ହାଇଦ୍ରାବାଦ: ଟେଲିଭିଜନର ସବୁଠାରୁ ଲୋକପ୍ରିୟ ଶୋ' ସିଆଇଡି (CID)ରେ ଫ୍ରେଡରିକ୍ସ ଭୂମିକାରେ ଅଭିନୟ କରିଥିବା ଅଭିନେତା ଦୀନେଶ ଫଡନିସଙ୍କର ପରଲୋକ । ଶୋ’ରେ ଦୟା ଭୂମିକାରେ ଅଭିନୟ କରିଥିବା ତଥା ତାଙ୍କ ସହଅଭିନେତା ଦୟାନନ୍ଦ ଶେଟ୍ଟୀ ଏନେଇ ସୂଚନା ଦେଇଛନ୍ତି । ମିଡିଆ ରିପୋର୍ଟ ଅନୁଯାୟୀ, ଦୀନେଶ ଅସୁସ୍ଥତା କାରଣରୁ ମୁମ୍ବାଇର ତୁଙ୍ଗା ହସ୍ପିଟାଲରେ ଭର୍ତ୍ତି ହୋଇଥିଲେ । ତେବେ ଚିକିତ୍ସାଧୀନ ଅବସ୍ଥାରେ ସେ ରାତି 12.08 ରେ ଶେଷ ନିଶ୍ୱାସ ତ୍ୟାଗ କରିଛନ୍ତି । ମୃତ୍ୟୁବେଳକୁ ତାଙ୍କୁ 57 ବର୍ଷ ବୟସ ହୋଇଥିଲା । ତେବେ ତାଙ୍କ ବିୟୋଗରେ ଇଣ୍ଡଷ୍ଟ୍ରିରେ ଏବଂ ପରିବାରରେ ଶୋକର ଛାୟା ଖେଳିଯାଇଛି ।
ଦୀନେଶଙ୍କ ସହ ଅଭିନେତା ଦୟାନନ୍ଦ ଶେଟ୍ଟୀ କହିଛନ୍ତି ଯେ ଦୀନେଶ ଯକୃତ, ହାର୍ଟ ଏବଂ କିଡନୀ ଜନିତ ସମସ୍ୟାରେ ପୀଡ଼ିତ ଥିଲେ ଏବଂ ତାଙ୍କର ଜଟିଳତା ଦିନକୁ ଦିନ ବଢ଼ିବାରେ ଲାଗିଥିଲା । ଦୀନେଶ ଫଡନିସଙ୍କୁ ୩୦ ନଭେମ୍ବରରୁ କାନ୍ଦିବଲିର ତୁଙ୍ଗା ହସ୍ପିଟାଲରେ ଭର୍ତ୍ତି କରାଯାଇଥିଲା । ତାଙ୍କ ସ୍ବାସ୍ଥ୍ୟାବସ୍ଥାକୁ ଦେଖି ଅଭିନେତାଙ୍କୁ ଭେଣ୍ଟିଲେଟରରେ ରଖାଯାଇଥିଲା । ତେବେ ଚିକିତ୍ସାଧୀନ ଅବସ୍ଥାରେ ସେ ଶେଷ ନିଶ୍ବାସ ତ୍ୟାଗ କରିଛନ୍ତି । ସୂଚନା ଥାଉ କି, ଆଜି ବୋରିବଲିର ଦୌଲତ ନଗର ଶ୍ମଶାନରେ ଦୀନେଶ ଫଡନିସଙ୍କ ଅନ୍ତିମ ସଂସ୍କାର କରାଯିବ ।
ଏହା ମଧ୍ୟ ପଢନ୍ତୁ: ଜଣାଶୁଣା ବଲିଉଡ ନିର୍ମାତା-ନିର୍ଦ୍ଦେଶକ ରାଜକୁମାର କୋହଲିଙ୍କ ପରଲୋକ
ଦୀନେଶ ଫଡନିସଙ୍କ କ୍ୟାରିଅର
1998ରେ ଶୋ' CID ଆରମ୍ଭ ହେବା ଦିନରୁ ଦୀନେଶ ଫଡନିସ୍ ଏଥିସହ ଜଡ଼ିତ ଥିଲେ ଏବଂ CIDର ଦୁଇ ଦଶନ୍ଧି ଯାତ୍ରା ସମୟରେ ସେ ସବୁ ଶୋ’ରେ ତାଙ୍କୁ ଦେଖିବାକୁ ମିଳିଥିଲା । ସେ ଏହି ଶୋ’ରେ ୨୦ବର୍ଷ ଧରି କାମ କରିଛନ୍ତି ଏବଂ ତାଙ୍କ ଚରିତ୍ର ସହ ଲୋକଙ୍କ ହୃଦୟରେ ନିଜର ସ୍ବତନ୍ତ୍ର ସ୍ଥାନ ସୃଷ୍ଟି କରିଛନ୍ତି । CID ରେ ଫ୍ରେଡରିକ୍ସ ଭୂମିକାରେ ଅଭିନୟ କରି ଦୀନେଶ ଘରେ ଘରେ ପରିଚିତ ହୋଇଥିଲେ । ଟିଭି ଶୋ' ବ୍ୟତୀତ ସେ ଅନେକ ଫିଲ୍ମରେ ମଧ୍ୟ କାମ କରିଛନ୍ତି । ସେ 'ସରଫରୋଶ'ରେ ଜଣେ ଇନ୍ସପେକ୍ଟର ଭୂମିକାରେ ଅଭିନୟ କରିଥିଲେ । ତାଙ୍କୁ ଫିଲ୍ମ 'ସୁପର 30' ରେ ମଧ୍ୟ ଦେଖିବାକୁ ମିଳିଥିଲା । 2000ରେ ମୁକ୍ତିଲାଭ କରିଥିବା ଫିଲ୍ମ 'ମେଲା'ରେ ମଧ୍ୟ ତାଙ୍କର କ୍ୟାମିଓ ରୋଲ ଦେଖିବାକୁ ମିଳିଥିଲା । 2001ରେ ମୁକ୍ତିଲାଭ କରିଥିବା 'ଅଫିସର'ରେ ଇନ୍ସପେକ୍ଟର ଭୂମିକାରେ ନଜର ଆସିଥିଲେ ।
