ରାଉରକେଲା: ସାଧାରଣ ନିର୍ବାଚନରେ ଦଳୀୟ ଟିକେଟ ପାଇଁ ନେତାଙ୍କ ମଧ୍ୟରେ ଛକାପଞ୍ଝା ଲାଗି ରହିଥିବାବେଳେ କଂଗ୍ରେସ ପ୍ରାର୍ଥୀ ଭାବରେ ମୁକ୍ତିକାନ୍ତ ବିଶ୍ୱାଳଙ୍କ ନାମ ଘୋଷଣା କରାଯାଇଛି । ଯାହାକୁ ନେଇ କଂଗ୍ରେସରେ ଉଠିଛି ବିଦ୍ରୋହର ଧ୍ବନି । ଏନେଇ ଶନିବାର ରାଉରକେଲା ଉଦିତନଗର ସ୍ଥିତ ରାଧାକୃଷ୍ଣ ମନ୍ଦିରରେ କଂଗ୍ରେସ ପକ୍ଷରୁ ଏକ ବୈଠକ ଡକାଯାଇଥିଲା । ଯେଉଁଥିରେ ଦଳର ବରିଷ୍ଠ ନେତା ଓ କର୍ମୀ ଉପସ୍ଥିତ ଥିଲେ ।
ବୈଠକରେ ମୁକ୍ତିକାନ୍ତଙ୍କୁ ଟିକେଟ ଦେବାର ନିଷ୍ପତି ଉପରେ ପୁର୍ନବିଚାର କରିବାକୁ ଦାବି ହୋଇଛି । ମୁକ୍ତିକାନ୍ତ କଂଗ୍ରେସର ସଭ୍ୟ ନଥାଇ ତାଙ୍କୁ ପ୍ରାର୍ଥୀ କରାଯିବା ଘଟଣାକୁ ତୀବ୍ର ବିରୋଧ କରାଯାଇଛି । ତୁରନ୍ତ ଏହି ନିଷ୍ପତ୍ତି ଉପରେ ପୁର୍ନବିଚାର କରାନଗଲେ ସମୂହ ଇସ୍ତଫା ଦେବେ ବୋଲି ଚେତାବନି ଦେଇଛନ୍ତି ।
ସୂଚନାଯୋଗ୍ୟ, ରାଉରକେଲା ଆଇଜିଏଚକୁ ସୁପର ସ୍ପେଶାଲିଟି ହସ୍ପିଟାଲରେ ପରିଣତ କରିବା ଏବଂ ଦ୍ବିତୀୟ ବ୍ରାହ୍ମଣୀ ସେତୁ ନିର୍ମାଣ ପାଇଁ ପ୍ରଧାନମନ୍ତ୍ରୀ ମୋଦି ଘୋଷଣା କରିଥିଲେ । ମାତ୍ର ରାଉରକେଲାବାସୀଙ୍କୁ ପ୍ରତିଶ୍ରୁତି ଦେଇ ଭୂଲି ଯାଇଥିଲେ ମୋଦି । ଯାହାକୁ ମନେପକାଇବା ପାଇଁ ରାଉରକେଲାରୁ ଚାଲି ଚାଲି ଦିଲ୍ଲୀରେ ପ୍ରଧାନମନ୍ତ୍ରୀଙ୍କୁ ଦେଖା କରିବାକୁ ଯାଇ ଚର୍ଚ୍ଚାର ପରିସରକୁ ଆସିଥିଲେ ମୁକ୍ତିକାନ୍ତ ବିଶ୍ବାଳ ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
