କଟକ: ସାଲେପୁର ବିଧାୟକ ପ୍ରକାଶ ବେହେରାଙ୍କ ଦଳ ବଦଳକୁ ନେଇ ଚାଲିଥିବା ଚର୍ଚ୍ଚାର ଏକ ରକମ ପୂର୍ଣ୍ଣଛେଦ ପଡ଼ିଛି । ଗତକାଲି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଓଡ଼ିଶା ଆସିଥିଲେ । ଆଉ ଏହାର ଗୋଟିଏ ଦିନ ପରେ ପ୍ରକାଶ ଦଳ ଛାଡ଼ିଛନ୍ତି । ଦଳର ହାଇକମାଣ୍ଡ ରାହୁଲ ଗାନ୍ଧୀଙ୍କ ପାଖକୁ ନିଜ ଇସ୍ତଫା ପତ୍ର ପଠାଇଦେଇଛନ୍ତି । ସେପଟେ କେଉଁ ଦଳକୁ ଯିବେ ସେ ନେଇ କୌଣସି ସ୍ପଷ୍ଟ ସୂଚନା ଦେଇନାହାନ୍ତି ପ୍ରକାଶ ।
ନିଜ ଇସ୍ତଫା ପତ୍ରରେ ପ୍ରକାଶ ଦର୍ଶାଇଛନ୍ତି, ଦଳରେ ତାଙ୍କୁ ଅଣଦେଖା କରାଯାଉଥିଲା । ଏପରିକି ପିସିସି ସଭାପତି କୌଣସି ଅଭିଯୋଗ ଶୁଣୁନଥିଲେ । ଯେଉଁଥିପାଇଁ ସେ ଏପରି ନିଷ୍ପତ୍ତି ନେଇଛନ୍ତି । ପ୍ରକାଶ ବିଜେପିରେ ଯୋଗଦେବା ନେଇ ଚର୍ଚ୍ଚା ଜୋର ଧରିଛି । ନିର୍ଭରଯୋଗ୍ୟ ସୂତ୍ରରୁ ଜଣାପଡ଼ିଛି ଯେ ବିଜେଡ଼ି ସହିତ ଅଙ୍କ ଛିଡ଼ୁ ନଥିବାରୁ ବିଜେପିରେ ଯୋଗଦେଇ ପାରନ୍ତି ପ୍ରକାଶ । ସମ୍ଭବତଃ ସେ ଆଜି ବିଜେପିର ଯୋଗ ଦେବେ ବୋଲି ସୂଚନା ମିଳିଛି । ସୂଚନାମୁତାବକ ଗତ କିଛି ଦିନ ତଳେ ସାଲେପୁର ଅଞ୍ଚଳରେ ପଦଯାତ୍ରା କରିଥିଲେ ବି ଦଳୀୟ ପତାକା ବ୍ୟବହାର କରିନଥିଲେ ।
ଏଣେ ପ୍ରକାଶଙ୍କୁ ସାଲେପୁରରୁ ପ୍ରାର୍ଥୀ କରିବା ପାଇଁ କଂଗ୍ରେସ ତାଙ୍କ ନାମକୁ ସୁପାରିଶ କରିଛି । ତେବେ କଂଗ୍ରେସ ଖୁବ ଶୀଘ୍ର ତାର ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରିବାକୁ ଥିବାବେଳେ ସାଲେପୁର ଆସନ ପାଇଁ ବିକଳ୍ପ ଖୋଜୁଛି ଦଳ । ତେବେ ଏହି ଆସନ ପାଇଁ ଆଶାୟୀଙ୍କ ଦୌଡ଼ରେ ପୂର୍ବତନ ଅର୍ଥମନ୍ତ୍ରୀ ପଞ୍ଚାନନ କାନୁନଗୋଙ୍କ ନାମ ରହିଛି । ସେ ନିକଟରେ କଂଗ୍ରେସ ଯୋଗ ଦେଇଥିଲେ । ତେବେ ଦଳ ଏହି ଆସନ ପାଇଁ କାହାକୁ ପ୍ରାର୍ଥୀ କରିବା ତାହା ଉପରେ ସମସ୍ତଙ୍କର ନଜର ରହିଛି ।
କଟକରୁ ନାରାୟଣ ସାହୁ, ଇଟିଭି ଭାରତ
