ୟ ଷ୍ଟ୍ରିମ୍ ହୋଇଛି । ଅଭିନେତାଙ୍କ ପରବର୍ତ୍ତୀ ଚଳଚ୍ଚିତ୍ର ରୋହିତ ଶେଟ୍ଟୀଙ୍କ ସର୍କସ ହେବାକୁ ଯାଉଛି । ଏଥି ସହିତ କରଣ ଜୋହରଙ୍କ ରକି ଔର୍ ରାନୀ କି ପ୍ରେମ କାହାଣୀ ମଧ୍ୟ ଖୁବ ଶୀଘ୍ର ମୁକ୍ତିଲାଭ କରିବ । ଏହି ଚଳଚ୍ଚିତ୍ରର ପ୍ରମୋସନ ସେ କଫି ଓ୍ବିଥ କରଣରେ ସୋ'ରେ ପ୍ରମୋଟ୍ କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
