ପୁରୀ: ଅର୍କ କ୍ଷେତ୍ର କୋଣାର୍କରେ ନୂତନ ସୂର୍ଯ୍ୟମନ୍ଦିର ନିର୍ମାଣ ପାଇଁ ଅନୁମତି ଦେବାକୁ ଦାବି ଜୋର ଧରିବାରେ ଲାଗିଛି । କୋଣାର୍କ ସୂର୍ଯ୍ୟ ମନ୍ଦିରରେ ୧୧୯ ବର୍ଷ ହେବ ସୂର୍ଯ୍ୟ ଦେବତାଙ୍କୁ ପୂଜା କରାଯାଉନାହିଁ । ସୂର୍ଯ୍ୟଦେବତାଙ୍କ ପୂଜାବିଧି ସମ୍ପନ୍ନ ଉଦ୍ଦେଶ୍ୟରେ ଏକ ନୂତନ କୋଣାର୍କ ମନ୍ଦିର ନିର୍ମାଣ ପାଇଁ ପ୍ରଚେଷ୍ଟା କରୁଛନ୍ତି ବିଭିନ୍ନ ସଂଗଠନ । ତେବେ ଏହି ନୂତନ କୋଣାର୍କ ମନ୍ଦିର ନିର୍ମାଣ ପାଇଁ ନିର୍ମାଣ ସମିତି ପକ୍ଷରୁ ଆବଶ୍ୟକୀୟ ସରଞ୍ଜାମ ଚନ୍ଦ୍ରଭାଗା ନିକଟରେ ଥିବା ଏକ ଜମିରେ ମହଜୁଦ ରଖି କାର୍ଯ୍ୟ ଆରମ୍ଭ ପାଇଁ ଯୋଜନା ଆରମ୍ଭ ହୋଇଥିଲା । ଏହାକୁ ପୁରୀ ପ୍ରଶାସନ ପକ୍ଷରୁ ବନ୍ଦ କରିବା ପାଇଁ ନୋଟିସ ଜାରି କରାଯାଇଛି ।
ଏହାକୁ ନେଇ ନିର୍ମାଣ ସମିତି ସଦସ୍ୟ କ୍ଷୋଭ ପ୍ରକାଶ କରିବା ସହ ସୂର୍ଯ୍ୟମନ୍ଦିର ନିର୍ମାଣ ପାଇଁ ସରକାର ଜମି ବ୍ୟବସ୍ଥା କରିବାକୁ ଦାବି ହୋଇଛି । ଏନେଇ ଆଜି ପୁରୀରେ ଏକ ସାମ୍ବାଦିକ ସମ୍ମିଳନୀରେ ନୂତନ କୋଣାର୍କ ମନ୍ଦିର ନିର୍ମାଣକାରୀ ସଂଗଠନ ସୂଚନା ପ୍ରଦାନ କରିଛି । କୋଣାର୍କର ଚନ୍ଦ୍ରଭାଗାରେ ଦ୍ଵିତୀୟ କୋଣାର୍କ ମନ୍ଦିର ନିର୍ମାଣ ନେଇ ପ୍ରୟାସ ଜାରି ରହିଛି । ନୂଆଦିଲ୍ଲୀର ମୁକେଶ ଜୈନଙ୍କ ଦ୍ୱାରା ମୂଳ କୋଣାର୍କ ମନ୍ଦିରର ଅବିକଳ ଓ ଭବ୍ୟ ସୂର୍ଯ୍ୟ ମନ୍ଦିର ନିର୍ମାଣ ଯୋଜନା ରହିଛି ।
ତେବେ କେତେକ ବ୍ୟକ୍ତିଙ୍କ ହୀନ ଚକ୍ରାନ୍ତ ଓ ମନ୍ଦ ଉଦ୍ଦେଶ୍ୟ ଯୋଗୁଁ ସମ୍ପୃକ୍ତ ସ୍ଥାନରେ ତୁରନ୍ତ କାର୍ଯ୍ୟ ବନ୍ଦ ପାଇଁ କୋଣାର୍କ ରାଜସ୍ୱ ନିରୀକ୍ଷକ ଚିଠି କରିଛନ୍ତି । ନୂତନ ଭବ୍ୟ କୋଣାର୍କ ମନ୍ଦିର ପାଇଁ ବହୁ ସଂଖ୍ୟାରେ ପଥର, ରଥର ଚକ, ସ୍ତମ୍ଭ, ମୂର୍ତ୍ତି, ଘୋଡ଼ା ଆସି ପହଞ୍ଚିସାରିଛି । ନୂତନ ସୂର୍ଯ୍ୟ ମନ୍ଦିର ନିର୍ମାଣଶାଳାର ଅଧ୍ୟକ୍ଷ ମୁକେଶ ଜୈନ ପୁରୀ ଜିଲ୍ଲାପାଳ, କୋଣାର୍କ ପ୍ରଶାସନ ଓ ରାଜ୍ୟ ସରକାରଙ୍କୁ ଉକ୍ତ ଜମି ପ୍ରଦାନ କରିବା ପାଇଁ ଅନୁମତି ଦେବାକୁ ଅନୁରୋଧ କରିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
