ରାଉରକେଲା: ନାବାଳିକା ଦୁଷ୍କର୍ମ ଘଟଣାକୁ ନେଇ କଂଗ୍ରେସର ବିକ୍ଷୋଭ । ବୀରମିତ୍ରପୁର ଥାନା ପରିସରରେ ନାବାଳିକା ସହିତ ଦୁଷ୍କର୍ମ ଘଟଣାକୁ ନେଇ କଂଗ୍ରେସ କମିଟି ବିକ୍ଷୋଭ ପ୍ରଦର୍ଶନ କରିଛି ଏବଂ ଦୋଷୀକୁ ତୁରନ୍ତ ଗିରଫ କରିବା ପାଇଁ ଦାବି କରିଛନ୍ତି ।
ବୀରମିତ୍ରପୁରର ପୂର୍ବତନ ବିଧାୟକ ଜର୍ଜ ତିର୍କିଙ୍କ ନେତୃତ୍ବରେ ଶତାଧିକ ଦଳୀୟ କାର୍ଯ୍ୟକର୍ତ୍ତା ମାନେ ବୀରମିତ୍ରପୁର ଥାନା ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ । ନବୀନ ପଟ୍ଟନାୟକ ବିରୋଧରେ ନାରାବାଜି ମଧ୍ୟ କରିଥିଲେ । ପୋଲିସ ଚାପରେ ନାବାଳିକାର ଗର୍ଭପାତ କରାଇବା ଘଟଣାରେ ଦୋଷୀ ପୋଲିସ ମାନଙ୍କ ସହିତ ଅନ୍ୟ ସମସ୍ତଙ୍କୁ ଗିରଫ ଦାବି କରିଛି କଂଗ୍ରେସ । ଏହା ପରେ ପୋଲିସ ମହାନିର୍ଦେଶକଙ୍କ ଉଦ୍ଦେଶ୍ୟରେ ବୀରମିତ୍ରପୁର ଏସଡିପିଓଙ୍କୁ ଦାବିପତ୍ର ପ୍ରଦାନ କରାଯାଇଛି ।
ଏହି ଦାବିପତ୍ରରେ ଥାନା ଭିତରେ ଚାଲିଥିବା କେଲେଙ୍କାରୀ ବନ୍ଦ କରିବା ସହିତ ଜଣେ ହୋମଗାର୍ଡ ସହିତ ଦୁଇ ଜଣ ବାହାର ଲୋକଙ୍କ ଭୂମିକାକୁ ମଧ୍ୟ ତଦନ୍ତ ପରିସରଭୁକ୍ତ କରିବା ଦାବି କରାଯାଇଛି ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର,ଇଟିଭି ଭାରତ
