ପୁରୀ: ବାହୁଡ଼ା ଯାତ୍ରାରେ ଶ୍ରୀଗୁଣ୍ଡିଚା ମନ୍ଦିରରୁ ଶ୍ରୀମନ୍ଦିରକୁ ବାହୁଡ଼ୁଛନ୍ତି ଚତୁର୍ଦ୍ଧାମୂର୍ତ୍ତି । ଏକାକାର ହୋଇଛି ରଥ ଆଉ ପଥ । ଜନ୍ମବେଦୀରୁ ଫେରିବା ବେଳେ ବଳଗଣ୍ଡି ସାହିରେ ମାଉସୀ ମା’ଙ୍କ ମନ୍ଦିର ନିକଟରେ କିଛି ସମୟର ରହି ପୋଡ଼ପିଠା ଖାଇଛନ୍ତି ତିନି ଠାକୁର ।
ଗୁଣ୍ଡିଚା ମନ୍ଦିରରୁ ସର୍ବ ପ୍ରଥମେ ମହାପ୍ରଭୁ ଶ୍ରୀ ବଳଭଦ୍ରଙ୍କ ରଥ ବାହାରି ପହଞ୍ଚିଥିଲା ମାଉସୀ ମା ମନ୍ଦିର ନିକଟରେ । ସେଠାରେ ମାଉସୀ ମା ମନ୍ଦିର ପୂଜା ପଣ୍ଡା ମାନେ ପୂର୍ବରୁ ପ୍ରସ୍ତୁତ ହୋଇଥିବା ପୋଡ଼ପିଠା ବଡ଼ ସାଆନ୍ତଙ୍କୁ ସର୍ପମଣୋହୀ କରାଇଥିଲେ । ପରେ ଦେବୀ ସୁଭଦ୍ରାଙ୍କ ଦର୍ପଦଳନ ରଥ ପହଞ୍ଚିବା ପରେ ମା ସୁଭଦ୍ରା ଓ ଚକ୍ରରାଜ ଶ୍ରୀ ସୁଦ୍ରଶନଙ୍କୁ ପୋଡ଼ପିଠା ଭୋଗ ସର୍ପମଣୋହୀ କରାଯାଇଥିଲା ।
ଶେଷରେ ଜନ୍ମବେଦୀ ଛାଡ଼ି ଗଡ଼ି ଆସିଥିଲା ମହାପ୍ରଭୁ ଜଗନ୍ନାଥଙ୍କ ରଥ ଆଉ ମାଉସୀ ମା ମନ୍ଦିର ନିକଟରେ ଅଟକି ରହିଥିଲା । ମହାପ୍ରଭୁଙ୍କୁ ମଧ୍ୟ ମାଉସୀ ମା’ଙ୍କ ହାତି ତିଆରି ପିଠା ଭୋଗ ସର୍ପମଣୋହୀ କରାଯାଇଥିଲା । କୁହାଯାଏ ଯେ ମହାପ୍ରଭୁ ଜଗନ୍ନାଥଙ୍କର ପୋଡ଼ପିଠା ଭାରି ପ୍ରିୟ, ତେଣୁକରି ସାରା ବର୍ଷ ଷାଠିଏ ପଉଟି ଭୋଗ ଖାଉଥିଲେ ମଧ୍ୟ କଳା ଠାକୁର ମନ ମାଉସୀ ମା’ଙ୍କ ହାତ ତିଆରି ସେଇ ପୋଡ଼ ପିଠାରେ ।
ପ୍ରତିବର୍ଷ ପୋଡ଼ପିଠା ଖାଇବାର ଏହି ପରମ୍ପରା କେଉଁ ଆବାହମାନ କାଳରୁ ଚଳି ଆସିଛି । ବାହୁଡ଼ାରେ ନିଜ ପ୍ରିୟ ପୁତୁରା ଝିଆରିଙ୍କୁ ପୋଡ଼ପିଠା ଖୁଆଇ ପୁଣି ଗୋଟିଏ ବର୍ଷ ପୋଡ଼ପିଠା ପରଷିବାକୁ ଅପେକ୍ଷା କରି ରୁହନ୍ତି ମାଉସୀ ମା’ ଅର୍ଦ୍ଧଶୋଷିଣୀ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
