ପୁରୀ: ଶକ୍ତି ପୀଠରେ ପାଳନ ହେଉଛି ମା'ଙ୍କ ପବିତ୍ର ମହାଷ୍ଟମୀ । ଏଥିପାଇଁ ମା'ଙ୍କର ସ୍ବତନ୍ତ୍ର ପୂଜା ବିଧି ରହିଛି । ସେପଟେ ଶ୍ରୀକ୍ଷେତ୍ରରେ ମଧ୍ୟ ଦେବୀ ପୀଠ ଗୁଡ଼ିକରେ ମହାଷ୍ଟମୀ ପାଳନ ହେଉଛି । ଭକ୍ତମାନେ ଦେବୀ ଦୁର୍ଗାଙ୍କୁ ଭୋଗ, ନୈବେଦ୍ୟ, ଶଙ୍ଖା, ଶାଢ଼ୀ ଓ ସିନ୍ଦୂର ଦେଇ ପୂଜାର୍ଚ୍ଚନା କରୁଛନ୍ତି ।
ତେବେ ଶ୍ରୀକ୍ଷେତ୍ରର ଅଧିଷ୍ଠାତ୍ରୀ ଦେବୀ ମା' ବିମଳାଙ୍କର ଆଜି ମହାଷ୍ଟମୀ ନୀତି ହେଉଥିବାବେଳେ ତାଙ୍କର ପ୍ରତିନିଧି ଦେବୀ କାକୁଡି ଖାଇଙ୍କ ପାଖରେ ମଧ୍ୟ ମହାଷ୍ଟମୀ ନୀତି ହେଉଛି । ଯେଉଁମାନେ ମା'ଙ୍କୁ ଦର୍ଶନ କରି ନ ପାରନ୍ତି, ସେମାନେ ମା' କାକୁଡି ଖାଇଙ୍କୁ ଦର୍ଶନ କରି ଦେବୀ ବିମଳାଙ୍କ ଆଶୀର୍ବାଦ ନିଅନ୍ତି ।
ବିଶେଷ କରି ଏହି ଷୋଡଶ ପୂଜାରେ ମହିଳାମାନେ ମା' ବିମଳାଙ୍କୁ ଦର୍ଶନ କରିବା ନେଇ କଟକଣା ରହିଥାଏ । ଏଣୁ ମହିଳାମାନେ ଦେବୀ ବିମଳାଙ୍କ ପ୍ରତିନିଧି ମା' କାକୁଡି ଖାଇଙ୍କ ନିକଟକୁ ଆସି ପୂଜାର୍ଚ୍ଚନା କରନ୍ତି । ସେପଟେ ଦୁର୍ଗାଷ୍ଟମୀକୁ ମା ଦୁର୍ଗାଙ୍କ ଜନ୍ମ ଦିବସ ଭାବେ ପାଳନ କରାଯାଏ । ଏଣୁ କାକୁଡି ଖାଇ ପୀଠରେ ମା'ଙ୍କୁ ଶାଢ଼ୀ, ଶଙ୍ଖା, ସିନ୍ଦୁର, ନୈବେଦ୍ୟ, ଭୋଗରାଗ ଲାଗି କରାଯାଇ ବିଶେଷ ପୂଜା କରଯାଉଥିବା ନେଇ ମନ୍ଦିରର ପୂଜକ ସୂଚନା ଦେଇଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
