ହାଇଦ୍ରାବାଦ: କୌଣସି ଏକ ଚଳଚ୍ଚିତ୍ର ନିର୍ମାଣ କରିବା ପାଇଁ ହେଲେ ଷ୍ଟାରମାନେ ଜି ଜାନ୍ ଲଗାଇ ଦିଅନ୍ତି । ନିଜ ଚରିତ୍ରକୁ ଜୀବନ୍ତ କରିବା ପାଇଁ ସେମାନେ କଠିନ ତାଲିମ ମଧ୍ୟ ନେଇଥାନ୍ତି । ଆବଶ୍ୟକତା ଅନୁଯାୟୀ ଫ୍ୟାଶନ୍ ଏବଂ ଷ୍ଟାଇଲ୍ ଆପଣାନ୍ତି । ଏମିତି କି ସେମାନେ ଦିନରାତି ଏକଜୁଟ କରିଦିଅନ୍ତି । କିନ୍ତୁ, ଏହା ପରେ ମଧ୍ୟ କିଛି ବଲିଉଡ ତାରକା ଅଛନ୍ତି ଯେଉଁମାନେ ନିଜ ଚଳଚ୍ଚିତ୍ର ଦେଖିବାକୁ ପସନ୍ଦ କରନ୍ତିନାହିଁ । ହଁ, ଏହା ଶୁଣିବାକୁ ଆଶ୍ଚର୍ଯ୍ୟ ଲାଗିପାରେ, କିନ୍ତୁ କିଛି ତାରକା ଅଛନ୍ତି, ଯେଉଁମାନେ ଫିଲ୍ମ ରିଲିଜ୍ ହେବା ପରେ ସେମାନଙ୍କ ଚଳଚ୍ଚିତ୍ର ପ୍ରତି ଆଗ୍ରହ ଦେଖାନ୍ତି ନାହିଁ । ସେହି ତାରାକାମାନେ କିଏ, ଆସନ୍ତୁ ଜାଣିବା...
କରୀନା କପୁର ଖାନ
ବଲିଉଡର ଗସିପ୍ କୁଇନ୍ କରୀନା କପୁର ଖାନ ନିଜର ନିଖୁଣ ଅଭିନୟ ପାଇଁ ବେଶ୍ ପରିଚିତ । କିନ୍ତୁ, ଆଶ୍ଚର୍ଯ୍ୟର କଥା, ଫିଲ୍ମ ରିଲିଜ୍ ହେବା ପରେ ସେ ନିଜ ଫିଲ୍ମ ଦେଖିବାକୁ ପସନ୍ଦ କରନ୍ତି ନାହିଁ । ନିକଟରେ କରଣ ଜୋହରଙ୍କ ଚାଟ୍ ସୋ 'କଫି ଓ୍ବିଥ୍ କରଣ'ରେ ଏହାର ଖୁଲାସା କରିଥିଲେ । କରଣ ଜୋହର କରୀନାଙ୍କୁ ପଚାରିଥିଲେ କି, ‘‘ସେ ଏଥର 'ଲାଲ ସିଂ ଚଡା' ଦେଖିବେ କି ? ଏହା ପରେ କରଣ ଅମିରଙ୍କୁ କହିଥିଲେ, କରୀନା ତାଙ୍କ ଫିଲ୍ମ ଦେଖନ୍ତି ନାହିଁ । ଏମିତି କି ତାଙ୍କୁ କିଛି ଫରକ ପଡେ ନାହିଁ, ତାଙ୍କ ଫିଲ୍ମ ଚାଲିଲା କେତେ ନ ଚାଲିଲା କେତେ । ଫିଲ୍ମ ହିଟ୍ କି ଫ୍ଲପ୍ ହେଉ, ସେଥିପ୍ରତି ସେ ଧ୍ୟାନ ଦିଅନ୍ତି ନାହିଁ ।'’ କରୀନା ମଧ୍ୟ ଏହି ପ୍ରସଙ୍ଗରେ କରଣଙ୍କ ସହ ସହମତ ହୋଇଥିଲେ । ତେବେ କରୀନାଙ୍କ ବିଷୟରେ ଏହିଭଳି ସତ୍ୟ ଜାଣିବା ପରେ ଅମିର ଖାନ ଅତ୍ୟନ୍ତ ଆଶ୍ଚର୍ଯ୍ୟ ହୋଇ କରିନାଙ୍କୁ ପଚାରିଥିଲେ ଯେ 'ତୁମେ ତୁମର କାମ ଦେଖୁନାହଁ ଏବଂ ଗର୍ବର ସହିତ ଏହା ମଧ୍ୟ କହୁଛ' । ଏଥିରେ କରିନା କହିଛନ୍ତି,' ରିଲିଜ୍ର ତୁରନ୍ତ ପରେ ଦେଖେ ନାହିଁ । ମୁଁ କିଛି ଦିନ ପରେ ଦେଖେ। '
