କଟକ : ଶ୍ମଶାନ ଉଚ୍ଛେଦକୁ ବିରୋଧ । ବିନା ବିକଳ୍ପରେ ତେଲୁଗୁ ସମ୍ପ୍ରଦାୟର ଶ୍ମଶାନ ଭାଙ୍ଗିଛି ପ୍ରଶାସନ । ଏହାକୁ ଘୋର ବିରୋଧ କରିଛନ୍ତି କଟକରେ ବସବାସ କରୁଥିବା ତେଲୁଗୁ ସମ୍ପ୍ରଦାୟର ଲୋକେ । କଟକରେ ଚାଲିଥିବା ବିକାଶମୂଳକ କାର୍ଯ୍ୟର ସମ୍ପ୍ରସାରଣ ପାଇଁ କଟକ ହାଡିଆ ପଠାରେ ଥିବା ତେଲୁଗୁ ଶ୍ମଶାନକୁ ଭାଙ୍ଗିଛି ପ୍ରଶାସନ । ଜିଲ୍ଲା ପ୍ରଶାସନ ବିନା କୌଣସି କାରଣରେ ଭାଙ୍ଗିଥିବା ଅଭିଯୋଗ କରିଛନ୍ତି ଲୋକେ ।
କଟକ ସହରରେ ବସବାସ କରନ୍ତି ୨୦ ହଜାରରୁ ଉର୍ଦ୍ଧ୍ବ ତେଲୁଗୁ ସମ୍ପ୍ରଦାୟର ଲୋକେ । କଟକ ହାଡ଼ିଆ ପଠାରେ ୨ ଏକକରରୁ ଉର୍ଦ୍ଧ୍ବ ଜାଗାରେ ରହିଛି ତେଲୁଗୁ ସମ୍ପ୍ରଦାୟର ଶ୍ମଶାନ । କେଉଁ କାଳରୁ ଏହିଠାରେ ସମ୍ପ୍ରଦାୟର ଲୋକଙ୍କୁ ଦାହ ଓ ସମାଧି ଦିଆଯାଉଛି । ହେଲେ ବିନା କୌଣସି ବିକଳ୍ପରେ ଶ୍ମଶାନ ଉଚ୍ଛେଦ କରିବା ଗୋଟିଏ ସମ୍ପ୍ରଦାୟ ପ୍ରତି ଘୋର ପକ୍ଷପାତ ବୋଲି ଅଭିଯୋଗ ହୋଇଛି । ଅନ୍ୟପଟେ ଏହି ଶ୍ମଶାନ ଭାଙ୍ଗିବା ବିବାଦ ଉପରେ ସ୍ପଷ୍ଟିକରଣ ରଖିଛନ୍ତି କଟକ ଜିଲ୍ଲାପାଳ । ସମ୍ପ୍ରଦାୟର ଲୋକମାନେ ଯେଉଁ ଯୁକ୍ତି କରୁଛନ୍ତି ତାହା ଅମୂଳକ । ସେମାନଙ୍କ ପାଇଁ ଭୁଆସୁଣି ନିକଟରେ ଜାଗା ଚିହ୍ନଟ ହୋଇଛି । ସେଠାରେ ସେମାନେ ଦାହ ସଂସ୍କାର ସହ ସମାଧି ଦେବେ ବୋଲି ଜିଲ୍ଲାପାଳ ।
ଗୋଟିଏ ପଟେ ରାଜ୍ୟ ସରକାରଙ୍କ ବିକାଶ ଓ ଅନ୍ୟପଟେ ସମ୍ପ୍ରଦାୟର ବିନାଶ । ଦୀର୍ଘ ଦିନ ଓଡିଶାରେ ରହି ନିଜର ଜୀବିକା ନିର୍ବାହ କରୁଛନ୍ତି ତେଲୁଗୁ ଭାଷାଭାଷୀ ଲୋକେ । ତେବେ ଏହି ବିବାଦରେ ଯଦି ଶୀଘ୍ର ସମାଧାନ ନହୁଏ ତେବେ ବାଧ୍ୟ ହୋଇ କଟକ ଛାଡିବାକୁ ପଡିବ ବୋଲି ତେଲୁଗୁ ସମ୍ପ୍ରଦାୟର ଲୋକେ କ୍ଷୋଭର ସହ କହିଛନ୍ତି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
