ଭୁବନେଶ୍ବର: ଓଡିଆ ସିନେପ୍ରମୀଙ୍କ ପାଇଁ ଖୁସି ଖବର। ଫିଲ୍ମ ପ୍ରାଇଡରେ ରିଲିଜ ହୋଇଛି ଓଡ଼ିଆ ଚଳଚ୍ଚିତ୍ର ମନ ମ୍ୟୁଜିୟମ । ଏହି ଫିଲ୍ମ ଆଜି ଓଡ଼ିଶାର ୧୦ଟି ଜିଲ୍ଲାର ସିନେମାହଲରେ ରିଲିଜ ହୋଇଛି। ଧୃବାନନ୍ଦ ପଣ୍ଡାଙ୍କ ନିର୍ଦ୍ଦେଶିତ ଏହି ଫିଲ୍ମରେ ହଲିଉଡ଼ ସିନେମା କରିଥିବା ଓଡ଼ିଆ ଅଭିନେତା ନିହାର ନାୟକ ଓ ଉପାସନା ମୁଖ୍ୟ ଭିମିକାରେ ନଜର ଆସିଛନ୍ତି । ତେବେ ଏକ ସୁନ୍ଦର ପ୍ରେମ କାହାଣୀକୁ ନେଇ ଏହି ଫିଲ୍ମ ପ୍ରସ୍ତୁତ ହୋଇଥିବା ବେଳେ ଏହା ଦର୍ଶକଙ୍କୁ ବେଶ ଭଲ ଲାଗିବ ବୋଲି ଆଶାବାଦୀ ରହିଛନ୍ତି କଳାକାର ଏବଂ ନିର୍ମାତା ।
ସୂଚନା ଅନୁସାରେ, ଭଲପାଇବାରେ ସ୍ୱାର୍ଥ ନ ଦେଖି କି ଭବିଷ୍ୟତ ବା ବିବାହ ଉପଯୋଗୀ ବୋଲି ନ ଭାବି କେବଳ ଭଲପାଇବାର ସ୍ମୃତିକୁ ଏକ ସୁନ୍ଦର ଉପହାର ଭାବି ମନରେ କିଭଳି ସାଇତି ରଖାଯାଇଛି। ତାହା ଫିଲ୍ମରେ ଦର୍ଶାଯାଇଛି। ତେବେ ଓଡ଼ିଆ ଅଭିନେତା ନିହାର ନାୟକ ଓ ଉପାସନାଙ୍କୁ ନେଇ ପ୍ରସ୍ତୁତ ହୋଇଛି ଏହି ଫିଲ୍ମ । ଏଥିସହ ଉପାସନା ଓ ନିହାରଙ୍କ ଛୋଟ ବେଳ ଚରିତ୍ରରେ ନଜର ଆସିଛନ୍ତି ସାୟଲ ମୁଖାର୍ଜୀ ଓ ଅନିମେଷ ଘୋଷ । ଏହି ସିନେମା ସଂଗୀତ ମୋସନ ବ୍ୟାନରରେ ପ୍ରସ୍ତୁତ ହୋଇଥିବା ବେଳେ ଏଥିରେ ପ୍ରଯୋଜନା ଦେଇଛନ୍ତି ସଂଗୀତ ମହାନ୍ତି । ଶରତ ନାୟକ ସଂଗୀତ ନିର୍ଦ୍ଦେଶନା ଦେଇଥିବା ବେଳେ ଗୀତ ଗୁଡିକ ଶବ୍ଦରେ ସଜାଇଛନ୍ତି ବିଜୟ ମଲ୍ଲ । ଗିରିଶ ମହାନ୍ତିଙ୍କ କୋରିଓଗ୍ରାଫିରେ ସିନେମାର ଗୀତଗୁଡିକ ପ୍ରସ୍ତୁତ ହୋଇଥିବା ବେଳେ ଭରଦ୍ୱାଜ ପଣ୍ଡା କାହାଣୀ ଲେଖିଛନ୍ତି ।
ଫିଲ୍ମର କାହାଣୀ କହିବାକୁ ଗଲେ, ଭଲପାଇବାକୁ ନେଇ ନାୟକ ଜଣଙ୍କ ଏକ ସ୍ମୃତିର ଘର କରିଛନ୍ତି । ଯେଉଁଥିରେ ସେ ସାଇତି ରଖିଛନ୍ତି ପିଲାବେଳୁ ଭଲ ପାଉଥିବା ସ୍କୁଲର ସହପାଠୀ ବା ପ୍ରେମିକାଙ୍କ ଜିନିଷ । ହେୟାର କ୍ଲିପ୍ଠାରୁ ଆରମ୍ଭ କରି ପୁରୁଣା ଭଙ୍ଗା ପେନସିଲ, ସ୍କେଲ୍ ଭଳି ଅନେକ ଜିନିଷ ସେ ସାଇତି ରଖିଛନ୍ତି । ସେ ଏସବୁ ସ୍ମୃତି ତାଙ୍କୁ ପ୍ରେମକୁ ମନେ ପକାଇଥାଏ । ଯାହାକୁ ସେ କେବେ ଭୁଲିବାକୁ ଚାହାନ୍ତି ନାହିଁ । ଏଥିସହ ବହୁ ବର୍ଷ ପରେ ପୁଣି ଉଭୟ ଏକାଠି ହୋଇଛନ୍ତି । ଏହି ସୁନ୍ଦର ପ୍ରେମ କାହାଣୀଙ୍କୁ ଏଥିରେ ଦର୍ଶାଯାଇଛି। ତେବେ ଏହି ଫିଲ୍ମଟି ନିଶ୍ଚୟ ଦର୍ଶକଙ୍କ ହୃଦୟକୁ ଛୁଇଁବ ବୋଲି ଆଶା ରଖିଛନ୍ତି ପ୍ରଯୋଜାନା ସଂସ୍ଥା ଓ କଳାକାର ।
ତେବେ ଅନ୍ୟପଟେ ଓଡ଼ିଆ ସିନେମାର ସଂଜୀବନୀ ସାଜିଥିଵା ଚଳଚ୍ଚିତ୍ର ଦମନ ଓ ପ୍ରତୀକ୍ଷା ଲୋକମାନଙ୍କୁ ଓଡ଼ିଆ ସିନେମା ପ୍ରତି ପୁଣି ଥରେ ଭଲପାଇବା ଫେରାଇ ଥିବା ବେଳେ ଏହି ଫିଲ୍ମ ମଧ୍ୟ ଓଡ଼ିଆ ମୌଳିକ କଥାକୁ ନେଇ ପ୍ରସ୍ତୁତ ହୋଇଛି । ଯେଉଁଥିରେ ଖାଲି ଭଲ କାହାଣୀ ନାହିଁ ଭଲ କଳାକାର କାହାଣୀକାର ଓ ନିର୍ମାଣକାରୀ ବ୍ୟକ୍ତି ବିଶେଷ ସାମିଲ ରହିଛନ୍ତି । ତେବେ ଆଜି ରିଲିଜ ହୋଇଥିବା ଏହି ସିନେମା ପୁଣି ଥରେ ଓଡ଼ିଆ ଦର୍ଶକଙ୍କ ମନ ଜିତିବା ସହ ଓଡ଼ିଆ ସିନେମା ପ୍ରତି ଲୋକଙ୍କୁ ଆକୃଷ୍ଟ କରିବ ବୋଲି ଆଶା କରାଯାଉଛି ।
