ରାଉରକେଲା: ଗତ ବୁଧବାର ରାତିରୁ ସୁ୍ନ୍ଦରଗଡ଼ ଜିଲ୍ଲାରେ ପ୍ରବଳ ବର୍ଷା ଲାଗି ରହିଥିବାରୁ ସାଧାରଣ ଜୀବନ ଯାତ୍ରା ପ୍ରଭାବିତ ହୋଇଛି । ଯାହାଫଳରେ ବହୁ ଅଞ୍ଚଳ ସହ ଯୋଗାଯୋଗ ବିଛିନ୍ନ ହୋଇଛି । ତେବେ ଏଥିରେ ଅଧିକ ପ୍ରଭାବିତ ହୋଇଛି ବିରମିତ୍ରପୁର ନିର୍ବାଚନ ମଣ୍ଡଳୀର ନୂଆଗାଁ ଏବଂ କୁଆରମୁଣ୍ଡା ବ୍ଲକ ।
ସୂଚନା ଅନୁଯାୟୀ, ଗତ ଅଗଷ୍ଟ 15 ଓ 16 ତାରିଖରେ ହୋଇଥିବା ବର୍ଷାରେ କୋକେରମା ପଞ୍ଚାୟତର ତିନୋଟି ଗାଁ ବାହ୍ୟ ଜଗତରୁ ବିଛିନ୍ନ ହୋଇଥିଲା । ସେତେବେଳେ ବେଲତା ଗ୍ରାମକୁ ସଂଯୋଗ କରୁଥିବା ବ୍ରିଜ ଭାଙ୍ଗି ଯାଇଥିବାରୁ ଅଞ୍ଚଳବାସୀ ବିଶେଷ ପ୍ରଭାବିତ ହୋଇଥିଲେ । ଫଳରେ ସ୍କୁଲ ପିଲାମାନେ ସେଠାରେ ଉପୁଡ଼ି ପଡିଥିବା ଶିମିଳି ଗଛ ଉପରେ ଚଢ଼ି ଯିବା ଆସିବା କରୁଥିଲେ ।
ତେବେ ଗୁରୁବାର ପ୍ରବଳ ବର୍ଷାରେ ଏକ ମାତ୍ର ସହାରା ଥିବା ଶିମିଳି ଗଛଟି ମଧ୍ୟ ଭାସି ଯାଇଛି । ଯାହାଫଳରେ ଅଞ୍ଚଳବାସୀ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ବେଳେ ରୋଗୀମାନେ ମଧ୍ୟ ହସ୍ପିଟାଲ ଆସି ପାରୁନାହାନ୍ତି । ଏପଟେ ବର୍ତ୍ତମାନ ସୁଦ୍ଧା କୌଣସି ସରକାରୀ ସହାୟତା ମିଳି ପାରିନାହିଁ ।
ସେହିପରି କୁଆରମୁଣ୍ଡା ବ୍ଲକରେ ମଧ୍ୟ ଅବସ୍ଥା ସଙ୍ଗିନ । ହାତୀବାରି କୁଆରମୁଣ୍ଡା ରୋଡ଼ରେ ଥିବା ଖତମା ନାଳରେ ହଠାତ ପାଣି ଆସିଯିବାରୁ ଉକ୍ତ ରାସ୍ତା ଉପରେ 6ଫୁଟ ଉଚ୍ଚରେ ପାଣି ଚାଲୁଛି । ଏପଟେ ରାଉରକେଲା ପଟୁ ହାତୀବାରି ଅଞ୍ଚଳକୁ ଯୋଗାଯୋଗ ବିଛିନ୍ନ ହୋଇଛି । ଏଥିସହ ଦୁଇପଟରେ ଗାଡି ଗୁଡିକ ଅଟକି ରହିଛି ।
ତେବେ ଖୁବ ଶୀଘ୍ର ସରକାରୀ ସହାୟତାର ଆବଶ୍ୟକତା ରହିଥିବା ବେଳେ କେତେବେଳେ ଜିଲ୍ଲା ପ୍ରଶାସନର ନିଦ ଭାଙ୍ଗୁଛି ତାହା ଦେଖିବା ବାକି ରହିଲା ।
ରାଉଲକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
