ପୁରୀ: ଶ୍ରୀକ୍ଷେତ୍ରକୁ ବିଶ୍ବ ଐତିହ୍ୟର ମାନ୍ୟତା ଦେବା ଲକ୍ଷ୍ୟରେ ଆଗେଇ ଚାଲିଛି ଉଚ୍ଛେଦ ପ୍ରକ୍ରିୟା । ଗୋଟିଏ ପରେ ଗୋଟିଏ ମଠକୁ ଭାଙ୍ଗିବାରେ ସଫଳ ହୋଇଛି ପ୍ରଶାସନ । ଏମାର ମଠ, ଲଙ୍ଗୁଳି ମଠ ଉଚ୍ଛେଦ ହେବା ପରେ ବଡ ଆଖଡା ମଠକୁ ଉଚ୍ଛେଦ କରାଯାଇଛି । ମଠ ମହନ୍ତଙ୍କ ବିରୋଧ ସତ୍ତ୍ବେ ଏବେ ମାଟିରେ ମିଶିଛି ବଡ ଆଖଡା ମଠ ।
ଗତ କିଛି ଦିନ ଧରି ମଠ ମହନ୍ତଙ୍କ ବିରୋଧ ଯୋଗୁଁ ବନ୍ଦ ରହିଥିଲା ମଠ ଉଚ୍ଛେଦ ପ୍ରକ୍ରିୟା । କିନ୍ତୁ ଆମିକସ କ୍ୟୁରିଙ୍କ ଗ୍ରୀନ ସିଗନାଲ ମିଳିବା ପରେ ଆଖଡା ମଠ ଭଙ୍ଗା ଯାଇଛି । ଏପରିକି ମଠର ମହନ୍ତ ଓ ଅନୁଗାମୀ ଉଚ୍ଛେଦ ପ୍ରକ୍ରିୟାରେ ସହଯୋଗ କରିଥିଲେ । ଏହା ସହ ଏଠାରେ ଥିବା ବହୁ ଦୋକାନ ଘର ମଧ୍ୟ ଭଙ୍ଗିଦିଆଯାଇଛି ।
ଉଚ୍ଛେଦ ପ୍ରକ୍ରିୟା ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିଲା । ଡୋଜର ମେସିନ ଲଗାଯାଇ କୋଠା ଭଙ୍ଗାଯାଇଛି । ପୋଲିସ ଫୋର୍ସଙ୍କ ଉପସ୍ଥିତିରେ ଶାନ୍ତି ଶୃଙ୍ଖଲା ସହ ଉଚ୍ଛେଦ ପ୍ରକ୍ରିୟା ଶେଷ ହୋଇଛି ।
ତେବେ ମଠର ମୁଖ୍ୟ ମନ୍ଦିର ଓ ଗାଦି ସୁରକ୍ଷିତ ରଖାଯାଇଛି । ଏଥିସହ ସହ ବଡ ଆଖଡା ମଠକୁ ସରକାର ପୁନଃ ଥଇଥାନ କରିବେ । ଏଥିସହ ଦୋକାନ ଗୃହ ସରକାର ମାର୍କେଟ କମ୍ପ୍ଲେକ୍ସ କରି ଯୋଗାଇ ଦେବେ । ସେପଟେ ବଡ ଆଖଡା ମଠକୁ ଲାଗିଥିବା ସାନ ଛତା ଉଚ୍ଛେଦ ନେଇ ପ୍ରଶାସନ ପ୍ରସ୍ତୁତ କରିଥିବା ଜଣାପଡିଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
