ପୁରୀ: ପିପିଲି ଉପନିର୍ବାଚନ ନେଇ ଚାଲିଛି ଘମାଘୋଟ ପ୍ରଚାର । ରବିବାର ବିଜେଡି ଦଳ ପକ୍ଷରୁ ପିପିଲି କୁଳଶେଖର ପାଟଣାରେ ଅନୁଷ୍ଠିତ ମିଶ୍ରଣ ପର୍ବ ଅୟୋଜନ କରାଯାଇଥିବା ବେଳେ ଏହି ମିଶ୍ରଣ ପର୍ବରେ ବିଭିନ୍ନ ଦଳରୁ ସ୍ଥାନୀୟ ନେତା ଓ କର୍ମୀମାନେ ମାନେ ବିଜେଡିରେ ମିଶିଛନ୍ତି । ସେହିପରି ବିଜେଡିର ଷ୍ଟାର ନେତା ମାନେ ମଧ୍ୟ ପ୍ରତି ପଞ୍ଚାୟତରେ ଡୋର ଟୁ ଡୋର କ୍ୟାମ୍ପେନ ଜାରି ରଖିଛନ୍ତି । ସେପଟେ ପିପିଲି ଡେଲାଙ୍ଗରେ ବିଜେପି ପାଇଁ ବରିଷ୍ଠ ବିଜେପି ନେତା ପ୍ରତାପ ଷଡ଼ଙ୍ଗୀ ମଧ୍ୟ ପ୍ରଚାର ପାଇଁ ମଇଦାନକୁ ଓହ୍ଲାଇଛନ୍ତି । ବିଶେଷ କରି ଆବାସ ଯୋଜନାରେ ଶାସକ ଦଳର ଦୁର୍ନୀତି, କୃଷକଙ୍କୁ ଅବହେଳା, ମହିଳାଙ୍କ ପ୍ରତି ନିର୍ଯାତନା ବୃଦ୍ଧି ଓ ରାସ୍ତାଘାଟ ଭଳି ସମସ୍ୟାକୁ ନେଇ ବିଜେପି ବିଜେଡି ବିରୋଧରେ ପ୍ରଚାର ଚଳାଇଛି ।
ତେବେ ଦୀର୍ଘ ବର୍ଷ ହେବ ପିପିଲି ନିର୍ବାଚନ ମଣ୍ଡଳୀର ଲୋକେ ଯେଉଁଭଳି ଅବହେଳିତ ଅବସ୍ଥାରେ ଅଛନ୍ତି ଚଳିତ ଉପନିର୍ବାଚନରେ ଶାସକ ବିଜେଡିକୁ ଭୋଟର ମାନେ ଉପଯୁକ୍ତ ଜବାବ ଦେବେ ବୋଲି ପ୍ରତାପ ଷଡଙ୍ଗୀ ତାଙ୍କ ପ୍ରତିକ୍ରିୟାରେ କହିଛନ୍ତି । ସେପଟେ କଂଗ୍ରେସ ବିଜେଡିର ପ୍ରଚାରକୁ ବିରୋଧ କରିବା ସହ କୋଭିଡ କଟକଣାକୁ ଉଲ୍ଲଘଂନ କରି ଶତାଧିକ କର୍ମୀଙ୍କୁ ନେଇ ଯେଭଳି ବିଜେଡି ଦଳୀୟ କାର୍ଯ୍ୟକ୍ରମ କରୁଛି ପୁଣି ପିପିଲିରେ କୋଭିଡ କାୟା ବିସ୍ତାର କରିବ ବୋଲି କଂଗ୍ରେସ କହିଛି ।
ଏନେଇ କଂଗ୍ରେସର ଏକ ପ୍ରତିନିଧି ମଣ୍ଡଳୀ ନିର୍ବାଚନ କମିସନଙ୍କୁ ଭେଟି ଶାସକ ବିଜେଡି ଦଳ କିଭଳି ଭାବେ ଖୁଲମଖୁଲା କୋଭିଡ ନିୟମର ଉଲ୍ଲଘଂନ କରି ରାଲି ଓ ସଭା ଅୟୋଜନ କରୁଛି ସେନେଇ ଅବଗତ କରିବ ବେଲି କଂଗ୍ରେସ ପକ୍ଷରୁ ସୂଚନା ମିଳିଛି । ସେପଟେ ଏହି ଘଟଣାରେ ନିର୍ବାଚନ କମିଶନ କଡା ପଦକ୍ଷେପ ଗ୍ରହଣ ନ ନେଲେ କଂଗ୍ରେସ ଏହାର ଦୃଢ ପ୍ରତିବାଦ କରିବ ବୋଲି କଂଗ୍ରେସ ନେତା ପ୍ରଦୀପ ମାଝୀ କହିଛନ୍ତି ।
ଆଉ ଏନେଇ କଂଗ୍ରେସ ଓ ବିଜେପି ଅଭିଯୋଗକୁ ନେଇ ବିଜେଡି ଜବାବ ରଖିଛି । ତେବେ ବିରୋଧୀ ପିପିଲି ଉପନିର୍ବାଚନରେ ପରାଜୟ ଜାଣି ପାରି ବିଜେଡି ବିରୋଧରେ ଅପ ପ୍ରଚାର କରୁଥିବା ବରିଷ୍ଠ ବିଜେଡି ନେତା ସମୀର ଦାସ କହିଛନ୍ତି । ଏନେଇ ଦଳ ଉପରେ କୌଣସି ପ୍ରଭାବ ପଡିବନି ପୁଣି ପିପିଲି ବାସୀ ବିଜେଡିକୁ ବିପୁଳ ଭୋଟ ଦେଇ ଜୟଯୁକ୍ତ କରାଇବା ନେଇ ମାନସିକ ସ୍ତରରେ ପ୍ରସ୍ତୁତ ହୋଇ ସାରିଥିବା ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ ସୂଚନା ଦେଇଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
