ସମ୍ବଲପୁର: ଥାନା ପରିସରରେ ଫିନାଇଲ ପିଇ ଆତ୍ମହତ୍ୟା ଉଦ୍ୟମ କଲେ ଯୁବକ । ଏଭଳି ଘଟଣା ଦେଖିବାକୁ ମିଳିଛି ସମ୍ବଲପୁର ଜିଲ୍ଲା ହୀରାକୁଦ ଥାନା ପରିସରରେ । ସୂଚନାନୁସାରେ ତାସ ଖେଳକୁ ନେଇ ଏକ ଗୋଷ୍ଠୀ ସଂଘର୍ଷରେ ପିଣ୍ଟୁଙ୍କୁ ଏକ ଧାରୁଆ ଅସ୍ତ୍ରରେ ଆକ୍ରମଣ ହୋଇଥିଲା । ତେବେ ଏହି ଘଟଣା ନେଇ ପୋଲିସ ଉଭୟ ପକ୍ଷକୁ ଆଣି ଥାନାରେ ଅଟକ ରଖି ପଚରା ଉଚରା ପାଇଁ ଅଟକ ରଖିଥିଲା ।
ଆଉ ଏହି ସମୟରେ ପିଣ୍ଟୁଙ୍କ ପରିବାର ଲୋକେ ଆକ୍ରମଣର ଶିକାର ହୋଇଥିବା ପୀଡିତଙ୍କୁ କାହିଁକି ଥାନାରେ ଅଟକ ରଖାଯାଇଛି ବୋଲି କହିବା ସହ ଆକ୍ରମଣକାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଥିଲେ । ତେବେ ଏହି ସମୟରେ ଥାନା ପରିସରରେ ଉତ୍ତେଜନା ସୃଷ୍ଟି ହୋଇଥିଲା ।
ପରେ ପିଣ୍ଟୁ ପରିଶ୍ରା ଯିବାର ବାହାନା କରି ଥାନା ପରିସରରେ ଫିନାଇଲ ପିଇ ଦେଇଥିବା ନେଇ ଅଭିଯୋଗ ହୋଇଛି । ଏହା ପରେ ପୋଲିସ ପିଣ୍ଟୁଙ୍କୁ ବୁର୍ଲା ମେଡ଼ିକାଲରେ ଭର୍ତ୍ତି କରିଥିବା ବେଳେ ଏବେ ତାଙ୍କର ଚିକିତ୍ସା ଜାରି ରହିଥିବା ବେଳେ ସ୍ବାସ୍ଥ୍ୟବସ୍ଥା ସ୍ଥିର ରହିଛି । ତେବେ କେଉଁ ପରିସ୍ଥିତିରେ ଏହି ଘଟଣା ଘଟିଛି ତାହାର ତଦନ୍ତ ହେବ ବୋଲି ସମ୍ବଲପୁର ଏସପି ବାତୁଲା ଗଙ୍ଗାଧର ସୂଚନା ଦେଇଛନ୍ତି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
