କଟକ: ଦିଲ୍ଲୀ ଅଗ୍ନିକାଣ୍ଡ ପରେ ସତର୍କ ହେଲା ଓଡ଼ିଶା ଅଗ୍ନିଶମ ବିଭାଗ । ଅଗ୍ନି ନିରାପତ୍ତା ନିୟମକୁ କଡ଼ାକଡ଼ି ଭାବେ ପାଳନ କରିବା ପାଇଁ ନିର୍ଦ୍ଦେଶ ଦେଲେ ଅଗ୍ନିଶମ ଡିଜି ସନ୍ତୋଷ ଉପାଧ୍ୟାୟ । ରାଜ୍ୟର ସମସ୍ତ ଅଗ୍ନିଶମ ଅଧିକାରୀଙ୍କୁ ଏନେଇ ନିର୍ଦ୍ଦେଶ ଦେଇଛନ୍ତି ଡିଜି । ବିଭିନ୍ନ ଅନୁଷ୍ଠାନର ଫାୟାର ସେଫ୍ଟି ଅଡିଡ୍ କରାଯିବା ସହ ହୋଟେଲ, ଲଜ, ଗେଷ୍ଟ ହାଉସ, ସିନେମା ହଲ, ଶିକ୍ଷାନୁଷ୍ଠାନ ଇତ୍ୟାଦିର ଜାଞ୍ଚ ହେବ । ସମସ୍ତ ଜିଲ୍ଲା ସ୍ବାସ୍ଥ୍ୟ ଚିକିତ୍ସାକେନ୍ଦ୍ର, କଲେକ୍ଟୋରେଟ୍ ଅଫିସ, ବହୁତଳ ବିଶିଷ୍ଟ ସରକାରୀ କୋଠରୀ ମଧ୍ୟ ଜାଞ୍ଚ କରିବାକୁ ନିର୍ଦ୍ଦେଶ ଦେଇଛନ୍ତି ।
ସୂଚନା ଅନୁଯାୟୀ, ଗତକାଲି(ଶୁକ୍ରବାର) ସନ୍ଧ୍ୟା ସମୟରେ ଦିଲ୍ଲୀର ମୁଣ୍ଡକା ମେଟ୍ରୋ ଷ୍ଟେସନ ନିକଟରେ ଥିବା ଏକ ତିନି ମହଲା ବିଶିଷ୍ଟ ବାଣିଜ୍ୟିକ ପ୍ରତିଷ୍ଠାନରେ କୌଣସି କାରଣରୁ ଅଗ୍ନିକାଣ୍ଡ ଘଟି 27 ଜଣଙ୍କ ମୃତ୍ୟୁ ଘଟିଛି । ଏଥିସହ ଏକାଧିକ ବ୍ୟକ୍ତି ଗୁରୁତର ଏବଂ ସାମାନ୍ୟ ଆହତ ହୋଇଛନ୍ତି । କୋଠାରେ ଅଗ୍ନିଶମ ନିରାପତ୍ତା ବ୍ୟବସ୍ଥା ନଥିବାରୁ ଏପରି ଏକ ବିରାଟ ଅଗ୍ନିକାଣ୍ଡ ଘଟିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
