ଭୁବନେଶ୍ବର: ଯାହା ଆଶଙ୍କା କରାଯାଉଥିଲା ଶେଷରେ ତାହାହିଁ ହେଲା । ପୁଣିଥରେ ପାଟକୁରା ନିର୍ବାଚନକୁ ଘୁଞ୍ଚାଇଛନ୍ତି ନିର୍ବାଚନ କମିଶନ । ଆସନ୍ତା 19ରେ ପାଟକୁରା ନିର୍ବାଚନ କରିବାପାଇଁ ଦିନ ଧାର୍ଯ୍ୟ ହୋଇଥିବାବେଳେ ଆଜି ଏହାକୁ ନିର୍ବାଚନ କମିଶନ ଘୁଞ୍ଚାଇ ଦେଇଛନ୍ତି ।
ବାତ୍ୟା ‘ଫନି’ ରେ ହୋଇଥିବା କ୍ଷୟକ୍ଷତି ଓ ପୁନଃ ରୁଦ୍ଧାର କାର୍ଯ୍ୟପାଇଁ ନିର୍ବାଚନକୁ ଘୁଞ୍ଚାଇଛନ୍ତି ନିର୍ବାଚନ କମିଶନ । ତେବେ ଆସନ୍ତା 2 ମାସ ଭିତରେ ପାଟକୁରା ନିର୍ବାଚନ ପ୍ରକ୍ରିୟା ଶେଷ କରାଯିବ ଓ ପରିସ୍ଥିତି ସ୍ବାଭାବିକ ହେଲେ ନିର୍ବାଚନ କମିଶନ ନୂତନ ତାରିଖ ଧାର୍ଯ୍ୟ କରିବେ ବୋଲି ଜଣାପଡିଛି ।
ସୂଚନା ଯୋଗ୍ୟ ‘ଫନି’ ଆସିବା ପୂର୍ବରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପାଟକୁରା ନିର୍ବାଚନ ଘୁଞ୍ଚାଇବା ପାଇଁ ଦାବି କରିଥିଲେ । ଅନ୍ୟପଟେ ବିଜେପିର ଏକ ପ୍ରତିନିଧି ଦଳ ପାଟକୁରା ନିର୍ବାଚନ ନ ଘୁଞ୍ଚାଇବା ପାଇଁ ଦାବି କରିଥିଲେ । ଯାହାକୁ ନେଇ ଏକ ଅନିଶ୍ଚିତତା ଭିତରେ ଗତି କରୁଥିଲା ପାଟକୁରା ନିର୍ବାଚନ ଭାଗ୍ୟ ।
ଭୁବନେଶ୍ବରରୁ, ଜ୍ଞାନଦର୍ଶୀ ସାହୁ, ଇଟିଭି ଭାରତ
