ନ୍ୟୁୟର୍କ: ହଲିଉଡ ଅଭିନେତା ଜେସନ ଡେଭିଡ ଫ୍ରାଙ୍କ (Jason David Frank Death)ଙ୍କର ଦେହାନ୍ତ ହୋଇଛି । ମୃତ୍ୟୁ ବେଳକୁ ତାଙ୍କୁ 49 ବର୍ଷ ବୟସ ହୋଇଥିଲା । ତାଙ୍କ (Jason David) ମୃତ୍ୟୁକୁ ତାଙ୍କ ପ୍ରତିନିଧୀ ଜଷ୍ଟିନ ହଣ୍ଟ ନିଶ୍ଚିତ କରିଛନ୍ତି । ସେ ଏକ ବିବୃତ୍ତିରେ କହିଛନ୍ତି, “ଜେସନ ନାମକ ଜଣେ ଉତ୍ତମ ବ୍ୟକ୍ତିଙ୍କର ଦେହାନ୍ତ ହୋଇଛି । ତାଙ୍କ ଦେହାନ୍ତରେ ପରିବାର ସଦସ୍ୟ ଏବଂ ଘନିଷ୍ଠ ବନ୍ଧୁ ଦୁଃଖରେ ଭାଙ୍ଗି ପଡିଛନ୍ତି । ଦୟାକରି ଏହି ଦୁଃଖର ସମୟରେ ତାଙ୍କ ପରିବାର ଏବଂ ସାଙ୍ଗମାନଙ୍କ ଗୋପନୀୟତାକୁ ସମ୍ମାନ ଦିଅନ୍ତୁ।" ତେବେ ପ୍ରତିନିଧୀ ଜେସନଙ୍କ ମୃତ୍ୟୁର କାରଣ ଦର୍ଶାଇ ନାହାଁନ୍ତି ।
ଜଷ୍ଟିନ ହଣ୍ଟ ଟିଏମଜେଡକୁ ଦେଇଥିବା ବିବୃତ୍ତିରେ କହିଛନ୍ତି, “ଜେସନଙ୍କୁ ତାଙ୍କ ପରିବାର, ବନ୍ଧୁ ଏବଂ ପ୍ରଶଂସକମାନେ ଭଲ ପାଉଥିଲେ। ସେମାନେ ବର୍ତ୍ତମାନ ତାଙ୍କୁ ମିସ୍ କରିବେ। 'ମାଇଟି ମର୍ଫିନ୍ ପାୱାର ରେଞ୍ଜର୍ସ' ସିରିଜରେ ବ୍ଲାକ୍ ପାୱାର୍ ରେଞ୍ଜର ଭୂମିକାରେ ଅଭିନୟ କରିଥିବା ୱାଲ୍ଟର ଇମାନୁଏଲ୍ ଜୋନ୍ସ ତାଙ୍କ ମୃତ୍ୟୁକୁ ନେଇ ଦୁଃଖ ପ୍ରକାଶ କରିଛନ୍ତି । ଉଭୟ ଏହି ସିରିଜରେ ଏକାଠି କାମ କରିଥିଲେ ।
ୱାଲ୍ଟର ଇମାନୁଏଲ୍ ଜୋନ୍ସ ଇନଷ୍ଟାଗ୍ରାମରେ ପାୱାର ଓପ ରେଞ୍ଜର୍ସର ପ୍ରମୋସନ ସମୟରେ ଏକ ଥ୍ରୋବ୍ୟାକ୍ ଫଟୋ ସେୟାର କରି ଲେଖିଛନ୍ତି, "ଏହାକୁ ବିଶ୍ବାସ କରିପାରିବି ନାହିଁ ... ଜେସନ ଡେଭିଡ ଫ୍ରାଙ୍କ ଆତ୍ମାକୁ ଶାନ୍ତି ମିଳୁ... ମୋ ପରିବାରର ଆଉ ଜଣେ ସଦସ୍ୟଙ୍କୁ ହରାଇ ମୋ ହୃଦୟ ଭାଙ୍ଗି ପଡିଛି ।" ସେ ତାଙ୍କ କ୍ୟାପସନରେ ହ୍ୟାଣ୍ଡ ଫୋଲଡ୍ ଇମୋଜି ଏବଂ ହ୍ୟାସଟ୍ୟାଗ୍ ଗ୍ରୀନ୍ ରେଞ୍ଜର ବ୍ୟବହାର କରିଛନ୍ତି ।
ଜେସନ ମଧ୍ୟ ମିକ୍ସ ମାର୍ଶଲ କଳାକାର ଥିଲେ
ଆମେରିକୀୟ ଅଭିନେତା ଜାସନ ଡେଭିଡ ଫ୍ରାଙ୍କ ମଧ୍ୟ ମିକ୍ସ ମାର୍ଶଲ କଳାକାର ଥିଲେ । ସେ 'ମାଇଟି ମାର୍ଫିନ୍ ପାୱାର ରେଞ୍ଜର୍ସ'ରେ ଟମି ଓଲିଭର ଓରଫ୍ ଗ୍ରୀନ୍ ପାୱାର ରେଞ୍ଜରଙ୍କ ଭୂମିକାରେ ଅଭିନୟ କରି ବେଶ୍ ଜଣାଶୁଣା ଥିଲେ । ଏହି ସିରିଜର ପ୍ରିମିୟର୍ 1993 ମସିହାରେ ହୋଇଥିଲା । ତାଙ୍କର ଲୋକପ୍ରିୟତା ଦେଖି ତାଙ୍କୁ ପୁନର୍ବାର ହ୍ବାଇଟ ରେଞ୍ଜର ଏବଂ ନୂଆ ଦଳର ଲିଡର ଭାବରେ ଅଣାଯାଇଥିଲା ।
ଜେସନ୍ ଡେଭିଡ୍ ଫ୍ରାଙ୍କ ଏହି ଫ୍ରାଞ୍ଚାଇଜ୍ର ଅନେକ ସିରିଜରେ କାମ କରିଥିଲେ । 2002 ମସିହାରେ ପ୍ରଥମ ଥର ପାଇଁ ସେ ସିରିଜର ଦଶମ ବାର୍ଷିକୀର ଏକ ବିଶେଷ ସିରିଜରେ ନଜର ଆସିଥିଲେ । ତା’ପରେ 2004 ମସିହାରେ ମଧ୍ୟ ଏହି ସିରିଜର ପରବର୍ତ୍ତୀ ଭାଗରେ ନଜର ଆସିଥିଲେ । ଏହା ବ୍ୟତୀତ ସେ ସମାନ ସିରିଜର ଆନିମେସନ୍ ସିରିଜ୍ ପାଇଁ ସ୍ୱର ଦେଇଥିଲେ । 2017 ମସିହାରେ, ସେ 'ପାୱାର ରେଞ୍ଜର୍ସ ରିମେକ୍'ରେ ଏକ କ୍ୟାମୋ କରିଥିଲେ ।
