ବ୍ରହ୍ମପୁର: ଜମିକୁ ପାଣି, ବେକାରୀଙ୍କୁ ନିଯୁକ୍ତି, ନିଶା ନିବାରଣ, ହିଂସା ଲୋପ, ଚାଷୀଙ୍କୁ ଦୁଃଖ ଦୂର କରିବା ଏଭିଳି କିଛି ପ୍ରତିଶ୍ରୁତି ଦେଇ ଭୋଟରଙ୍କୁ ଆକୃଷ୍ଟ କରିବା କଥା କହିଛନ୍ତି ଆସିକା ଲୋକସଭା ଆସନରୁ କଂଗ୍ରେସ ଓ ସିପିଆଇଏମ ସମର୍ଥିତ ସିପିଆଇ ପ୍ରାର୍ଥୀ ରାମକୃଷ୍ଣ ପଣ୍ଡା । ଇଟିଭିର 'ପାଞ୍ଚଟି ପ୍ରଶ୍ନ ନେତାଙ୍କୁ' କାର୍ଯ୍ୟକ୍ରମରେ ସାମିଲ ହୋଇ ଗୋଟିଏ ପଦରେ କହିବାକୁ ଗଲେ ଆସିକାବାସୀଙ୍କୁ ମୌଳିକ ସୁବିଧା ଯୋଗାଇବା ଠାରୁ ଆରମ୍ଭ କରି ଦୀର୍ଘ ଦିନର ଜଟିଳ ସମସ୍ୟାକୁ ଦୂର କରିବା କଥା କହିଛନ୍ତି ।
ସୂଚନା ଯେ ଆସିକା ଲୋକସଭା ଆସନରେ ବିଜେଡିରୁ ପ୍ରମିଳା ବିଶୋୟୀ, ବିଜେପିରୁ ଅନିତା ଶୁଭଦର୍ଶିନୀ ଓ ଏମାନଙ୍କୁ କଡା ଟକ୍କର ଦେବା ପାଇଁ ସିପିଆଇରୁ ରାମକୃଷ୍ଣ ପଣ୍ଡା ମୈଦାନରେ ନିଜ ଭାଗ୍ୟ ପରୀକ୍ଷା କରୁଛନ୍ତି । ଏହି ତିନି ପ୍ରମୁଖ ରାଜନୈତିକ ଦଳର ପ୍ରାର୍ଥୀଙ୍କୁ ମିଶାଇ ମୋଟ ୮ ଜଣ ପ୍ରାର୍ଥୀ ନିର୍ବାଚନୀ ମୈଦାନକୁ ଓଲ୍ଲାଉଛନ୍ତି ।
ପିସି କାରବାର ବନ୍ଦ, ଗାଁର ବିକାଶ, ମାଫିଆ ରାଜର ବିନାଶ, ସ୍କୁଲରେ ଶିକ୍ଷକ, ଡାକ୍ତରଖାନାରେ ଡାକ୍ତର, ଔଷଧ ଯୋଗାଇବା, ଜମିକୁ ପାଣି, ବେକାରୀଙ୍କୁ ନିଯୁକ୍ତି କଥା କହିଛନ୍ତି । ଶହେ ଟଙ୍କାରେ ଶହେ ଟଙ୍କା କାମ ହେବ। ଶହେ ଟଙ୍କା ଅନେଶତ ଟଙ୍କା ହେବ ନାହିଁ ବୋଲି ଆସିକାବାସୀଙ୍କୁ ନିର୍ଭରଯୋଗ୍ୟ ପ୍ରତିଶ୍ରୁତି ଦେଇଛନ୍ତି।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
