ପୁରୀ: ଜିଲ୍ଲାର ପୌରପାଳିକା ପକ୍ଷରୁ ନୂତନ ଭାବେ ଲାଗୁ ହେବାକୁ ଯାଉଛି ୟୁଜର ଫି । ଏହାର ପ୍ରତ୍ୟାହାର ଦାବିରେ ଶ୍ରୀଜଗନ୍ନାଥ ସେନା ପକ୍ଷରୁ ପୌର ପାଳିକା କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରାଯାଇଛି ।
ଶ୍ରୀଜଗନ୍ନାଥ ସେନା ଅଭିଯୋଗ କରିଛି ଯେ ପୁରୀ ପୌର ପ୍ରଶାସନ ଲୋକଙ୍କୁ ସେବା ଦେବା ବଦଳରେ ଟିକସ ଲଦୁଛି । ସହରରେ ଅଳିଆ ସଂଗ୍ରହ ପାଇଁ ନିୟୋଜିତ ଗାଡି଼ର ରକ୍ଷଣାବେକ୍ଷଣ ଓ କର୍ମଚାରୀଙ୍କ ଦରମା ପାଇଁ ଲୋକଙ୍କ ଉପରେ ୟୁଜର ଫି ଲଗାଯାଉଥିବା ବେଳେ ଲୋକଙ୍କୁ ମୌଳିକ ସୁବିଧା ଯୋଗାଇ ଦେବା ପାଇଁ ପୌର ପାଳିକା ହୋଲଡିଂ ଟ୍ୟାକ୍ସ ନେଉଛି ।
ଏହି ହୋଲଡିଂ ଟ୍ୟାକ୍ସ ନେଇ ପୁରୀ ସହରବାସୀଙ୍କୁ ଉପଯୁକ୍ତ ସେବା ପୌର ପ୍ରଶାସନ ପ୍ରଦାନରେ ବିଫଳ ହୋଇଥିବାବେଳେ ପୁଣି ଅଳିଆ ସଂଗ୍ରହ ନାଁରେ ଲୋକଙ୍କ ଠାରୁ ୟୁଜର ଫି ଲାଗୁ କରିବା ବେଆଇନ ବୋଲି ଶ୍ରୀଜଗନ୍ନାଥ ସେନା ଅଭିଯୋଗ କରିଛି । ତୁରନ୍ତ ପୁରୀ ପୌର ପାଳିକା ୟୁଜର ଫି ପ୍ରତ୍ୟାହାର ନ କଲେ ଆଗାମୀ ଦିନରେ ଦୃଢ ବିରୋଧ ଓ ଆନ୍ଦୋଳନ ହେବ ବୋଲି ଶ୍ରୀଜଗନ୍ନାଥ ସେନା ଚେତାବନୀ ଦେଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
