କଟକ: ଆଠଗଡର କନ୍ତୋଲ ବାରବାଟୀ ପୋଖରୀ ନିକଟରେ ବାଇକ୍କୁ ଧକ୍କା ଦେଇ ଓଲଟିଲା ଟ୍ରକ । 16ରୁ ଅଧିକ ଆହତ ହୋଇଥିବା ସୂଚନା । ଆଠଗଡ ଡାକ୍ତରଖାନାରେ ଭର୍ତ୍ତି । ସେମାନଙ୍କ ମଧ୍ୟରୁ 9 ଜଣଙ୍କ ଅବସ୍ଥା ଗୁରୁତର ହେବାରୁ କଟକ ବଡ ଡାକ୍ତରଖାନାକୁ ସ୍ଥାନାନ୍ତର ।
ଟ୍ରକଟି ଯାତ୍ରାପାର୍ଟି ସାବିତ୍ରୀ ଗଣନାଟ୍ୟର ଥିବାବେଳେ ଟ୍ରକରେ ଥିବା ସମସ୍ତେ ଆହତ ହୋଇଛନ୍ତି । ଏହି ଦୁର୍ଘଟଣା ପୁରୁଣା କଟକ-ସମ୍ବଲପୁର ରାସ୍ତାରେ ହୋଇଥିବାରୁ ଗାଡି ଚଳାଚଳ ଠପ୍ ହୋଇପଡିଛି ।
ତେବେ ଦୁର୍ଘଟଣାରେ ଗୁରୁତର ଆହତ ହୋଇଥିବା ବାଇକ ଆରୋହୀ ଯୁବକ ଜଣକ ହେଲେ କନ୍ତୋଲ ଗ୍ରାମର ପଙ୍କଜ ସାହୁଙ୍କ ପୁଅ ବଳରାମ ସାହୁ । ସେ ଶ୍ମଶାନକୁ କାଠ ନେଇ ଯାଉଥିବାବେଳେ ସାଲେପୁରରୁ ଯାତ୍ରା ସାରି ସମ୍ବଲପୁର ଅଭିମୁଖେ ଯାଉଥିବା ସାବିତ୍ରୀ ଗଣନାଟ୍ୟ ଟ୍ରକ ବାଇକ ଉପରେ ଚଢି ଯିବାରୁ ଅଘଟଣ ଘଟିଥିଲା । ଦୁର୍ଘଟଣା ଲାଗି ରାସ୍ତା ଜାମ୍ ଥିବାରୁ ଆଠଗଡ ପୋଲିସ ହରାଡାଗହିର ଛକ ଠାରେ ଉପସ୍ଥିତ ରହି ବେଣ୍ଟପଦା ଦେଇ ଯିବାକୁ ଲୋକଙ୍କୁ ପରାମର୍ଶ ଦେଉଛି ।
କଟକରୁ ନାରାୟଣ ସାହୁ, ଇଟିଭି ଭାରତ
