ପୁରୀ: ଜାରି ରହିଛି ଲଘୁଚାପ ଜନିତ ବର୍ଷା । ବର୍ଷାରେ ବେହାଲ ହୋଇଛି ପୁରୀ ସହର । ପୁରୀ ସହର ସମେତ ଅନେକ ଅଞ୍ଚଳରେ ଜଳ ବନ୍ଦୀ ପରିସ୍ଥିତି ସୃଷ୍ଟି ହୋଇଛି । ସହରରେ ଡ୍ରେନ ସମସ୍ୟା ରହିଥିବା କାରଣରୁ ଜଳ ନିଷ୍କାସନ ହୋଇନପାରି ଘରେ ପାଣି ପଶିଥିବା ଦେଖିବାକୁ ମିଳିଛି ।
ବର୍ଷାରେ ବେହାଲ ପୁରୀ ସହର, ଘରେ ପଶିଲା ଡ୍ରେନ ପାଣି
ପୁରୀ ସହରରେ ଗତକାଲି(ଶନିବାର) ବିଳମ୍ବିତ ରାତି ପର୍ଯ୍ୟନ୍ତ ତୁହାକୁ ତୁହା ବର୍ଷା ଲାଗିରହିଥିଲା । ଫଳରେ ତଳିଆ ଅଞ୍ଚଳରେ ଲୋକଙ୍କ ଘରେ ପାଣି ପଶିଯାଇଥିବା ଦେଖିବାକୁ ମିଳିଛି । ପୁରୀ ବାସେଳିସାହି ମୁଦୁଲିଯାଗା ନିକଟ ନୀଳଚକ୍ର ଲେନରେ ଡ୍ରେନ ସମସ୍ୟା ଯୋଗୁଁ ଜଳ ନିଷ୍କାସନ ନ ହୋଇ ପାରି ଲୋକଙ୍କ ଘରେ ଅଣ୍ଠୁଏ ଉଚ୍ଚର ପାଣି ଲହଡି ମାରିଥିଲା। ଫଳରେ ଭୋକ ଉପବାସରେ ରହିଥିଲେ ନୀଳଚକ୍ର ବାସିନ୍ଦା । ଜିଲ୍ଲାପାଳ, ପୁରୀ ବିଧାୟକଙ୍କୁ ବାସ୍ତବ ଚିତ୍ର ବିଷୟରେ ଅବଗତ କରାଇଥିବା ନେଇ କହିଛନ୍ତି ସ୍ଥାନୀୟ ଲୋକେ । ଯଦି ପ୍ରଥମ ବର୍ଷାରେ ଏମିତି ଅବସ୍ଥା ତେବେ ବର୍ଷା ମାସ ଆହୁରି 3 ମାସ ରହିଥିବାରୁ ଚିନ୍ତାରେ ସହରବାସୀ ।
ଇଟିଭି ଭାରତ, ପୁରୀ
