ସୁନ୍ଦରଗଡ: ରାଉରକେଲା ରଘୁନାଥପାଲି ପୋଲିସ ଚେକିଂ କରୁଥିବାବେଳେ 3 ଆନ୍ତଃରାଜ୍ୟ ଅପରାଧୀଙ୍କୁ ଗିରଫ କରିଛି । ଗିରଫ ଅଭିଯୁକ୍ତଙ୍କ ନିକଟରୁ 3ଟି 7mm ପିସ୍ତଲ, 20ଟି ଜୀବନ୍ତ ଗୁଳି, 35ଟି ନିଷଦ୍ଧ ଗୁଳି ( SLR), ଗୋଟିଏ କାର, ଗୋଟିଏ ବାଇକ, 6ଟି ମୋବାଇଲ ଫୋନ, 4ଟି ବୋମା ଓ ନଗଦ 50 ହଜାର ଟଙ୍କା ଜବତ କରିଛି । 2ଜଣ ଅପରାଧୀଙ୍କୁ ତରକେରା ନିକଟରୁ ଗିରଫ କରିଥିବାବେଳେ ସେମାନଙ୍କ ଠାରୁ ମିଳିଥିବା ସୂଚନା ଆଧାରରେ ଆଉ ଜଣେ ଅପରାଧିକୁ ଜଲଦା ଅଞ୍ଚଳରୁ ଗିରଫ କରିଛି । ଏହି ଅପରାଧୀମାନେ ରାଉରକେଲା ସିଭିଲ ଟାଉନସିପ ଅଞ୍ଚଳରେ କେତେକ ଶିଳ୍ପପତି ଓ ବଡବଡ ବ୍ୟବସାୟୀଙ୍କୁ ହତ୍ୟା କରିବା ଟାର୍ଗେଟରେ ଚଳପ୍ରଚଳ ହେଉଥିଲେ ବୋଲି ରାଉରକେଲା ଏସପି ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
ତେବେ ଏହି ସମସ୍ତ ଅପରାଧୀ ଝାଡଖଣ୍ଡର ଅର୍ଜୁନ ରାଣା ରାମ ନାମକ କୁଖ୍ୟାତ ଅପରାଧୀର ସହଯୋଗୀ ଭାବେ କାମ କରୁଥିଲେ ବୋଲି ଜାଣିବାକୁ ପାଇଛି ପୋଲିସ। ରଘୁନାଥପାଲି ପୋଲିସ ତରକେରା ନ୍ୟୁ ଟ୍ରକ ଟର୍ମିନାଲ ନିକଟରୁ ବଣ୍ଟି ଓରଫ ବଶିଷ୍ଟ ମହାନ୍ତି ଓ ରନି ଓରଫ ଯଜ୍ଞଶିଶ ସ୍ବାଇଁ ନାମକ ଦୁଇ ଅପରାଧୀଙ୍କୁ ଗିରଫ କରିବା ସହ ସେମାନଙ୍କ ସୂଚନା କ୍ରମେ ରାଉରକେଲା ଜଲଦାରୁ ଅମିତ କୁମାର ସାହୁ ନାମକ ଅପରାଧୀକୁ ଗିରଫ କରିଛି ।
ଏହି ଅପରାଧୀମାନେ ଆଜିକାଲି ମଧ୍ୟରେ ରାଉରକେଲା ପୋଲିସ ଜିଲ୍ଲାରେ ମୁଖ୍ୟତଃ ସିଭିଲ ଟାଉନସିପରେ ବଡ ଧରଣର ଅପରାଧିକ କାଣ୍ଡ ଘଟାଇବା ପାଇଁ ଯୋଜନା କରୁଥିଲେ ବୋଲି ପୋଲିସ ତଦନ୍ତରେ ଜଣାପଡିଛି । ତେବେ ଏମାନଙ୍କ ସହିତ ଆହୁରି 8ରୁ 10 ଜଣ ଅପରାଧୀଙ୍କ ନାମ ପୋଲିସକୁ ମିଳିଥିବା କଥା ଏସପି କହିଛନ୍ତି । ଏହି ଅପରାଧୀଙ୍କ ନାମରେ ସୁନ୍ଦରଗଡ, ସୁନ୍ଦରଗଡ ବାହାର ଜିଲ୍ଲା ଓ ଝାଡଖଣ୍ଡ ରାଜ୍ୟରେ ଏକାଧିକ ସଙ୍ଗୀନ ମାମଲା ଥିବା କଥା ଜଣାପଡିଛି ।
ତେବେ ଅଭିଯୁକ୍ତ ବଣ୍ଟି ନାମରେ କେବଳ ରାଉରକେଲା ପୋଲିସ ଜିଲ୍ଲାରେ 7ଟି ବିଭିନ୍ନ ମାମଲା ରହିଛି। ସେହିପରି ଅମିତ ଓ ରନି ନାମରେ ମଧ୍ୟ ରାଉରକେଲା ପୋଲିସ ଜିଲ୍ଲାରେ ଏକାଧିକ ମାମଲା ଥିବା କଥା ଜଣାପଡିଛି । ରଘୁନାଥପାଲି ପୋଲିସ ଆଜି ଏହି ଗିରଫ ଅଭିଯୁକ୍ତଙ୍କୁ ଦଫା 341/323/353/IPC r w 25( 1)(a)/27 ( 2) Arms Act ରେ କୋର୍ଟ ଚାଲାଣ କରିଥିବା ସୂଚନା ରହିଛି ।
ସୁନ୍ଦରଗଡରୁ ହରିହର ଦାସ ମହାପାତ୍ର, ଇଟିଭି ଭାରତ
