ହାଇଦ୍ରାବାଦ: ବଲିଉଡର ପ୍ରସିଦ୍ଧ ଗୀତିକାର ତଥା ସ୍କ୍ରିପ୍ଟ ରାଇଟର ଜାଭେଦ ଅଖତରଙ୍କୁ ମୁମ୍ବାଇ କୋର୍ଟର ସମନ । ଆସନ୍ତା ଫେବୃଆରୀ 6ରେ କୋର୍ଟରେ ହାଜର ହେବାକୁ ନିର୍ଦ୍ଦେଶ ଦିଆଯାଇଛି । ଆରଏସ୍ଏସ୍ ବିରୁଦ୍ଧରେ ଦେଇଥିବା ମନ୍ତବ୍ୟକୁ ନେଇ କୋର୍ଟ ତାଙ୍କୁ ସମନ କରିଛନ୍ତି ।
ସୂଚନା ଥାଉକି, ସେପ୍ଟେମ୍ବର 2021ରେ ଏକ ବ୍ୟକ୍ତିଗତ ସାକ୍ଷାତକାରରେ ଜାଭେଦ ଅଖତର ଆରଏସ୍ଏସ୍ ବିରୁଦ୍ଧରେ ବିବାଦୀୟ ମନ୍ତବ୍ୟ ଦେଇଥିଲେ । ଏହି ମାମଲାରେ ହାଜର ହେବାକୁ କୋର୍ଟ ପକ୍ଷରୁ ତାଙ୍କୁ ନୋଟିସ ଦିଆଯାଇଛି । ଗତ ବର୍ଷ ଅକ୍ଟୋବରରେ ଭାରତୀୟ ଦଣ୍ଡବିଧି ସଂହିତା (ଆଇପିସି)ର ଧାରା 499 (ମାନହାନୀ) ଏବଂ 500 (ମାନହାନୀ ପାଇଁ ଦଣ୍ଡ) ଅଧୀନରେ ଆଡଭୋକେଟ ସନ୍ତୋଷ ଦୁବେ ଜାଭେଦ ଅଖତରଙ୍କ ବିରୋଧରେ ମକଦ୍ଦମା ଦାୟର କରିଥିଲେ ।
ଜାଭେଦ ଅଖତର ବିରୋଧରେ ଅଭିଯୋଗ ହୋଇଥିଲା କି, ସେ ଏକ ସାକ୍ଷାତକାରରେ ଆରଏସଏସ ଏବଂ ତାଲିବାନର ତୁଳନା କରିଥିଲେ । ଆରଏସଏସ ସମର୍ଥକ ବୋଲି ଦାବି କରୁଥିବା ଅଭିଯୋଗକାରୀ ଅଭିଯୋଗ କରିଥିଲେ ଯେ ଜାଭେଦ ଅଖତର ନାଗପୁର-ମୁଖ୍ୟାଳୟ ସଂଗଠନର ନାମକୁ ରାଜନୈତିକ ଲାଭ ପାଇଁ ବିବାଦ ଭିତରକୁ ଟାଣି ନେଇଛନ୍ତି ଏବଂ ଏହାକୁ ବ୍ୟବସ୍ଥିତ ବଦନାମ କରିଛନ୍ତି ।
ଆଡଭୋକେଟ୍ ଦୁବେ ଅଭିଯୋଗ କରିଛନ୍ତି ଯେ, ‘‘ସାକ୍ଷାତକାର ସମୟରେ ଜାଭେଦ୍ ଅଖତରଙ୍କ ବିବୃତ୍ତି ଆରଏସଏସକୁ ବଦନାମ କରିବା ସହିତ ସଂଗଠନରେ ଯୋଗ ଦେବାକୁ ଇଚ୍ଛା କରୁଥିବା ଲୋକଙ୍କୁ ନିରାଶ କରିବା ତଥା ବିଭ୍ରାନ୍ତ କରିବା ପାଇଁ ଏକ ଯୋଜନାବଦ୍ଧ ପଦକ୍ଷେପ ।’’
