କଟକ: ଦୀର୍ଘ ଦିନ ଧରି ଲାଗି ରହିଥିଲା ଜମିବାଡ଼ି ବିବାଦ । ଏନେଇ ପାରିବାରିକ କଳହ ମଧ୍ୟ ବଢ଼ି ଚାଲୁଥିଲା । ଏହି ସମସ୍ୟାର ସମାଧାନ ପାଇଁ ବାରମ୍ବାର ଥାନାକୁ ଦୌଡୁଥିଲେ ବ୍ୟକ୍ତି ଜଣକ । ହେଲେ ଥାନା ଅଧିକାରୀ କୌଣସି କର୍ଣ୍ଣପାତ କରୁନଥିଲେ କି ଅଭିଯୋଗପତ୍ର ମଧ୍ୟ ରଖୁନଥିଲେ । ଏପରିକି ଥାନା ଅଧିକାରୀମାନେ ବ୍ୟକ୍ତିଙ୍କୁ ଅଣଦେଖା ବି କରିଥିଲେ । ଏହାକୁ ସହିନପାରି ଶେଷରେ ଆତ୍ମହତ୍ୟା ପାଇଁ ଉଦ୍ୟମ କରିଛନ୍ତି ସେ । ନିଜ ଦେହରେ କିରାସିନି ଢାଳି ନିଆଁ ଲଗାଇଥିଲେ ଥାନା ପରିସରରେ । ଏଭଳି ଦୃଶ୍ୟ ଦେଖିବାକୁ ମିଳିଛି ସାଲେପୁର କଟକ ଜିଲ୍ଲା କିଶନନଗର ଥାନା ସମ୍ମୁଖରେ ।
ସୂଚନାଯୋଗ୍ୟ ଯେ, ଇଷାଣି ବ୍ରହ୍ମପୁର ଅଞ୍ଚଳର ଗୁଣନିଧି ବିଷୋଇ ଜମିବାଡି ବିବାଦ ନେଇ ବାରମ୍ବାର ଥାନାର ଦ୍ବାରସ୍ଥ ହେଉଥିଲେ ସୁଦ୍ଧା ତାଙ୍କ କଥାକୁ ପୋଲିସ ଗୁରୁତ୍ୱ ଦେଉଲଥିଲା । ଯାହାଫଳରେ ନିରାଶ ହୋଇ ସେ ଆତ୍ମହତ୍ୟା ଉଦ୍ୟମ କରିଥିବା ସନ୍ଦେହ କରାଯାଉଛି । ବ୍ୟକ୍ତିଙ୍କ ଶରୀର ପ୍ରାୟ ୯୦ଭାଗ ଜଳିଯାଇଛି । ଏନେଇ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ସ୍ଥିତି ସଂକଟାପନ୍ନ ଥିବାରୁ ଏସସିବିରେ ଆଶୁ ଚିକିତ୍ସା ବିଭାଗରେ ତାଙ୍କର ଚିକିତ୍ସା ଚାଲିଛି ।
ଇଟିଭି ଭାରତ, କଟକ
