ରାୟଗଡା: ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ମଝିରେ ଆଉ ଗୋଟିଏ ଦିନ ବାକି ଅଛି । ନିର୍ବାଚନକୁ ନେଇ ଜୋରଦାର ପ୍ରସ୍ତୁତି ଚାଲିଛି । ପ୍ରଥମ ପର୍ଯ୍ୟାୟ ନିର୍ବାଚନ କିପରି ଶାନ୍ତିଶୃଙ୍ଖଳାରେ ସମାପନ ହେବ ସେଥିପାଇଁ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ମତଦାନ ବେଳେ ଯେପରି କୌଣସି ଅପ୍ରୀତିକର ଘଟଣା ନ ଘଟେ ସେଥିପାଇଁ ମଧ୍ୟ ସଜାଗ ରହିଛି ପୋଲିସ ବିଭାଗ । ତେବେ ପ୍ରଥମ ପର୍ଯ୍ୟାୟ ନିର୍ବାଚନକୁ ନେଇ କିପରି ପ୍ରସ୍ତୁତ ଅଛି ରାୟଗଡା ପୋଲିସ ? ଅଧିକ ଜାଣିବା ପାଇଁ ଜିଲ୍ଲାର ଅତିରିକ୍ତ ଏସପି ଭି.ଆର ରାଓଙ୍କ ଆଲୋଚନା କରିଥିଲେ ଆମ ସମ୍ବାଦଦାତା ।
ନିର୍ବାଚନକୁ ଦୃଷ୍ଟିରେ ରଖି ପୋଲିସ ପକ୍ଷରୁ ଫ୍ଲାଗ ମାର୍ଚ୍ଚକୁ ଜୋରଦାର କରାଯାଇଛି । ଜନସାଧାରଣ ଯେପରି ସୁରକ୍ଷିତ ଭାବେ ମତଦାନ କରିବେ ସେଥିପାଇଁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଥିବା ଶ୍ରୀ ରାଓ କହିଛନ୍ତି । ଅନ୍ୟପଟେ ପ୍ରଥମ ପର୍ଯ୍ୟାୟ ନିର୍ବାଚନ ଦିନ ମାଓବାଦୀଙ୍କ ପକ୍ଷରୁ ବନ୍ଦ ଡାକରା ଦିଆଯାଇଛି । ମାଓବାଦୀଙ୍କ ବନ୍ଦ ଡାକରାର କୌଣସି ପ୍ରଭାବ ପଡିବ ନାହିଁ । ତେଣୁ ନିର୍ଭୟରେ ଯାଇ ଭୋଟ୍ ଦେବାକୁ ଭୋଟରଙ୍କୁ ସେ ନିବେଦନ କରିଛନ୍ତି।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
