ରାଉରକେଲା: ସହରରେ ବିପର୍ଯ୍ୟସ୍ତ108 ଆମ୍ବୁଲାନ୍ସ ସେବା । ଅଧା ରାସ୍ତାରେ ହନ୍ତସନ୍ତ ହେଉଛନ୍ତି ରୋଗୀ । ଏପରି ଏକ ଦୃଶ୍ୟ ଦେଖିବାକୁ ମିଳିଛି ରାଉରକେଲାର ବଣାଇ ଉପଖଣ୍ଡରେ ।
କେନ୍ଦ୍ର ଓ ରାଜ୍ୟ ସରକାରଙ୍କ ମିଳିତ ଭାଗିଦାରୀରେ ଚାଲିଥିବା ରାଷ୍ଟ୍ରୀୟ ଆମ୍ବୁଲାନ୍ସ ସେବା ଯୋଜନାରେ ଗତ 5 ବର୍ଷ ପୂର୍ବରୁ 108 ଆମ୍ବୁଲାନ୍ସ ସେବା ଆରମ୍ଭ କରାଯାଇଛି। ବର୍ତ୍ତମାନ ଏହି ଆମ୍ବୁଲାନ୍ସ ଗାଡି ଗୁଡିକ ପୁରୁଣା ହୋଇଯାଇ ଥିବାବେଳେ ସ୍ବାସ୍ଥ୍ୟ ବିଭାଗ ପକ୍ଷରୁ ମରାମତି କିମ୍ବା ରକ୍ଷଣାବେକ୍ଷଣରେ ଅହେତୁକ ଅବହେଳା ଦେଖିବାକୁ ମିଳୁଛି ।
ଆମ୍ବୁଲାନ୍ସ ଅଛି କିନ୍ତୁ ଏସି କାମ କରୁନି । କାହାର ଝରକା କାଚ ନାହିଁ ତ କାହାର କବାଟରେ ରସି ବନ୍ଧା ହୋଇ ଚାଲିଛି ଆମ୍ବୁଲାନ୍ସ । 108 ଆମ୍ବୁଲାନ୍ସ ସେବା ପ୍ରହସନରେ ପରିଣତ ହୋଇଛି ।
ଏଥିରେ ଜରୁରୀକାଳୀନ ରୋଗୀଙ୍କୁ ଅନ୍ୟତ୍ର ସ୍ଥାନାନ୍ତରିତ ସମୟରେ ସେମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଏହାର ଜ୍ବଳନ୍ତ ଉଦହରଣ ଦେଖିବାକୁ ମିଳିଛି ବଣାଇଁ ଉପଖଣ୍ଡ ଚିକିତ୍ସାଳୟରେ। ବଣାଇଁ ବ୍ଲକ ଅନ୍ତର୍ଗତ ଜମକେଇ ଗ୍ରାମର ଜଣେ ରୋଗୀଙ୍କୁ(ଚନ୍ଦ୍ରାବତୀ ରଣା) ଗୁରୁତର ଅବସ୍ଥାରେ 108 ଆମ୍ବୁଲାନ୍ସ ଯୋଗେ ବଣାଇଁ ଉପଖଣ୍ଡ ଚିକିତ୍ସାଳୟରୁ ରାଉରକେଲା ସରକାରୀ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା।
ତେବେ ବଣାଇଁ ଗୁରୁଣ୍ଡିଆ ରାସ୍ତାର ତୁରାମୁରା ଗ୍ରାମ ନିକଟରେ ହଠାତ୍ ଆମ୍ବୁଲାନ୍ସଟି ଅଚଳ ହୋଇ ଆଗକୁ ଗଡି ପାରିନଥିଲା। ଫଳରେ ସେହି ରୋଗୀଙ୍କ ସମ୍ପର୍କୀୟ ଏକ ଘରୋଇ ଗାଡିରେ ତାଙ୍କୁ ସେଠାରୁ ରାଉରକେଲାକୁ ନେଇଥିଲେ। ଏହାକୁ ନେଇ ଏବେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ରାଉରକେଲାରୁ ରାଜେନ୍ଦ୍ର ପ୍ରସାଦ ମିଶ୍ର, ଇଟିଭି ଭାରତ
