ରାଉରକେଲା: ରାଜ୍ୟରେ ନୂଆ ପରିବହନ ଆଇନ ଲାଗୁ ହୋଇଛି । ହେଲେ ଏପର୍ଯ୍ୟନ୍ତ ରାଉରକେଲା ଆଞ୍ଚଳିକ ପରିବହନ କାର୍ଯ୍ୟାଳୟରେ ସ୍ଥାୟୀ ପରିବହନ ଅଧିକାରୀ ନିଯୁକ୍ତ ହୋଇପାରି ନାହାଁନ୍ତି । ଏପରିକି ପରିବହନ ଅଫିସରେ ଅବ୍ୟବସ୍ଥା କାରଣରୁ ସାଧାରଣ ଲୋକେ ହଇରାଣ ହେଉଥିବା ଅଭିଯୋଗ ହୋଇଛି ।
ନୂତନ ପରିବହନ ଆଇନ କାର୍ଯ୍ୟକାରୀ ହେବା ପର ଠାରୁ ରାଜ୍ୟରେ ଉତ୍ତେଜନାମୂଳକ ପରିସ୍ଥିତି ଉପୁଜିଛି । ଏପରି ସ୍ଥିତିରେ ଉପଜିଲ୍ଲାପାଳଙ୍କୁ ପରିବହନ ଅଧିକାରୀଙ୍କ ଅତିରିକ୍ତ ଦାୟିତ୍ବ ଦିଆଯାଇଛି । କାହାକୁ ସ୍ଥାୟୀ ନିଯୁକ୍ତି ପ୍ରଦାନ କରାଯାଇନାହିଁ । ଯାହାକୁ ନେଇ କାର୍ଯ୍ୟାଳୟରେ ଅବ୍ୟବସ୍ଥା ଦେଖାଯାଇଛି।
ଆରଟିଓ କାର୍ଯ୍ୟାଳୟରେ ଦଲାଲଙ୍କ ପ୍ରାଦୁର୍ଭାବ ବଢୁଥିବା ବେଳେ ବ୍ୟବସ୍ଥାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି ସାଧାରଣ ଲୋକେ । ପୂର୍ବରୁ 14 ଜଣ ଦଲାଲଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଥିବା ବେଳେ ପରେ ପୁଣି କିଛି ଦଲାଲ ସକ୍ରିୟ ଥିବା ଦେଖାଯାଇଛି । ଏପରିକି ସେମାନେ ସରକାରଙ୍କ ପକ୍ଷରୁ ନିର୍ଦ୍ଧାରିତ ଦେୟ ଠାରୁ ଦୁଇ ଗୁଣ ନେଉଥିବା ଲୋକେ ଅଭିଯୋଗ କରିଛନ୍ତି । ସେଥିପାଇଁ ସରକାର ଏ ସମ୍ପର୍କରେ ଧ୍ୟାନ ଦେବାକୁ ତଥା ଲୋକଙ୍କ ସମସ୍ୟାର ସମାଧାନ କରିବାକୁ ସେମାନେ ଦାବି କରିଛନ୍ତି।
ରାଉରକେଲାରୁ ରାଜେନ୍ଦ୍ରନାଥ ମିଶ୍ର, ଇଟିଭି ଭାରତ
