ରାଉରକେଲା: ସାଧାରଣ କଥାକୁ ନେଇ ଦୁଇ ଗୋଷ୍ଠୀ ମଧ୍ୟରେ ଉତ୍ତେଜନା । ସାମାନ୍ୟ ମୁଢି କିଣା ଘଟଣାକୁ ନେଇ ସୁନ୍ଦରଗଡ଼ରେ ଦୁଇଗୋଷ୍ଠୀ ମଧ୍ୟରେ ପଥର ମାଡ ହୋଇଥିଲା । ଏଥିରେ ଦୁଇଟି ଗାଡି କ୍ଷତିଗ୍ରସ୍ତ ହୋଇଥିବାବେଳେ 2 ଜଣ ଆହତଙ୍କୁ ମେଡିକାଲରେ ଭର୍ତ୍ତି କରାଯାଇଛି ।
ସାମାନ୍ୟ ଘଟଣାକୁ କେନ୍ଦ୍ର କରି ମଙ୍ଗଳବାର ଅପରାହ୍ଣରେ ସୁନ୍ଦରଗଡ଼ ସହରରେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ପରେ ଉତ୍ତେଜନାପୂର୍ଣ୍ଣ ପରିସ୍ଥିତି ସୃଷ୍ଟି ହୋଇଛି । ଉଭୟ ପକ୍ଷରୁ ପ୍ରବଳ ଟେକା ପଥର ମାଡ କରାଯାଇଥିଲା । ଉତ୍ତେଜନା ବଢିବାରୁ 4 ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି ।
ଏସପି ସୌମ୍ୟ ମିଶ୍ରଙ୍କ ନେତୃତ୍ବରେ ପୋଲିସବାହିନୀ ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ପ୍ରୟାସ କରୁଥିବାବେଳେ ବହୁତ ସଂଖ୍ୟାରେ ପୋଲିସ ସହରରେ ମୁତୟନ କରି ପାଟ୍ରୋଲିଂ ଆରମ୍ଭ କରାଯାଇଛି । ସୂଚନାଯୋଗ୍ୟ ଯେ, ସୋମବାର CAA ଶୋଭାଯାତ୍ରା ବେଳେ ମଧ୍ୟ ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳ ଘଟି ଉତ୍ତେଜନା ଦେଖାଦେଇଥିଲା । ପୋଲିସ ପରିସ୍ଥିତି ଉପରେ ନଜର ରଖିଛି ।
ରାଉରକେଲାରୁ ରାଜେନ୍ଦ୍ରନାଥ ମିଶ୍ର, ଇଟିଭି ଭାରତ
