ରାଉରକେଲା: ହାତୀ ଛୁଆର ମୃତଦେହ ଉଦ୍ଧାର । ସୁନ୍ଦରଗଡ଼ ଜିଲ୍ଲା ଦାଘୋରା ସେକ୍ସନର ଖଜୁରବାହାଲ ଗାଁ ନିକଟ ଏକ ଛୋଟ ପୋଖରୀରୁ ହାତୀ ଛୁଆର ମୃତଦେହ ଉଦ୍ଧାର ହୋଇଛି ।
ସୂଚନାଯୋଗ୍ୟ, ପୋଖରୀରେ ହାତୀ ଛୁଆଟିର ମୃତଦେହ ପଡିଥିବା ନେଇ ଗ୍ରାମବାସୀ ଦେଖିବାକୁ ପାଇଥିଲେ । ଏହାପରେ ସେମାନେ ବନ ବିଭାଗକୁ ଏନେଇ ଖବର ଦେଇଥିଲେ । ଖବର ପାଇ ବନ ବିଭାଗ କର୍ମଚାରୀ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
ଏପଟେ ପାଣିରେ ବୁଡି ହାତୀ ଛୁଆଟିର ମୃତ୍ୟୁ ଘଟିଥିବା ଅନୁମାନ କରାଯାଉଛି । ପୋଖରୀ ନିକଟ ବନ୍ଧ ପାଖରେ ଅନେକ ହାତୀର ପାଦ ଚିହ୍ନ ମଧ୍ୟ ଦେଖିବାକୁ ମିଳିଛି ।
ତେବେ କିଛି ଦିନ ପୂର୍ବରୁ ଏହି ଅଞ୍ଚଳରେ ଏକ ଚିତା ବାଘର ମୃତଦେହ କ୍ଷତାକ୍ତ ଅବସ୍ଥାରେ ରେଳ ଧାରଣ କଡ଼ରୁ ଉଦ୍ଧାର କରାଯାଇଥିଲା । ଆଜି ଆଉ ଏକ ହାତୀ ଛୁଆର ମୃତ୍ୟୁ ପରେ ବନ୍ୟଜନ୍ତୁଙ୍କ ସୁରକ୍ଷାକୁ ନେଇ ପ୍ରଶ୍ନ ଉଠିଛି ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
