ପୁରୀ: ଆରୋଗ୍ୟ ଲାଭ ପାଇଁ ରୋଗୀଟିଏ ଯାଇଥାଏ ଡାକ୍ତରଖାନା । କାରଣ ଡାକ୍ତରଙ୍କୁ ଭଗବାନର ଆଖ୍ୟା ଦିଆଯାଇଛି । ସେଥିପାଇଁ ତ ଧନୀ ଠାରୁ ଗରିବ ସମସ୍ତେ ଭରସା କରିଥାଆନ୍ତି ଡାକ୍ତରଙ୍କ ଉପରେ । ମାତ୍ର ଥରେ ଭାବିଲେ ହସ୍ପିଟାଲରେ ରୋଗର ଚିକିତ୍ସା ହେବା ପରିବର୍ତ୍ତେ ଯଦି ଆପଣଙ୍କ ଜୀବନ ସହ ଖେଳାଯାଏ ତେବେ ଆପଣ କାହାକୁ ଭରସା କରିବେ । ସେହିପରି ଏକ ସଙ୍ଗୀନ ଅଭିଯୋଗ ଆସିଛି ଭୁବନେଶ୍ବରର ଏକ ପ୍ରତିଷ୍ଠିତ ଘରୋଇ ହସ୍ପିଟାଲ ନାଁ ରେ ।
ପୁରୀ ଜିଲ୍ଲା ପିପିଲି ସାତଶଙ୍ଖ କଅଁର ସାହିର ବାସିନ୍ଦା ପ୍ରଦୀପ କଅଁର । ସୁସ୍ଥ ସବଳ ରହିବା ସାଙ୍ଗକୁ ରୋଜଗାର କରି ପରିବାର ଚଳାଉଥିବା ପ୍ରଦୀପ ଏବେ ଅକର୍ମଣ୍ୟ । ଏକ ଦୁର୍ଘଟଣା ପରେ ଚିକିତ୍ସା ପାଇଁ ଭୁବନେଶ୍ବରର ଏକ ଘରୋଇ ହସ୍ପିଟାଲରେ ଭର୍ତ୍ତି ହୋଇଥିଲେ । କିନ୍ତୁ ତାଙ୍କର ବାମ ପଟ କିଡନୀ ଉକ୍ତ ହସ୍ପିଟାଲର ଡାକ୍ତରମାନେ କାଢି ନେଇଥିଲେ । ସେ ଗରିବ ଓ ଅଶିକ୍ଷିତ ହୋଇଥିବାରୁ ଏହାର ଫାଇଦା ଉଠାଇ ହସ୍ପିଟାଲରେ ତାଙ୍କ କିଡନୀ କାଢି ଦିଆଯାଇଥିବା ସେ ଅଭିଯୋଗ କରିଛନ୍ତି ।
ଏନେଇ ହସ୍ପିଟାଲ ବିରୋଧରେ ବିଭିନ୍ନ ସ୍ତରରେ ଅଭିଯୋଗ କରିଥିଲେ ମଧ୍ୟ ତାଙ୍କ ଅଭିଯୋଗ କେହି ଶୁଣୁ ନଥିଲେ । ତେବେ ଖବର ପାଇବା ପରେ ଆମ 'ଇଟିଭି ଭାରତ' ପ୍ରତିନିଧି ପ୍ରଦୀପଙ୍କ ଘରେ ପହଞ୍ଚିବା ସହ ତାଙ୍କଠାରୁ ସମସ୍ତ ଘଟଣା ପଚାରି ବୁଝିଥିଲେ । ଏନେଇ ଆମ ପ୍ରତିନିଧି ଉକ୍ତ ହସ୍ପିଟାଲର କର୍ତ୍ତୃପକ୍ଷ ଏବଂ ସ୍ବାସ୍ଥ୍ୟମନ୍ତ୍ରୀ ନବ ଦାସଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ମିଳିପାରି ନାହିଁ ।
ପ୍ରଦୀପ କଅଁର ପିପିଲିରେ ଏକ କମ୍ପାନୀରେ କାମ କରୁଥିଲେ । ତେବେ 2002 ମସିହା ମେ 20 ତାରିଖରେ କମ୍ପାନୀର ଏକ ଦୁର୍ଘଟଣାରେ ତାଙ୍କ ଡାହାଣ ହାତ କଟି ଯାଇଥିଲା । ସେ ଏହାର ଚିକିତ୍ସା ପାଇଁ ଏକ ପ୍ରତିଷ୍ଠିତ ଘରୋଇ ହସ୍ପିଟାଲ ଯାଇଥିଲେ । ତେବେ ସେଠାରେ ତାଙ୍କର ଅପରେସନ ସରିବା ପରେ ସେ ଦେଖିଥିଲେ ତାଙ୍କ ପେଟ ଓ ଜଙ୍ଘ କଟାଯାଇଛି । ସେ ଡାକ୍ତରଙ୍କୁ ପଚାରିବାରୁ ଏହା ତାଙ୍କର ହାତ ସର୍ଜରୀ ପାଇଁ କରାଯାଇଥିବା ଡାକ୍ତର କହିଥିଲେ ।
ତେବେ ପରବର୍ତ୍ତୀ ସମୟରେ ତାଙ୍କର ପେଟରେ ଯନ୍ତ୍ରଣା ହେବାରୁ ଅଲ୍ଟ୍ରାସାଉଣ୍ଡ କରିଥିଲେ । ଯାହାର ରିପୋର୍ଟରେ ତାଙ୍କ ବାମ ପଟର କିଡନୀ ନଥିବା ଜଣା ପଡିଥିଲା । ଆଉ ଏହା ପୂର୍ବରୁ ସେ କେବଳ ଏକ ପ୍ରତିଷ୍ଠିତ ଘରୋଇ ହସ୍ପିଟାଲରେ ଅପରେସନ କରାଇଥିଲେ । ଏଣୁ ଉକ୍ତ ହସ୍ପିଟାଲରେ ତାଙ୍କ କିଡନୀ କାଢି ନିଆଯାଇଥିବା ପରିବାର ଲୋକେ ଅଭିଯୋଗ କରିଛନ୍ତି । ଗରିବ ଓ ଅସହାୟ ଭାବି ହସ୍ପିଟାଲ କର୍ତ୍ତୃପକ୍ଷ ଏପରି କରିଥିବାରୁ ସରକାର ତାଙ୍କୁ ସାହାଯ୍ୟ କରିବା ସହ ଉକ୍ତ ହସ୍ପିଟାଲ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ପ୍ରଦୀପ କହଁର ।
ପୁରୀରୁ ଶକ୍ତି ପ୍ରସାଦ ମିଶ୍ର ଓ ଭୁବନେଶ୍ବରରୁ ତପନ ତାସ, ଇଟିଭି ଭାରତ
