କଟକ: ଆଜିଠାରୁ ଆରମ୍ଭ ହୋଇଛି ଦଶହରା ପର୍ବ। ସମସ୍ତ ମଣ୍ଡପରେ କୋଭିଡ଼ ନିୟମ ମାନି ପୂଜା କରାଯାଉଛି । ବିଶେଷକରି ବିନା ଭକ୍ତରେ ମା'ଙ୍କ ପୂଜା କରାଯାଉଛି । ସରକାରଙ୍କ ନିର୍ଦ୍ଦେଶକୁ ପାଳନ କରି ଚଳିତବର୍ଷ ଦଶହରା ପର୍ବ ପାଳନ କରାଯାଉଛି । ତେବେ ସରକାର ପୂଜା କମିଟିକୁ ସାହାଯ୍ୟ କରୁନଥିବା ଅଭିଯୋଗ ହୋଇଛି ।
ଏପରିକି ପୂଜା ପୂର୍ବରୁ ସହରରେ ଥିବା ମଣ୍ଡପ ପାଖରେ ଠିକ ଭାବରେ ସଫେଇ କରାଯାଉନଥିବା ଅଭିଯୋଗ କରିଛନ୍ତି କଟକ ଶାନ୍ତି କମିଟିର କାର୍ଯ୍ୟକାରୀ ସଭାପତି ବିଜୟ କୁମାର ଦାଶ । ସରକାରଙ୍କ ପକ୍ଷରୁ କୌଣସି ସହାୟତା କରାଯାଉନାହିଁ । ସରକାରଙ୍କ ସମସ୍ତ ନିୟମ ମାନି ସରକାରଙ୍କୁ ପୂଜା କମିମାନେ ସାହାଯ୍ୟ କରିଥିବାବେଳେ ସରକାର ଅସହଯୋଗ କରିଛନ୍ତି ବୋଲି ସେମାନେ ଅଭିଯୋଗ କରିଛନ୍ତି ।
ଅନ୍ୟପଟେ ମଣ୍ଡପରେ ଆସନ୍ତାକାଲି ମହାଷ୍ଟମୀ ପୂଜା ଅନୁଷ୍ଠିତ ହେବ । ମହାଷ୍ଟମୀରେ ସମସ୍ତ ମହିଳାମାନେ ବ୍ରତ ରଖିଥାନ୍ତି। ଏହି ପରିପ୍ରେକ୍ଷୀରେ ମହିଳାମାନେ ମଣ୍ଡପ ଆସି ବ୍ରତ କରିଥାଆନ୍ତି । ତେବେ ସରକାରଙ୍କ ନିୟମ ମାନି ମଣ୍ଡପ ନ ଆସିବାକୁ ପୂଜା କମିଟି ପକ୍ଷରୁ ନିବେଦନ କରାଯାଇଛି । ଘରେ ରହି ବ୍ରତ ପାଳନ କରିବାକୁ ଭକ୍ତମାନଙ୍କୁ ଅନୁରୋଧ କରିଛନ୍ତି ପୂଜା କମିଟି କର୍ମକର୍ତ୍ତା ।
କଟକରୁ ନାରାୟଣ ସାହୁ, ଇଟିଭି ଭାରତ
