ହାଇଦ୍ରାବାଦ: 2023 ବର୍ଷର ପ୍ରଥମ ଫିଲ୍ମ ପଠାନ ସହ ଭାରତରେ ଦମଦାର ପ୍ରଦର୍ଶନ କରିଥିଲେ ବଲିଉଡ କିଙ୍ଗ ଖାନ ଶାହାରୁଖ ଖାନ। ବର୍ତ୍ତମାନ ଶାହାରୁଖଙ୍କ ଏହି ବର୍ଷର 2ୟ ଫିଲ୍ମ ଜବାନ ରିଲିଜ ହେବାକୁ ଯାଉଛି। ଯାହାକୁ ଫ୍ୟାନ୍ସ ଉତ୍ସାହର ସହ ଅପେକ୍ଷା କରିଛନ୍ତି । ଫିଲ୍ମ 'ଜବାନ' ରିଲିଜ୍ ପାଇଁ ମାତ୍ର 10 ଦିନ ବାକି ଅଛି । ଏହାପୂର୍ବରୁ ଶାହାରୁଖ ଖାନ ପୁଣିଥରେ ତାଙ୍କର 1000 କୋଟି ଚଳଚ୍ଚିତ୍ର 'ପଠାନ' ସହ ଲାଇମ ଲାଇଟକୁ ଆସିଛନ୍ତି । ଦୁନିଆର ଅନେକ ଦେଶରେ ଧମାକା କରିବା ପରେ ଏବେ ଫିଲ୍ମ ଜାପାନରେ ରିଲିଜ ହେବାକୁ ଯାଉଛି। ଏବଂ ଏହା ଜବାନସହ ରିଲିଜ ହେବାକୁ ଯାଉଛି ।
ଚଳଚ୍ଚିତ୍ର ପଠାନ ଘରୋଇ ବକ୍ସ ଅଫିସରେ 525 କୋଟି ଏବଂ ବିଶ୍ବରେ 1000 କୋଟିରୁ ଅଧିକ ବ୍ୟବସାୟ କରିଥିଲା । ବର୍ତ୍ତମାନ ପଠାନ ଜାପାନରେ ମୁକ୍ତିଲାଭ କରିବାକୁ ଯାଉଛି । ଏହି ଚଳଚ୍ଚିତ୍ର ଜାପାନର 78ଟି ପରଦାରେ ମୁକ୍ତିଲାଭ କରିବ ଏବଂ ସେହି ସମୟରେ ପଠାନ ଫିଲ୍ମର ଜାପାନୀ ପୋଷ୍ଟର ରିଲିଜ ହେବ । ଏଠାରେ ଫିଲ୍ମ ସେପ୍ଟେମ୍ବର 1ରେ ରିଲିଜ ହେବାକୁ ଯାଉଛି । ସେପଟେ ଶାହାରୁଖ ଖାନଙ୍କ ବହୁ ପ୍ରତୀକ୍ଷିତ ଚଳଚ୍ଚିତ୍ର ଜବାନ ସେପ୍ଟେମ୍ବରରେ ମୁକ୍ତିଲାଭ କରିବ । ଟ୍ରେଡ୍ ଆନାଲିଷ୍ଟ ତରଣ ଆଦର୍ଶ ଟ୍ବିଟରରେ ଜାପାନରେ ପଠାନ ରିଲିଜ ହେବା ନେଇ ସୂଚନା ଦେଇଛନ୍ତି ।
ଜାପାନରେ ପଠାନ ରିଲିଜ ହେବା ନେଇ ଏକ ଭିନ୍ନ କ୍ରେଜ୍ ଦେଖିବାକୁ ମିଳୁଛି । ଏଥିସହିତ ଶାହାରୁଖ ଖାନଙ୍କ ଲକ୍ଷ ଲକ୍ଷ ପ୍ରଶଂସକ ଜବାନ ଫିଲ୍ମକୁ ଅପେକ୍ଷା କରିଛନ୍ତି । ଆଜି ଫିଲ୍ମର ଟ୍ରେଲର ରିଲିଜ ହେବାର ଥିଲା । ହେଲେ ଖବର ଲେଖା ହେବା ସୁଦ୍ଧା ଟ୍ରେଲର ରିଲିଜ ହୋଇନାହିଁ । ସେପଟେ ସୂଚନା ମୁତାବକ, ଶାହାରୁଖ ଦୁବାଇରେ ଫିଲ୍ମର ଟ୍ରେଲର ଲଞ୍ଚ କରିବାକୁ ଯାଉଛନ୍ତି । ସେପ୍ଟେମ୍ବର 1ରେ ଦୁବାଇର ଏକ ଗ୍ରାଣ୍ଡ ଇଭେଣ୍ଟରେ ଫିଲ୍ମର ଟ୍ରେଲର ଲଞ୍ଚ କରାଯିବ । ତେବେ ଆସନ୍ତାକାଲି ଫିଲ୍ମର 3ୟ ଗୀତ ରମାୟା ଭସ୍ତାଭିୟା ରିଲିଜ ହେବ । ପ୍ରଥମ ଗୀତ ଜିନ୍ଦା ବନ୍ଦା ଏବଂ ଦ୍ବିତୀୟ ଗୀତ ଚଲେୟା ପୂର୍ବରୁ ରିଲିଜ ହୋଇସାରିଥିବା ବେଳେ ଦର୍ଶକ ଏହାକୁ ବେଶ ପସନ୍ଦ କରିଛନ୍ତି ।
ଏହା ମଧ୍ୟ ପଢନ୍ତୁ: ଶାହାରୁଖଙ୍କ ଉପରେ ଭାରି ପଡିବେ କି ବାହୁବଲୀ ? ସାମ୍ନାକୁ ଆସିଲା ନୂଆ ଟ୍ବିଷ୍ଟ
ଫିଲ୍ମ 'ପଠାନ୍' ସିଦ୍ଧାର୍ଥ ଆନନ୍ଦଙ୍କ ନିର୍ଦ୍ଦେଶିତ ଫିଲ୍ମ ହୋଇଥିବା ବେଳେ ଏହା ଏକ ଆକ୍ସନ ଚଳଚ୍ଚିତ୍ର ଅଟେ । ଏହି ଫିଲ୍ମର ରାଇଟର ହେଲେ ଶ୍ରୀଧର ରାଘବନ ଓ ଆବାସ ବାୟରୱାଲା । ଏଥିରେ ଅଭିନେତା ଶାହାରୁଖ ଖାନ, ଅଭିନେତ୍ରୀ ଦୀପିକା ପାଦୁକୋନ୍, ଜନ୍ ଆବ୍ରାହମ ମୁଖ୍ୟ ଭୂମିକାରେ ନଜର ଆସିଛନ୍ତି । ସେପଟେ ଜବାନ କଥା କହିବାକୁ ଗଲେ, ଅଟଲିଙ୍କ ନିର୍ଦ୍ଦେଶିତ ଫିଲ୍ମ ଜବାନରେ ଶାହରୁଖ ଖାନଙ୍କ ସମେତ ସାଉଥ ଲୋକପ୍ରିୟ ଅଭିନେତ୍ରୀ ନୟନତାରା, ବିଜୟ ସେତୁପତି ଏବଂ ସଞ୍ଜୟ ଦତ୍ତ ମୁଖ୍ୟ ଭୂମିକାରେ ନଜର ଆସିବେ। ଏହା ଏକ ଆକ୍ସନ୍-ଡ୍ରାମା ଫିଲ୍ମ ।
