ମୁମ୍ବାଇ: ଆଜି ବଲିଉଡ ଅଭିନେତ୍ରୀ କିଆରା ଆଡଭାନୀ ଆଡଭାନୀଙ୍କ ମାଆ ଜେନେବିବ ଆଡଭାନୀଙ୍କ ଜନ୍ମଦିନ । ଏହି ଅବସରରେ ସେ ନିଜ ବିବାହ ସମୟରେ ନିଜ ମା'ଙ୍କ ସହ ଉଠାଇଥିବା କିଛି ସୁନ୍ଦର ଫଟୋକୁ ନିଜ ଅଫିସିଆଲ ଇନଷ୍ଟାଗ୍ରାମ ଆକାଉଣ୍ଟରେ ସେୟାର କରିଛନ୍ତି । ଏଥିସହ ସେ ଦିଲ ଭଳି ଇମୋଜି ସହ କ୍ୟାପସନରେ ଲେଖିଛନ୍ତି, ମମ୍ମା, ମୋରୀ ପ୍ୟାରୀ, ମୋର ଦେଖାଶୁଣା କରିବା, ମୋ ପାଇଁ ପ୍ରାର୍ଥନା କରିବା ମା'ଙ୍କୁ ଜନ୍ମଦିନର ଶୁଭେଚ୍ଛା । ମୁଁ ତୁମର ଝିଅ ହୋଇଥିବାରୁ ନିଜକୁ ଧନ୍ୟ ମନେ କରୁଛି ।
ତେବେ ବଲିଉଡ ଅଭିନେତ୍ରୀ କିଆରା ଆଡଭାନୀ ଫେବୃୟାରୀ 7ରେ ନିଜ ବୟଫ୍ରେଣ୍ଡ ଅଭିନେତା ସିଦ୍ଧାର୍ଥ ମଲହୋତ୍ରାଙ୍କୁ ବିବାହ କରିଥିଲେ । ସିଡ-କିଆରାଙ୍କ ବିବାହ ଜୈସଲମେରର ସୂର୍ଯ୍ୟଗଢ ପ୍ୟାଲେସରେ ପରିବାର ସଦସ୍ୟ, ସାଙ୍ଗସାଥୀଙ୍କ ଉପସ୍ଥିତିରେ ହୋଇଥିଲା । ପରେ ମୁମ୍ବାଇ ଓ ଦିଲ୍ଲୀରେ ଉଭୟ ବଡ଼ ରିସେପସନର ଆୟୋଜନ କରିଥିଲେ । ଏହାପରେ ସେ ନିଜ ବିବାହ ସମୟର ସୁନ୍ଦର ଫଟୋ ଗୁଡିକୁ ସୋସିଆଲ ମିଡ଼ିଆରେ ସେୟାର କରୁଥିବାର ଦେଖିବାକୁ ମିଳିଛି । ସେହିପରି ଆଜି ନିଜ ମା'ଙ୍କ ଜନ୍ମଦିନରେ ବିବାହ ସମୟର ନିଜ ମା'ଙ୍କ ସହ ଉଠାଇଥିବା କିଛି ଫଟୋକୁ ସେୟାର କରି ଶୁଭେଚ୍ଛା ଜଣାଇଛନ୍ତି ।
ଏହି ଫଟୋରେ ମା'-ଝିଅଙ୍କ ନୀବିଡ଼ ସମ୍ପର୍କ ଦେଖିବାକୁ ମିଳିଛି । ପ୍ରଥମ ଫଟୋଟି ବିବାହର ଅଟେ, ଯେଉଁଥିରେ ସେ ନିଜ ମା'ଙ୍କ ସହ ନଜର ଆସିଥିଲେ । ଦ୍ବିତୀୟରେ କିଆରାର ନିଜ ମା' ଓ ଭାଇଙ୍କ ସହ ନଜର ଆସିଛନ୍ତି । ତୃତୀୟ ଫଟୋରେ କିଆରା ତାଙ୍କ ପରିବାର ସହ ନଜର ଆସିଛନ୍ତି । ଶେଷ ଫଟୋରେ ମା'-ଝିଅଙ୍କ ଭଲ ପାଇବା ଦେଖିବାକୁ ମିଳିଛି । ଏହି ଫଟୋରେ ସେ ମାଆ ଜେନେବିବ ଆଡଭାନୀଙ୍କୁ କିସ୍ କରୁଥିବାର ନଜର ଆସିଛନ୍ତି ।
ତେବେ ପୂର୍ବରୁ ହଲଦି କାର୍ଯ୍ୟକ୍ରମର ଫଟୋ ଫ୍ୟାନ୍ସଙ୍କ ମନ ଜିତିଥିବା ବେଳେ ଉଭୟ ଯୋଡ଼ି ହଲଦି ରଙ୍ଗର ପୋଷାକରେ ନଜର ଆସିଥିଲେ । ପରେ ସିଦ୍ଧାର୍ଥ ଏବଂ କିଆରା ନିଜ ସଙ୍ଗୀତ କାର୍ଯ୍ୟକ୍ରମର 3ଟି ଫଟୋ ସେୟାର କରିଥିଲେ । ଯେଉଁଥିରେ ଉଭୟ ଯୋଡି ନାଚୁଥିବାର ନଜର ଆସିଥିଲେ । ଏହି ଫଟୋକୁ 46ଲକ୍ଷରୁ ଅଧିକ ପ୍ରଂଶସକ ଲାଇକ କରିଛନ୍ତି ।
ସୂଚନା ଥାଉ କି, ବଲିଉଡ ଅଭିନେତା ସିଦ୍ଧାର୍ଥ ମଲହୋତ୍ରାଙ୍କ ଆଗାମୀ ଚଳଚ୍ଚିତ୍ର 'ଯୋଦ୍ଧା'ରେ ନଜର ଆସିବାକୁ ଯାଉଛନ୍ତି । ସେପଟେ ଅଭିନେତ୍ରୀ କିଆରା ଆଡଭାନୀ ମଧ୍ୟ ନିଜ ଆଗାମୀ ଚଳଚ୍ଚିତ୍ର ଏକ ପ୍ରେମ କାହାଣୀ 'ସତ୍ୟପ୍ରେମର କଥା' ର ସୁଟିଂ ସାରିଛନ୍ତି । ତେବେ ଏହି ଫିଲ୍ମରେ ଅଭିନେତ୍ରୀ କିଆରା ଏବଂ ଅଭିନେତା କାର୍ତ୍ତିକ ଆର୍ଯ୍ୟନ ମୁଖ୍ୟ ଭୂମିକାରେ ନଜର ଆସିବେ ।
