ଖୋର୍ଦ୍ଧା: ଆରମ୍ଭ ହୋଇଯାଇଛି ଗଣତନ୍ତ୍ରର ମହାଲଢେଇ। ଆଜି ପ୍ରଥମ ପର୍ଯ୍ୟାୟରେ ରାଜ୍ୟର 217 ଜଣ ପ୍ରାର୍ଥୀଙ୍କ ଭାଗ୍ୟ ଇଭିଏମରେ ସିଲ ହୋଇଯାଇଛି । ତେବେ ଆଗାମୀ ପର୍ଯ୍ୟାୟରେ ଅନୁଷ୍ଠିତ ହେବାକୁ ଥିବା ନିର୍ବାଚନ ପାଇଁ ନେତାଙ୍କ ଅଙ୍କକଷା ଏବଂ ମିଶାଣ-ଫେଡାଣ ଜୋରସୋରରେ ଚାଲିଛି । ତୁଫାନୀ ପ୍ରଚାର ମାଧ୍ୟମରେ ଭୋଟରଙ୍କ ମନ ଜିଣିବାକୁ ପ୍ରାଣପଣେ ଉଦ୍ୟମ କରୁଛନ୍ତି ନେତାଏ । ଏପରିକି ରଣନୀତି ପ୍ରସ୍ତୁତିରେ ବ୍ୟସ୍ତ ନେତାଏ କହିଲେ ଅତ୍ୟୁକ୍ତି ହେବ ନାହିଁ ।
ତେବେ ସ୍ଥାନୀୟ ଅଞ୍ଚଳର ସମସ୍ୟାକୁ ମୁଦ୍ଦା କରି ନିର୍ବାଚନୀ ବୈତରଣୀ ପାର ହେବାକୁ ଆଶା ବାନ୍ଧିଛନ୍ତି ଚିଲିକା ନିର୍ବାଚନ ମଣ୍ଡଳୀର ବିଜେପି ପ୍ରାର୍ଥୀ ପୃଥ୍ୱୀରାଜ ହରିଚନ୍ଦନ। ‘ଇଟିଭି ଭାରତ’ର ନେତାଙ୍କୁ ପାଞ୍ଚଟି ପ୍ରଶ୍ନ କାର୍ଯ୍ୟକ୍ରମରେ ଆମ ପ୍ରଶ୍ନର ଉତ୍ତର ରଖିଛନ୍ତି ସେ । ସାରାରାଜ୍ୟରେ ଥିବା 147 ବିଧାନସଭା କ୍ଷେତ୍ର ମଧ୍ୟରେ ଚିଲିକାରେ 95 ପ୍ରତିଶତ ଭିତ୍ତିଭୂମିର ବିକାଶ ଘଟିଥିଲେ ମଧ୍ୟ ଅର୍ଥନୈତିକ ବିକାଶ ଘଟିନାହିଁ ବୋଲି ସେ କହିଛନ୍ତି ।
ସେହିପରି ସେ ଚିଲିକାକୁ ପୁନରୁଦ୍ଧାର କରି ଏକ ବିରାଟ ପର୍ଯ୍ୟଟନ ହବ କରିବା ପାଇଁ ଯୋଜନା ରଖିଛନ୍ତି। କିଭଳି ଭାବେ ସ୍ଥାନୀୟ ଯୁବକ ଓ ଯୁବତୀ ମାନେ ଦାଦନ ଖଟିବାକୁ ବାହାରକୁ ନ ଯିବେ ଏବଂ ସେମାନଙ୍କୁ କିଭଳି ଘର ପାଖରେ କାମ ମିଳିବ ସେଥିପ୍ରତି ଗୁରୁତ୍ୱ ଦେବେ ବୋଲି କହିଛନ୍ତି।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
