କଟକ: ବିଶ୍ୱବାସୀ ବି ଶୁଣିବେ 'ଉତ୍କଳ ଜନନୀ ମମତା ମୟୀ' ସୁମଧୁର ସଂଗୀତ । ଅନନ୍ତ ବଳିଆ ଟ୍ରଷ୍ଟ ଦ୍ୱାରା ରେକର୍ଡ କରାଯାଉଥିବା ଏହି ଓଡ଼ିଆ ସାଂସ୍କୃତିକ ସଙ୍ଗୀତ ବିଶ୍ୱର ୩୦ଟି ଦେଶରେ ଏପ୍ରିଲ ୧ ଅର୍ଥାତ୍ ଉତ୍କଳ ଦିବସରେ ରିଲିଜ ହେବ । ଓଡ଼ିଶାର ପ୍ରଖ୍ୟାତ ଆଧ୍ୟାତ୍ମିକ ଗୁରୁ ପଦ୍ମଶ୍ରୀ ବାବା ବଳିଆ ଏହି ସଂଗୀତକୁ ରଚନା କରି ଥିବାବେଳେ କଟକ ସିଡିଏ ପ୍ରତିଭା ଷ୍ଟୁଡ଼ିଓରେ ସଂଗୀତ ରେକଡିଂ କରାଯାଇଛି ।
ଏହାକୁ ସଙ୍ଗୀତରେ ସଜାଇଛନ୍ତି ଓଡ଼ିଶାର ପ୍ରଖ୍ୟାତ ସଙ୍ଗୀତ ନିର୍ଦ୍ଦେଶକ ପବିତ୍ର ପଟ୍ଟନାୟକ । କେବଳ ଓଡ଼ିଆ ଭାଷାରେ ଏହି ସଙ୍ଗୀତ ରେକର୍ଡ କରାଯାଇଥିବା ସହ ଭିଡିଓ ମାଧ୍ୟମରେ କଣ୍ଠଶିଳ୍ପୀମାନେ ଅଭିନୟ ଓ ଓଡ଼ିଶାର ସମସ୍ତ ଚିତ୍ରକୁ ଭିଡିଓ ମାଧ୍ୟମରେ ଦେଖାଯିବ ବୋଲି କହିଛନ୍ତି ପବିତ୍ର । ଅନ୍ୟପଟେ ଏହି ସଙ୍ଗୀତକୁ ଗାଇଛନ୍ତି ଓଡ଼ିଶାର ବିଭିନ୍ନ ଜିଲ୍ଲା ତଥା କୋଣଅନୁକୋଣର ୧୦ ଜଣ ପ୍ରଖ୍ୟାତ କଣ୍ଠଶିଳ୍ପୀମାନେ । ସଂଗୀତ ଗାନ କରିଥିବା କଣ୍ଠଶିଳ୍ପୀମାନେ ହେଉଛନ୍ତି ସତ୍ୟଜିତ ପ୍ରଧାନ, ଶଶାଙ୍କ ଶେଖର, ବିଷ୍ଣୁ ମୋହନ କବି, ପ୍ରଶାନ୍ତ କୁମାର, କୁମାର ଦିଲ୍ଲୀପ, ଅନ୍ତରା ଚକ୍ରବର୍ତ୍ତୀ, ଜାଗୃତି ମିଶ୍ର, ସସ୍ମିତା ମହାନ୍ତି, ପ୍ରତିଭା ପ୍ରଧାନ ଓ ସ୍ନେହା ଦେବତା ପ୍ରମୁଖ ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