ଶାହାରୁଖ ଖାନ
ପ୍ରଶଂସକମାନେ ଅଭିନେତା ଶାହାରୁଖ ଖାନଙ୍କ ଫିଲ୍ମକୁ ଉତ୍ସାହର ସହିତ ଅପେକ୍ଷା କରିଥାନ୍ତି । କିନ୍ତୁ, ନିଜେ ଶାହାରୁଖ ଖାନ ହିଁ ନିଜ ଫିଲ୍ମ ଦେଖନ୍ତି ନାହିଁ । ଏକଥା ଶାହାରୁଖ ନିଜେ ସ୍ୱୀକାର କରିଛନ୍ତି । ଏକ ବାର୍ତ୍ତାଳାପରେ ସେ କହିଥିଲେ, ‘‘ମୋ ପାଇଁ ମୋ ଫିଲ୍ମ ପିଲା ପରି । ଯଦି ମୁଁ ଭାବିବି ମୋ ଝିଅ ଏକ୍ସ ହେବ ସେ କିନ୍ତୁ ଓ୍ବାଇ ପରି ହୁଏ, ତଥାପି ସେ ମୋ ଝିଅ ହିଁ ରହିବ । ମୁଁ ତାକୁ ସେତିକି ହିଁ ଭଲପାଇବି । ଏଥିପାଇଁ ମୁଁ ନିଜ ଚଳଚ୍ଚିତ୍ର ଦେଖେ ନାହିଁ ।’’ ଶାହାରୁଖ ଖାନଙ୍କ କହିବାନୁସାରେ, 'ମୁଁ ମୋର ଫିଲ୍ମକୁ କେବେ ସମ୍ପୂର୍ଣ୍ଣ ଦେଖି ନାହିଁ । ମୁଁ ତାଙ୍କୁ ଛୋଟ ଛୋଟ ପାର୍ଟରେ ଦେଖେ । '
ବୋମାନ ଇରାନୀ
ଅଭିନେତା ବୋମାନ ଇରାନୀ ନିଜର ନିଖୁଣ ଅଭିନୟ ପାଇଁ ବେଶ୍ ପରିଚିତ । ଯଦିଓ ସେ ସହାୟକ ଭୂମିକାରେ ଅଭିନୟ କରନ୍ତି, ତାଙ୍କ ଚରିତ୍ରଗୁଡ଼ିକ ବହୁତ ଦମଦାର ଥାଏ । ପ୍ରଶଂସକମାନେ ତାଙ୍କ ଚଳଚ୍ଚିତ୍ରକୁ ବହୁତ ପସନ୍ଦ କରନ୍ତି । କିନ୍ତୁ ବୋମନ୍ ନିଜେ ତାଙ୍କ ଫିଲ୍ମ ଦେଖନ୍ତି ନାହିଁ । ଏକ ବାର୍ତ୍ତାଳାପରେ ବୋମାନ କହିଥିଲେ, 'ମୁଁ ନିଜକୁ ନେଇ କ୍ରିଟିକାଲ ଅଟେ। ମୁଁ ନିଜକୁ ପରଦାରେ ଦେଖିପାରିବି ନାହିଁ । ଯଦି ମୁଁ ଏହା କରିବି, ମୁଁ ନିଜ ଭିତରେ ଥିବା ଅନେକ ତ୍ରୁଟି ବାହାର କରିଦେବି ।
ଇମ୍ରାନ ଖାନ
ଇମ୍ରାନ ଖାନ ଦୀର୍ଘ ଦିନ ଧରି ଫିଲ୍ମ ଜଗତରୁ ଦୂରେଇ ଯାଇଛନ୍ତି । ସେ ମଧ୍ୟ ତାଙ୍କ ଚଳଚ୍ଚିତ୍ର ଦେଖିବାକୁ ପସନ୍ଦ କରନ୍ତି ନାହିଁ । ଖବର ଅନୁଯାୟୀ, ରିଲିଜ୍ ହେବାର ଏକ ବର୍ଷ ପରେ ସେ ତାଙ୍କ ଫିଲ୍ମ 'ଜାନେ ତୁ ୟା ଜାନେ ନା' ଦେଖିଥିଲେ। ସେ କୁହନ୍ତି, 'ଯେତେବେଳେ ମୁଁ ମୋର ଚଳଚ୍ଚିତ୍ର ଦେଖେ, ସେତେବେଳେ ମୋତେ ଲାଗେ ଏହି ସିନ୍ ଆହୁରି ଭଲ ହୋଇପାରିଥାନ୍ତା । ତେଣୁ ମୁଁ ମୋର ଚଳଚ୍ଚିତ୍ର ଦେଖିବାକୁ ପସନ୍ଦ କରେ ନାହିଁ ।'
ବ୍ୟୁରୋ ରିପୋର୍ଟ, ଇଟିଭି ଭାରତ
