ପୁରୀ: ରାଜ୍ୟରେ ଦଳିତ ପରିବାର ଉପରେ ବିଜେଡି କର୍ମୀଙ୍କ ଆକ୍ରମଣ ନେଇ ବର୍ଷିଲା ବିଜେପି । ଦଳିତ ପରିବାର ଉପରେ ବିଜେଡି କର୍ମୀ ଓ ନେତାମାନେ ଗୁଣ୍ଡାଗିରି ଚଳାଇଛନ୍ତି । ଏହାର ପ୍ରତିବାଦରେ ଭାରତୀୟ ଜନତା ପାର୍ଟି ଅନୁସୂଚିତ ଜାତି ମୋର୍ଚ୍ଚା ପକ୍ଷରୁ ଏକ ସାମ୍ୱାଦିକ ସମ୍ମିଳନୀ ପୁରୀରେ ଅନୁଷ୍ଠିତ ହୋଇଛି । ସମ୍ମିଳନୀରେ ବିଜେଡି କର୍ମୀଙ୍କ ଏହି ଦାଦାଗିରିକୁ ତୀବ୍ର ନିନ୍ଦା କରାଯାଇଛି ।
କେନ୍ଦ୍ରାପଡା ଆଳି ନିର୍ବାଚନ ମଣ୍ଡଳୀର ନବକିଶୋର ମଲ୍ଲିକଙ୍କ ପୁଅ ତାଙ୍କ ପଞ୍ଚାୟତରେ ମନରେଗା, ପ୍ରଧାନମନ୍ତ୍ରୀ ଆବାସ, ପାଇଖାନା ଇତ୍ୟାଦି ଉନ୍ନତିମୂଳକ କାମରେ ବ୍ୟାପକ ଦୁର୍ନୀତି ହୋଇଥିବା ନେଇ ସାମାଜିକ ଗଣମାଧ୍ୟମରେ ଖବର ପ୍ରକାଶ କରିଥିଲେ । ଏଥିରେ ଉତକ୍ଷିପ୍ତ ହୋଇ ସ୍ଥାନୀୟ ସରପଞ୍ଚ ତାଙ୍କର ସମର୍ଥକଙ୍କ ସହ ତାଙ୍କ ପରିବାର ଲୋକଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି । ଏନେଇ ଥାନାରେ ଅଭିଯୋଗ ହେବା ପରେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ପୋଲିସ୍ ପକ୍ଷରୁ ଗ୍ରହଣ କରାଯାଇ ନାହିଁ ।
ସେପଟେ ଜଗତସିଂହପୁର ଜିଲ୍ଲା ନାଉଗାଁରେ ମଧ୍ୟ ଦଳିତ ମହିଳାମାନଙ୍କୁ ବିଜେଡି କର୍ମୀ ଆକ୍ରମଣ କରିବା ସହ ସମ୍ବିଧାନ ପ୍ରଣେତା ବାବାସାହେଵ ଆମ୍ବେଦକରଙ୍କ ଫଟୋ ମଧ୍ୟ ତଳେ ପକାଇ ଅପମାନ କରିଥିବା ଅଭିଯୋଗ ଆସିଛି । ଯାହାକି ତାଙ୍କ ପ୍ରତି ଘୋର ଅସମ୍ମାନ । ସେଠାରେ ମଧ୍ୟ ପୋଲିସ୍ ନୀରବଦ୍ରଷ୍ଟା ସାଜିଥିବା ବେଳେ ଏପର୍ଯ୍ୟନ୍ତ କାହାରି ଉପରେ କାର୍ଯ୍ୟାନୁଷ୍ଠାନ ନେଇନାହିଁ ।
ତେବେ ଦୁଇଟି ଯାକ ଘଟଣାକୁ କେନ୍ଦ୍ର କରି ଆସନ୍ତା 9, 10 ଓ 11 ତାରିଖରେ ରାଜ୍ୟର ପ୍ରତିଟି ଜିଲ୍ଲାରେ ବିଜେପି ପକ୍ଷରୁ ଜିଲ୍ଲାପାଳଙ୍କୁ ରାଜ୍ୟପାଳଙ୍କ ଉଦ୍ଦେଶ୍ୟରେ ସ୍ମାରକପତ୍ର ଦିଆଯିବ ବୋଲି ସାମ୍ବାଦିକ ସମ୍ମିଳନୀରେ କୁହାଯାଇଛି । ସେପଟେ ଆସନ୍ତା 11 ତାରିଖରେ ଅନୁସୂଚିତ ଜାତି ତରଫରୁ ରାଜ୍ୟପାଳଙ୍କ ଉଦ୍ଦେଶ୍ୟରେ ପୁରୀ ଜିଲ୍ଲାପାଳଙ୍କୁ ଦାବିପତ୍ର ଦିଆଯିବ ବୋଲି ଦଳ କହିଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
